استانادا زاماناۋي ۇلگىدەگى تۇرعىن ۇيلەر جەتەرلىك. سولاردىڭ ءبىرى – «Nova سity» تۇرعىن ءۇي كەشەنى. بۇل – «Otau group» قۇرىلىس كومپانياسى سالىپ جاتقان نىسان.
باس قالادا قولتاڭباسى بار
قازىرگى ۋاقىتتا اتالمىش نىساننىڭ تەڭ جارتىسى عانا سالىنعان. قۇرىلىس الاڭىندا جوبا جەتەكشىسىنىڭ ورىنباسارى شوقان يبراەۆپەن تىلدەستىك. ونىڭ ايتۋىنشا, بۇل جەردە الداعى ۋاقىتتا «Nova سity» ىقشام اۋدانى پايدا بولماق. ۇلكەن پاركينگ سالىنىپ, وسى اۋماقتا مەكتەپ تە بوي كوتەرمەك.
– بۇل نىساندى سالۋدى 2016 جىلدىڭ 19 شىلدەسىندە باستاعان ەدىك. ەكى جىلدىڭ ىشىندە 12 ءۇي پايدالانۋعا بەرىلدى. وسى ايدىڭ سوڭىنا قاراي تاعى ەكى ءۇيدىڭ قۇرىلىسى تولىقتاي اياقتالادى. جوسپار بويىنشا 2020 جىلعا دەيىن مۇندا 24 ءۇي سالىنۋى ءتيىس, – دەيدى ول.
ايتا كەتۋ كەرەك, شوقان يبراەۆ – قۇرىلىس سالاسىندا 1987 جىلدان بەرى ەڭبەك ەتىپ كەلە جاتقان تاجىريبەلى مامان. نەگىزگى ماماندىعى – قۇرىلىسشى. ەڭبەك جولىن قالاقشى, ءمونوليتشى بولىپ باستاعان ول ءوزىنىڭ تۋعان جەرى ەكىباستۇز بەن سەمەي قالاسىندا دا ۋچاسكە باسشىسى, پروراب, بريگادير بولىپ ءبىراز جىل قىزمەت ەتكەن. 2000 جىلداردان بەرى استانانىڭ دا سالىنۋىنا وزىندىك ۇلەس قوسىپ كەلەدى. «نۇرسايا-2», «گراند استانا», «كامپۋس» سياقتى كوپتەگەن تۇرعىن ءۇي كەشەندەرى مەن قۇرىلىسى اياقسىز قالعان قالاداعى بىرقاتار پروبلەمالى نىسانداردى دا سالۋعا ينجەنەرلىك سالاسى بويىنشا باسشىلىق ەتكەن يبراەۆ – 30 جىلعى ەڭبەك وتىلىندە ماراپاتقا دا كەندە ەمەس, ءتۇرلى مەدالدار مەن العىس حاتتاردىڭ يەگەرى.
بەس ادامدى قۇتقارعان جۇمىسشىلار
«Nova سity» تۇرعىن ءۇي كەشەنىنىڭ قۇرىلىس الاڭىندا ەكى اۋىسىمدا جۇزدەگەن ادام جۇمىس ىستەيدى. سولاردىڭ ىشىندە بىلەكتى عانا ەمەس, جۇرەكتى جىگىتتەر دە از ەمەس. اعىمداعى جىلدىڭ ناۋرىز ايىندا اتالمىش تۇرعىن ءۇي كەشەنىنىڭ ءبىرىنىڭ 7-قاباتىندا ءورت شىعىپ, قىزىل جالىنعا اينالعان پاتەر ىشىندە شيەتتەي ءۇش بالا مەن ولاردىڭ اناسى جانە اجەسى قالىپ قويعان. تۇسكى ۇزىلىستە جۇرگەن ءمونوليتشى رۋسلان بەرىكوۆ پەن اقىلبەك جاقايىموۆ, ادىلبەك داعىستان جانە تەرەزە ورناتۋشى جاسۇلان بايسەيىتوۆ پەن ينجەنەر رۋسلان جالباقوۆ ءورتتى بايقاعاندا بىردەن وقيعا ورنىنا جۇگىرىپ بارىپ, قۇتقارۋشىلار كەلگەنشە 5 ادامدى 6-قاباتتىڭ تەرەزەسىنەن امان الىپ شىققان. ولاردىڭ بۇل ەرلىگى ءۇشىن استانا اكىمى اسەت يسەكەشەۆ قۇرىلىسشىلاردى «بەلسەندى ازامات» ەستەلىك مۇسىندەرىمەن جانە العىس حاتتارمەن ماراپاتتاپ, اقشالاي سىياقى تابىستاعان بولاتىن. سونىمەن قاتار, قۇتقارۋشىلاردى استانا قالاسى توتەنشە جاعدايلار دەپارتامەنتىنىڭ باسشىسى بارات دۇزاقباەۆ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتاعان-دى.
قازىرگى ۋاقىتتا قوس رۋسلان مەن جاسۇلان تۇنگى اۋىسىمدا جۇمىس ىستەپ جۇرگەندىكتەن, قۇرىلىس الاڭىندا تەك مونوليتشىلەر اقىلبەك پەن ادىلبەكتى عانا جولىقتىردىق. ولاردى سول كەزدەگى وقيعا تۋرالى سوزگە تارتىپ, جۇمىستارى جايلى تىلدەستىك.
– ءورت بولىپ جاتقاندا ويلانىپ تۇراتىن ۋاقىت بولمادى. كوز الدىمىزعا ءوز وتباسىلارىمىز ەلەستەدى. وقيعا ورنىنا بىردەن جۇگىرىپ باردىق. 7-قاباتتاعى پاتەرگە كوك تۇتىننەن كىرە المادىق. سودان 6-قاباتقا ءتۇسىپ, ادامداردى تەرەزەدەن كوتەرىپ الدىق. قۇدايعا شۇكىر, ولاردىڭ ءبارى ءدىن امان قالدى, – دەيدى ادىلبەك.
ادىلبەك پەن اقىلبەكتىڭ قۇرىلىستا جۇمىس ىستەپ جۇرگەندەرىنە 6 جىلدان اسىپتى. جۇمىس اۋىر بولسا دا, ولار وسى سالاعا ابدەن بەيىمدەلىپ الىپتى.
– نەگىزى, اسابالىق, انشىلىك ونەرىم بار. بىراق قۇرىلىستان ناپاقامدى تاۋىپ, وتباسىمدى اسىراپ وتىرمىن. قۇرىلىس قىزىعى مەن قيىندىعى قاتار جۇرەتىن جۇمىس قوي. قىستىڭ ايازى مەن جازدىڭ اپتابىندا دا جۇمىس ىستەيمىز. بيىكتىككە دە كوز ۇيرەنىپ قالدى. كوپ قاباتتى ءۇيدىڭ توبەسىندە تۇرىپ, مونوليت قۇيامىز. كەيدە قالىپتى اسىعا تارسىلداتىپ جاتقانىمىزدا دەنەمىزگە بالعا دا ءتيىپ كەتەدى. الايدا ەت قىزۋمەن ەشتەڭە بىلىنبەيدى, – دەگەن اقىلبەك بۇل جۇمىستىڭ وزىنە ۇنايتىنىن ايتادى.
قۇرىش بىلەكتى قۇرىلىسشىلاردى كاسىبي مەرەكەلەرىمەن قۇتتىقتاي وتىرىپ, ولاردىڭ ىستەرىنە ساتتىلىك, ەڭبەكتەرىنە جەمىس تىلەدىك.
