استانادا اۋەسقويلار اراسىندا قايىرىمدىلىق ۆەلوشەرۋ ءوتتى.
«سالاۋاتتى جۇرەك ايلىعى – 2018» ءىس-شارالار اياسىندا وتكەن شاراعا 200-گە جۋىق قالا تۇرعىنى قاتىستى. يگىلىگى مول شارانىڭ باستى ماقساتى – سالاۋاتتى ءومىر سالتىن ناسيحاتتاۋ ارقىلى ەلوردا تۇرعىندارىنىڭ اراسىندا جۇرەك اۋرۋلارىنىڭ الدىن الۋ. ال جينالعان قارجى كارديوحيرۋرگيا سالاسىنداعى ءبىلىم جانە عىلىم سالاسىن دامىتۋعا جولدانادى.
جيىنعا الەمدىك ءتۋرنيردىڭ كاسىبي ۆەلوسپورتشىسى, قازاقستان مەن ازيا چەمپيونى جاندوس بيجىگىتوۆ قاتىسىپ, استانالىقتارعا ۇلگى كورسەتتى. ۇزىندىعى 8 شاقىرىمعا سوزىلعان اۋەسقويلار اراسىنداعى ۆەلوشەرۋ ۇلتتىق عىلىمي كارديوحيرۋرگيا ورتالىعىنان» باستالىپ, تۇران جانە ۇلى دالا داڭعىلدارى, ماڭگىلىك ەل جانە كەرەي, جانىبەك حاندار كوشەلەرىمەن جالعاستى.
ايتا كەتەيىك, «سالاۋاتتى جۇرەك ايلىعى – 2018» ءىس-شارالارىن ۇيىمداستىرۋدى «ۇلتتىق كارديوحيرۋرگيالىق ورتالىعى» اق باستاماسىمەن قۇرىلعان «جۇرەك ورتالىعى» قورى قولعا العان. اتالعان قور كلينيكانىڭ عىلىمي جانە ءبىلىم بەرۋ قىزمەتىن ىلگەرىلەتە ءتۇسۋ, سول سياقتى ەلىمىزدەگى كارديوحيرۋرگيالىق قىزمەت ءىسىن دامىتۋ ءۇشىن قۇرىلعان.
ايان ءابدۋالي
