مەملەكەت باسشىسى نۇرسۇلتان نازارباەۆ بارشا قازاقستاندىقتاردى پاسحا مەرەكەسىمەن قۇتتىقتادى دەپ حابارلادى قازاقستان پرەزيدەنتىنىڭ ءباسپاسوز قىزمەتى.
«قىمباتتى وتانداستار! سىزدەردى پاسحا مەرەكەسىمەن شىن جۇرەكتەن قۇتتىقتايمىن! ول – ادامداردىڭ جۇرەگىنە سەنىم مەن ءۇمىتتى, يگىلىك پەن بەيبىتشىلىككە ۇمتىلىستى ۇيالاتاتىن تەرەڭ ادامگەرشىلىك ماعىناسى بار مەيرام. پاسحا – يگى ىستەرگە, قايىرىمدى امالدارعا, مەيىرىمدىلىك, ءوزارا قۇرمەت, وتباسى مەن ءوز حالقىنا دەگەن سۇيىسپەنشىلىك سياقتى شىنايى رۋحاني قۇندىلىقتارعا بەت بۇراتىن مەزەت.
ەلىمىزدە ماقساتتى مەملەكەتتىك ساياساتتىڭ ارقاسىندا تاتۋلىق پەن تىنىشتىق ورناعان, ءدىني سەنىم بوستاندىعىنا كەپىلدىك بەرىلىپ, قازاقستان اتتى ۇلكەن وتباسىندا ءومىر ءسۇرىپ جاتقان ەتنوستاردىڭ تىلدەرى مەن داستۇرلەرىن دامىتۋعا بارلىق جاعدايلار جاسالعان.
ەلوردامىز استانا جاھاندىق دىنارالىق جانە مادەنيەتارالىق ديالوگ ورتالىقتارىنىڭ بىرىنە اينالدى. استانادا 2015 جىلعى ماۋسىمدا الەمدىك جانە ءداستۇرلى دىندەر ليدەرلەرىنىڭ V سەزى وتەدى.
بەيبىتشىلىك پەن تىنىشتىقتى قولداۋعا, تۇراقتىلىقتى ساقتاۋعا قازاقستانداعى ورىس پراۆوسلاۆيە شىركەۋىنىڭ ميتروپوليتتىك ايماعى, سونداي-اق باسقا حريستياندىق قاۋىمدار سالماقتى ۇلەس قوسۋدا.
ءبىزدىڭ حالقىمىز ءبىرتۇتاس, ءبىز ءبارىمىز قۋاتتى دا تۇراقتى وتانىمىزدى بىرگە قۇرامىز.
وسى جارقىن مەرەكەدە بارشا قازاقستاندىقتارعا وركەندەۋ, جان تىنىشتىعىن, اماندىق جانە بۇگىنى مەن ەرتەڭىنە دەگەن سەنىمدىلىك تىلەيمىن!» دەلىنگەن ەلباسى قۇتتىقتاۋىندا.
