دەمالىس كۇندەرى فۋتبولدان قازاقستان چەمپيوناتىنىڭ پرەمەر ليگاسىندا كەزەكتى تۋردىڭ ويىندارى ءوتتى. ماتچ الدىندا استانالىق مارين توماسوۆقا قازاقستان فۋتبول فەدەراتسياسىنىڭ «قىركۇيەك ايىنىڭ ۇزدىك فۋتبولشىسى» سىيلىعى تابىس ەتىلدى.
كەزەكتى تۋردا چەمپيونات كەستەسىنىڭ باسىنداعى «قايرات» پەن «استانا» جەڭىسكە جەتىپ, ەكەۋى دە التىنعا تالاساتىن مۇمكىندىكتەرىن ساقتاپ قالدى. «قايرات» ءوز الاڭىندا «توبىلدى» 2:0 ەسەبىمەن جەڭسە, استانالىقتار «اقتوبە» كومانداسىن 5:0 ەسەبىمەن تىزە بۇكتىردى. بۇل ويىندا مارين توماسوۆ, ياعني ءبىر ويىندا, قاتارىنان ءتورت گول سوعىپ, «پوكەر» جاسادى! ءسويتىپ, سەربيالىق لەگيونەر چەمپيوناتتىڭ مەرگەندەر تىزىمىندە سۋىرىلىپ العا شىقتى. ال «اقتوبە» قاقپاسىنا سوڭعى بەسىنشى گولدى سەرىكجان مۋجيكوۆ سوقتى.
مارين توماسوۆ وسى چەمپيونات بارىسىندا قارسىلاستار قاقپاسىنا 19 گول سوعىپ, 14 رەت ناتيجەلى پاس بەردى. ەۋروپا ليگاسىندا دا ۇزدىكتەر قاتارىنان اتالدى.
«استانا» كەلەسى ويىندى 30 قازاندا كوكشەتاۋدا «وقجەتپەس» كومانداسىمەن وتكىزەدى. بۇل استانالىقتاردىڭ ەۋروپا ليگاسىنا قاتىسۋىنا قاتىستى كەيىنگە شەگەرىلگەن 25-تۋردىڭ ويىنى بولادى.
ال سوڭعى ەكى تۋردىڭ ويىندارىن «استانا» 3 قاراشادا قوستانايدا «توبىلمەن», ال 9 قاراشادا ەلوردادا «ەرتىسپەن» وتكىزەدى. «قايرات» بولسا 3 قاراشادا پاۆلوداردا «ەرتىس» كومانداسىمەن ويناسا, ال سوڭعى تۋردا ءوز الاڭىندا «اتىراۋ» كومانداسىن قابىلدايدى. وسى ويىنداردىڭ ناتيجەسىندە قازاقستان چەمپيونى انىقتالاتىن شىعار. ال قولا جۇلدەگە «ورداباسى» مەن «توبىل» تالاسقالى تۇر.
