قالا قالاي سالىندى؟

ەلىمىزدىڭ ءار ايماعىنان باس قالاعا اعىلعان جۇرت ەلوردا قۇرىلىسىنا ۇلەس قوستى. سونىڭ ىشىندە وسى ىسكە بار جان-تانىمەن كىرىسكەن قۇرىلىسشىلاردىڭ ءجونى بولەك.
سوڭعى جىلدارى ەلوردا تۇرعىن ءۇي قۇرىلىسى جاعىنان ەلىمىزدە كوش باستادى. ءار جىل سايىن قالادا 2 ميلليون شارشى مەتردەن استام باسپانا نەمەسە 23 مىڭ پاتەر پايدالانۋعا بەرىلدى. «نۇرلى جەر» باعدارلاماسى بويىنشا 110 مىڭ شارشى مەتر – 1419 پاتەر تاپسىرىلاتىن.
بيىلعى التى ايدا قۇرىلىس جۇمىستارىنىڭ كولەمى 173,7 ميلليارد تەڭگەنى قۇرادى. وسى ۋاقىت ارالىعىندا 859,4 مىڭ شارشى مەتر تۇرعىن ءۇي تاپسىرىلدى. جىل اياعىنا دەيىن 1,3 ميلليون شارشى مەتردى پايدالانۋعا بەرۋ جوسپارلاندى. سونىڭ ىشىندە 653 پاتەر نەسيەلىك بولىپ, 731 پاتەر تۇرعىندارعا جالعا بەرىلەدى. ەسكى جانە اپاتتى ۇيلەردى ءسۇرۋ جوباسى اياسىندا وسى جىلى 94,1 مىڭ شارشى مەتر نەمەسە 1472 پاتەر پايدالانۋعا بەرىلمەك.
جالپى العاندا, ەلوردادا جىل باسىنان بەرى جالپى اۋدانى 23,8 مىڭ شارشى مەتردى قۇرايتىن نەسيەلىك تۇرعىن ءۇي پايدالانۋعا بەرىلدى. بۇل – بارلىعى 250 پاتەر. قازىرگى كەزدە 18 كوپپاتەرلى تۇرعىن ءۇي كەشەنىنىڭ قۇرىلىسى جالعاسىپ جاتىر. مۇنداعى 3416 پاتەردىڭ 1384-ءى وسى جىلدىڭ اياعىنا دەيىن ىسكە قوسىلادى.
ارينە, قالا حالقىن باسپانامەن قامتۋمەن قاتار الەۋمەت­تىك نىسانداردىڭ قۇرىلىسى دا ما­ڭىزدى. بۇل جۇمىس تا ءوز رەتى­مەن ءجۇرىپ جاتىر. وسى كۇندەرى قالادا 9 مەكتەپ پەن 14 مىڭ ورىنعا شاقتالعان 10 جاپسارلاس عيمارات سالىنۋدا. بۇعان قوسا, 10 مىڭ ورىنعا ارنالعان 8 جەكە مەكتەپ­تىڭ قۇرىلىسى بويىنشا ءبىر ينۆەس­تيتسيالىق كەلىسىمشارتقا جانە جەتى مەموراندۋمعا قول قويىلدى. ۇلتتىق كومپانيالار ەسەبىنەن 480 ورىندىق ەكى بالاباقشانىڭ, سول سياقتى مەملەكەتتىك-جەكەمەنشىك ارىپتەستىك اياسىندا تاعى ەكى بالاباقشانىڭ قۇرىلىسى جالعاسىپ جاتىر.
مۇنىڭ سىرتىندا كوز كورۋى ناشارلاعان بالالارعا ارنالعان بالاباقشا مەن 800 ورىندىق كوللەدج سالىنۋدا.
ەلوردادا وسى كۇندەرى ءىرى مەديتسينالىق كلاستەر قالىپتاستى. سول جاعالاۋدا زاماناۋي قوندىرعىلارمەن جابدىقتالعان تۇتاس مەديتسينالىق قالاشىق بوي كوتەردى. بۇرىننان بار بىرقاتار مەديتسينالىق نىساندار جاڭعىرتىلاتىن بولدى. سونىڭ ىشىندە ابدەن ەسكىرگەن تەمىرجول اۋرۋحاناسى جاڭادان سالىنادى. سونىمەن قاتار پسيحيكالىق دەنساۋلىقتىڭ مەديتسينالىق ورتالىعى, №1 جانە №3 ەمحانالار كۇردەلى جوندەۋدەن وتكىزىلىپ, قالالىق بالالار اۋرۋحاناسىنىڭ ناۋقاستاردى قابىلداۋ ءبولىمى جاڭ­عىرتىلىپ, اتالعان نىساندار تەحنيكالىق تۇرعىدان كۇشەيتىلەدى.
سوڭعى جيىرما جىلدا قالا كوركىنە كورىك قوسقان كوپتەگەن مادەني جانە سپورتتىق نىساندار سالىنعانىن دا جۇرت بىلەدى. «استانا وپەرا», «استانا بالەت» تەاترلارى, كومەديا تەاترى وتىر­عان «Nomad City Hall», ۇلتتىق مۋزەي, «استانا ارەنا» ستاديونى, «سارىارقا» ۆەلوترەگى, «بارىس-­ارەنا» مۇز سارايى – سونىڭ ءبىر پاراسى عانا. جاقىندا ەلوردا كۇنىنە وراي «جەكپە-جەك» سارايى ەسىگىن ايقارا اشتى.
مەجە بويىنشا 2050 جىلعا قاراي نۇر-سۇلتان جاھاندىق قالاعا اينالۋى ءتيىس. سول ۋاقىتتا ەلوردا تۇرعىندارىنىڭ سانى 2-2,5 ميلليون بولادى دەگەن بولجام دا بار. بۇل – قۇرىلىس قارقىنى باسەڭدەمەيدى دەگەن ءسوز. دەمەك, وسى كۇندەرگە دەيىن قۇرىلىس سالاسىندا قالا تولايىم تابىستارعا جەتسە, بۇدان دا زور جەتىستىكتەرى ءالى الدا.