جادىراپ جاز دا كەلدى. جۇرتشىلىق ەندى سەنبى-جەكسەنبى كۇندەرى ءبىر ۋاق تابيعات اياسىندا دەمالعاندى ۇناتادى. ەلوردادان ەداۋىر قاشىقتىقتا جاتقان تابيعاتى كوركەم بۋرابايعا بارۋعا كوپ ادامنىڭ مۇمكىندىگى جوق. سوندىقتان قالا ماڭىنداعى دەمالىس ورىندارىنا بارۋدى ءجون كورەدى.
ال باس شاھاردىڭ اينالاسىندا جەكەمەنشىك دەمالىس ورىندارى از ەمەس. وندا سۋدىڭ جاعاسىندا تىنىعىپ, وتباسىمەن بىرگە دەمالۋعا بولادى. قونام دەسەڭىز, كوتتەدجگە نەمەسە كيىز ۇيگە جاتاسىز. بىراق وعان ءبىراز اقشا كەرەك.
ماسەلەن, ەلوردالىقتار ءجيى باراتىن «بالقاراعاي» دەمالىس ايماعىن الايىق. مۇندا اعاشتان جاسالعان ءبىر ءۇيدى جالعا الۋ قۇنى – 100 مىڭ تەڭگە. ونىڭ ىشىندە بەس بولمە بار. بۇعان جانە تاڭعى اس كىرەدى. كيىز ءۇي مەن جازدىق كۇركەنى جالعا الۋ وعان قاراعاندا ەكى ەسە تومەن. ماسەلەن, باسسەينگە ءتۇسۋ ەرەسەكتەرگە 5 مىڭ تەڭگە بولسا, 4 پەن 7 جاس ارالىعىنداعى بالاعا – 3000 تەڭگە. باسسەينگە تاماق بەن سۋسىنىڭىزدى الىپ كىرۋگە بولمايدى. سپورتتىق ويىن الاڭدارى دا بار. فۋتبول الاڭىن ءبىر ساعاتقا جالعا الۋ – 5000 تەڭگە, ۆەلوسيپەدتى ءبىر ساعاتقا پايدالانام دەسەڭىز 2000 تەڭگە تولەيسىز. جارتى ساعات اتپەن سەرۋەندەۋ – 2000 تەڭگە. ال ەندى وسىنداي بىرقاتار دەمالىس ورىندارىن ايتىپ وتەيىك.
ماسەلەن, قوياندىداعى «زولوتوي فازان» وتباسىلىق ويىن-ساۋىق كەشەنى – بۇل كوپكە ءمالىم دەمالىس ورىندارىنىڭ ءبىرى. دەمالىس كەشەندە جايلى قوناق ءۇي ءنومىرى, كوتتەدج ۇيلەرىنىڭ بىرنەشە ءتۇرى, كولدەگى جايلى كەبەك جانە كيىز ۇيلەر, سونداي-اق ەكى باسسەين جۇمىس ىستەيدى. قىزمەت ءتۇرى دە كوپ. بىرنەشە سپورتتىق الاڭدار جاسالعان. اتقا ءمىنىپ سەرۋەندەۋگە بولادى.
ال قوسشىداعى «چيستىە پرۋدى» دەمالىس ورنى ورىس اۋىلى ستيلىندە اعاشتان جاسالعان. مۇندا ەكى دەڭگەيلى قوناقۇيلەر, ەۋروپالىق ءاسۇيدىڭ جايلى مەيرامحاناسى, ساۋنا, مونشا, باسسەين جانە جازعى كۇركەلەر بار. بالالار ءۇشىن جاسالعان اتكەنشەك, توبەشىك, باتۋت جانە باسقا دا قىزىقتار كوپ. مۇندا ماسالار مازاڭىزدى المايدى. ويتكەنى دەمالىس اۋماعى ارنايى قۇرالدارمەن وڭدەلگەن.
«Green park» دەمالىس ايماعى دا قوسشىداعى نۇرا وزەنىنىڭ جاعاسىندا ورنالاسقان. بۇعان وتباسىڭىزبەن نەمەسە دوستارىڭىزبەن بارۋعا بولادى. بۇل جەردە جايلى قوناقۇيلەر, جازعى كۇركەلەر, كيىز ۇيلەر, تاڭداۋلى ەۋروپالىق جانە شىعىس ءاسۇيى بار مەيرامحانا, مونشا, بيليارد, يپپودروم, ءتىپتى شاعىن حايۋاناتتار باعى بار. ال «اق قايىڭ» دەمالىس ورنىندا ەۋروپادا كوپ تارالعان فين گريل-كۇركەلەر قويىلعان. سونداي-اق قاراعاندى تاسجولى بويىندا «بەيبارىس», ماكسيموۆكا كەنتىندە «الياسكا» دەمالىس ورىندارى جۇمىس ىستەيدى. الايدا بۇل دەمالىس ورىندارىنىڭ دەنى اقمولا وبلىسىنىڭ اۋماعىندا قونىس تەپكەن.
قىسقاسى, جازعى دەمالىس ماۋسىمى باستالدى. قايدا دەمالامىن دەسەڭىز, ەركىڭىز بەن جاعدايىڭىزعا قارايسىز…
