نۇر-سۇلتان قالاسىندا تۇرعىن ءۇي قۇرىلىس جيناق بانكىندە كەزەكتە تۇرعان 900-دەن اسا سالىمشى كوپتەن كۇتىپ جۇرگەن پاتەرلەرىنە قول جەتكىزدى. بۇل قۋانىشتى شاراعا ەلوردا باسشىسى التاي كولگىنوۆ قاتىسىپ, جاڭا باسپاناعا يە بولعان تۇرعىندارعا ءوز قولىمەن پاتەر كىلتىن تابىس ەتتى.
«ءبىز ءۇشىن قولجەتىمدى الەۋمەتتىك تۇرعىن ءۇي سالۋ وتە ماڭىزدى. جىل سايىن مىڭداعان وتباسى ەلباسى بەكىتكەن «نۇرلى جەر» مەملەكەتتىك باعدارلاماسى بويىنشا پاتەر الادى. مەملەكەت باسشىسىنىڭ تاپسىرماسىنا سايكەس بيىل جەڭىلدەتىلگەن تۇرعىن ءۇي قۇرىلىسىنىڭ كولەمى ءۇش ەسەگە ارتتى» دەدى ءوز سوزىندە قالا اكىمى.
جاڭا قولدانىسقا بەرىلگەن كوپ قاباتتى تۇرعىن ءۇي ەسىل اۋدانىندا ورنالاسقان. ونىڭ ءبىرىنشى قاباتىندا الەۋمەتتىك نىساندار ورنالاسقان. سونداي-اق جاڭا ۇيدەن بىرقاتار ورتالىقتار اشۋ كوزدەلىپ وتىر. مىسالى, سونىڭ ءبىرى رەتىندە پسيحولوگيالىق-مەديتسينالىق-پەداگوگيكالىق كەڭەس بەرۋ ورتالىعىن ايتۋعا بولادى. مۇندا ماماندار ەستۋ, قارىم-قاتىناس جانە مىنەز-قۇلقىندا ەرەكشەلىكتەرى بار بالالاردى تەكسەرۋدەن وتكىزىپ, كومەك كورسەتەدى. سونىمەن بىرگە ۇلتتىق سپورت تۇرلەرىن دامىتۋ مەن قالاداعى قوعامدىق تاماقتانۋ جانە سەرۆيس كوللەدجىنىڭ ستۋدەنتتەرىنە ارنالعان تاجىريبە ورتالىعى دا ىسكە قوسىلادى.
