قر ۇلتتىق مۋزەيىندە حح عاسىردىڭ ەڭ تانىمال جانە بەدەلدى شەبەرلەرىنىڭ ءبىرى – پابلو پيكاسسونىڭ كورمەسى اشىلدى.
مادەنيەت جانە سپورت مينيسترلىگى ۇيىمداستىرعان «پابلو پيكاسسو. سەلەستينا جانە قىشتان جاسالعان ۆاللوريس» ەكسپوزيتسياسى استانانىڭ 20 جىلدىعىنا ارنالدى.
ونەر الەمىندە وزىندىك قولتاڭباسى بار سۋرەتشىنىڭ كورمەسىن تاماشالاۋعا مادەنيەت جانە سپورت ءمينيسترى ارىستانبەك مۇحامەديۇلى, يتاليانىڭ قازاقستانداعى ەلشىسى پاسكۋالە د’اۆينو جانە ونەرسۇيەر قاۋىم كەلدى. كومپوزيتسيانىڭ اشىلۋ سالتاناتىندا ءسوز العان مينيستر «بۇگىنگى
حالىقارالىق كورمە – شوقتىعى بيىك مادەني شارالاردىڭ ءبىرى. ۇلتتىق مۋزەيدىڭ اشىلعانىنا از عانا جىلدار بولسا دا, وسىنداي الەمگە ايگىلى تۇلعالاردىڭ كورمەسى قويىلىپ جاتقانى قۋانتادى. پابلو پيكاسسو – سۋرەت ونەرىمەن قاتار, جالپى ادامزاتتىڭ دامۋىنا زور ۇلەس قوسقان تۇلعا. الەمنىڭ سۇلۋلىعىن قىلقالاممەن قاعاز بەتىنە ءتۇسىرىپ, وعان ەرەكشە ءار بەرۋ اركىمنىڭ قولىنان كەلە بەرمەيدى. سۋرەت ونەرى – تابيعات تارتۋ ەتكەن تالانتتى جاندارعا تيەسىلى دەسەك, پابلو پيكاسسو سونداي تالانت يەسى» دەدى.
كورمە بارىسىندا استانالىقتار مەن قالا قوناقتارى كوركەم كەراميكا مەن پيكاسسو گراۆيۋرالارىنىڭ سيرەك كورسەتىلەتىن كوللەكتسياسىن تاماشالاۋعا مۇمكىندىك الدى. قۇمىرالار, تاباقشالار, ساۋىتتار, ەرتەگىدەگى قۇستار مەن ميفتىك جاراتىلىستار شەبەردىڭ ەكىنشى دۇنيەجۇزىلىك سوعىستان كەيىن فرانتسيانىڭ وڭتۇستىگىندە تۇراقتاعان كەزدەرىن كوزگە ەلەستەتەدى.
يتاليانىڭ قازاقستانداعى ەلشىسى پاسكۋالە د’اۆينو كورمە ءتۇرلى ۇلت وكىلدەرىن ءبىر ارناعا توعىستىرىپ, ءوزارا تۇسىنىسۋىنە كومەكتەسەتىنىنە سەنىمدى. «ۇلتتىق مۋزەيگە قويىلعان كورمەنىڭ ماڭىزى زور. الەمگە ايگىلى پابلو پيكاسسونىڭ جەكە كورمەسى قازاقستاندا تۇڭعىش رەت ءوتىپ جاتىر. كوركەم تۋىندىلار كوپتىڭ كوڭىلىنەن شىعىپ, مۋزەي قوناقتارىن قۋانتادى دەپ ۇمىتتەنەمىز» دەدى ول.
تاريحقا شولۋ جاساساق, 1946 جىلى ۆاللوريستە جىل سايىن وتەتىن كەراميكا كورمەسىنە بارعان پابلو پيكاسسو سول جەردەن شابىت الىپ, 4 مىڭنان استام دەكوراتيۆتىك كەراميكا بۇيىمدارىن جاساعان. تىڭ تۋىندىلاردى جاساۋ ءۇشىن شەبەر كوزەشى ۇرشىعىن پايدالانباعان. ونىڭ ساۋىتتارى مەن كەسەلەرى ەرەكشە ءستيلدىڭ ارقاسىندا تارتىمدى ءارى تىلسىم ارحايكالىق مۇسىندەر ىسپەتتەس. قيالعا ەرىك بەرسەڭىز, قۇستار مەن اڭداردىڭ ءتىرىلىپ, ال كەراميكادان جاسالعان ءتۇرلى-ءتۇستى مۇسىندەرگە جان ءبىتىپ, ادام كەيپىنە ەنەتىنىن ەلەستەتۋگە بولادى.
كورمەگە 32 تۇپنۇسقا ەكسپونات ۇسىنىلدى. تۋىندىلاردا Edition Picasso («پيكاسسو قولىنان شىققان») دەگەن جازۋ مەن ءنومىر تاڭبالانعان.
ەكسپوزيتسيا 3 قاراشاعا دەيىن جالعاسادى.
