قالىڭدىق كوركى – كويلەگى
وسىدان ءۇش جىل بۇرىن استانادا اشىلعان «اق نيەت» كاسىپورنى اۋەل باستان-اق ۇيلەنۋ تويىنا ارنالعان ۇلتتىق ۇلگىدەگى كيىمدەردى ساتۋمەن جانە جالعا بەرۋمەن اينالىسا باستاعان بولاتىن. بۇل رەتتە جەكە كاسىپكەر مەرۋەرت قوڭىرباەۆا الدىمەن كيىم تىگەتىن عيماراتتى جالعا الىپ, تىگىن تسەحىن قاجەتتى قۇرال-جابدىقتارمەن جاراقتاندىرعاننان كەيىن قولىنان ءىس كەلەتىن تىگىنشىلەردى جۇمىسقا قابىلدادى. سودان سوڭ, كيىم تىگۋگە ارنالعان ساپالى ماتالاردى شەتەلدەن ساتىپ الۋعا كىرىستى.
ۋاقىت وتە كەلە, قازاقتىڭ ۇلتتىق ورنەگىمەن ادىپتەلىپ تىگىلگەن ادەمى توي كويلەكتەرى مەن ويۋلى كامزولدارعا سۇرانىس ارتا ءتۇستى. بۇل البەتتە, كاسىپكەرلىكتى كەڭەيتۋگە جول اشادى. العاشىندا ساتىپ العان Janome جانە Typical اتتى ءتورت ماشيناسى ەسكىرىپ, قازىرگى زامان تالابىنا ساي كەلمەيتىنىن ۇققان مەرۋەرت تۇتىنۋشىلار تالعامىن ەسكەرە كەلە, Brother ماركالى يننوۆاتسيالىق تىگىن جابدىقتارىنا قول جەتكىزسەم دەپ ارماندايدى. ويتكەنى, ول الەمدە اتالمىش كومپانيانىڭ كومپيۋتەرلىك تىگىن ماشينالارىنا تەڭ كەلەر قۇرالداردىڭ جوق ەكەنىن جاقسى بىلەتىن. كيىم-كەشەككە كەستەلەردىڭ سان ءتۇرىن سالۋعا مۇمكىندىگى بار جوعارى ساپالى ماشينادا كوشىرمە جاساۋعا ارنالعان بەينە باقىلاۋ دا بار. كەرەمەت ەمەس پە؟! كاسىپكەر كوپ ويلانباستان, وسىنداي زاماناۋي تەحنيكانى ساتىپ الۋعا اسىعادى. مۇنداي قادامعا بارۋ ءۇشىن كوپ قاراجاتتىڭ قاجەت ەكەنى بەلگىلى. ءسويتىپ, م.قوڭىرباەۆا قازاقستاننىڭ حالىق بانكىنە جۇگىنەدى. كاسىپكەردىڭ باستاماسىن بانكتەگىلەر قۋانا قولدايدى. وسىلايشا, مەرۋەرت مەملەكەتتىڭ وڭدەۋشى ونەركاسىپ سالاسىندا جۇمىس ىستەپ جۇرگەن جانە ەكونوميكانىڭ قىزمەت كورسەتۋ سالاسىنا جاتاتىن قىزمەتتەردى اتقاراتىن شاعىن جانە ورتا بيزنەستى قارجىلاندىرۋ باعدارلاماسى بويىنشا نەسيە الادى.
– جوبانى قاراستىرۋ بارىسىندا ءبىز مەرۋەرت قوڭىرباەۆانىڭ ەرەكشە كاسىپپەن, قازاقستاننىڭ ەتنوگرافيالىق مۇراسىن ساقتاۋمەن جانە دامىتۋمەن اينالىسىپ جۇرگەنىن دە ەسكەردىك, – دەدى حالىق بانكى استانا
وڭىرلىك فيليالىنىڭ ديرەكتورى نۇرلىبەك سەيداحمەت. – سونىمەن بىرگە, اتالمىش باعدارلاما بويىنشا «كيىم تىگۋ» قىزمەتىن اتقارىپ ءجۇرگەن كاسىپكەرلەردىڭ جوباسىن قارجىلاندىرۋ قاراستىرىلعان. بۇل رەتتە حالىق بانكى مەملەكەتتىك باعدارلامالار ارقىلى كاسىپكەرلەرگە بەلسەندى تۇردە قولداۋ كورسەتىپ كەلەدى. مەملەكەتتىك ءتۇرلى باعدارلامالار اياسىندا حالىق بانكىنىڭ استانا وڭىرلىك فيليالى جالپى سوماسى 6,3 ملرد تەڭگەنى قۇرايتىن 27 جوبانى قارجىلاندىردى.
بانكتىڭ قولداۋىمەن زاماناۋي قۇرالداردى ساتىپ الۋعا مۇمكىندىك العان «اق نيەت» كاسىپورنىنىڭ كەلەشەكتە ءالى تالاي جاس جۇبايعا قۋانىش پەن شاتتىق سىيلايتىنىنا سەنىمدىمىز.
گۇلبارشىن وكەشقىزى