قازاقستان پرەزيدەنتى – قارۋلى كۇشتەردىڭ باس قولباسشىسى قاسىم-جومارت توقاەۆ ارميانىڭ اسكەري جانە شۇعىل ارەكەتتەرگە دايىندىعى, ازاماتتاردى اسكەرگە شاقىرۋدىڭ كۇزگى ناۋقانىنىڭ بارىسى, سونداي-اق الماتى وبلىسىندا ءوتىپ جاتقان بىتىمگەرشىلىك وقۋ-جاتتىعۋ جيىنى جونىندە قورعانىس ءمينيسترىنىڭ ەسەبىن تىڭدادى.
مەملەكەت باسشىسى قورعانىس مينيسترلىگىنىڭ الدىنا بىرقاتار مىندەت قويدى. سونىڭ ىشىندە قارۋلى كۇشتەردى قالىپتاستىرۋ تۇجىرىمداماسىن ازىرلەۋ كەزىندە قازاقستان ارمياسىنىڭ رادياتسيالىق جانە حيميالىق قورعانىسىنا قاجەتتى قۇرال-جابدىقتاردىڭ زاماناۋي تۇرلەرىمەن جابدىقتالۋىنا, اسكەري-تەحنيكالىق اۆياتسيا مەن ينجەنەرلىك اسكەردى كۇشەيتۋگە, ينفراقۇرىلىمدى دامىتۋعا ەرەكشە نازار اۋدارۋدى تاپسىردى. قاسىم-جومارت توقاەۆ حالىقارالىق اسكەري ىنتىماقتاستىقتى دامىتۋعا, كادرلىق ساياسات پەن اسكەرىمىزدىڭ قىسقى ماۋسىمعا دايىندىعىنا قاتىستى بىرقاتار تاپسىرما بەردى.
سونىمەن قاتار پرەزيدەنت ۇلتتىق بانك توراعاسى ەربولات دوساەۆتى قابىلدادى. مەملەكەت باسشىسىنا بيىلعى 9 اي ىشىندەگى اقشا-نەسيە ساياساتىن ىسكە اسىرۋدىڭ الدىن الا قورىتىندىلارى, ۇلتتىق بانكتەگى التىن-ۆاليۋتا رەزەرۆتەرىنىڭ جاي-كۇيى جانە ۇلتتىق قوردىڭ اكتيۆتەرى تۋرالى باياندالدى. سونداي-اق ۇلتتىق بانكتىڭ قاراجاتى ەسەبىنەن قارجىلاندىرىلاتىن داعدارىسقا قارسى باستامالاردىڭ ورىندالۋ بارىسى جونىندە مالىمەت بەرىلدى. 2020 جىلدىڭ سوڭىنا دەيىنگى جانە 2021 جىلعا ارنالعان قازاقستاننىڭ ەكونوميكالىق دامۋىنا قاتىستى بولجامى ۇسىنىلدى. كەزدەسۋ قورىتىندىسى بويىنشا پرەزيدەنت ەلدىڭ قارجى تۇراقتىلىعىن قامتاماسىز ەتۋ جونىندە بىرقاتار ناقتى تاپسىرما بەردى.
سونداي-اق مەملەكەت باسشىسى ۇلتتىق ەكونوميكا ءمينيسترى رۋسلان دالەنوۆتى قابىلدادى. پرەزيدەنتكە ەكونوميكالىق ءوسىمدى قالپىنا كەلتىرۋگە جانە ازاماتتاردىڭ ءال-اۋقاتىن ارتتىرۋعا باعىتتالعان. قازاقستاننىڭ جاڭا ەكونوميكالىق باعدارىنىڭ نەگىزگى قاعيدالارىن جۇزەگە اسىرۋ جايىندا باياندالدى.
