اسا قامقور, ەرەكشە مەيىرىمدى اللانىڭ اتىمەن باستايمىن!
قۇرمەتتى قاۋىم!
بارشاڭىزدى قاسيەتتى قۇربان ايتتىڭ كەلۋىمەن قۇتتىقتايمىن. ايت قابىل بولسىن! وتباسىلارىڭىزعا باق-بەرەكە, ىرىس پەن ىنتىماق, اللانىڭ اماندىعىن تىلەيمىن!
قۇربان ايت – ءيىسى مۇسىلماننىڭ ۇلىق مەيرامى. ايت كۇندەرى اعايىن-جۇرت ءبىر-بىرىنە: «ايت قابىل بولسىن!» ايتىپ, ىزگى تىلەكتەرىن جەتكىزىپ, العىستارىن جاۋدىرادى. وسى رەتتە سىزدەرگە ىزگى نيەتپەن جاراتقاننىڭ جاقسىلىعىن تىلەيمىن.
«قۇربان» ءسوزى «جاقىن بولۋ», «جاقىنداۋ» دەگەن ۇعىمداردى بىلدىرەدى. مۇسىلمان بالاسى ايت كۇنى قۇرباندىق شالۋ ارقىلى اللاعا دەگەن اق نيەتىن پاش ەتەدى. ويتكەنى اللا تاعالا قاسيەتتى قۇراندا: «ۇمىتپاڭدار, ولاردىڭ ەتى دە, قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)» («حاج» سۇرەسى, 37-ايات) دەپ ادال نيەتتىڭ ماڭىزدىلىعىن اتاپ وتكەن.
قۇربان ايتتا ورىندالاتىن ەڭ قايىرلى امال – قۇربان شالۋ. ايت كۇنى جاعدايى بار كىسىلەر قۇربان شالىپ, ونى قاراۋسىز قالعان قاريالار مەن جەتىمدەرگە, كوپبالالى وتباسىلارعا تاراتىپ, ساۋاپ الۋعا تىرىسادى. الايدا ايت كۇندەرى مال باعاسى قىمباتتاپ كەتەتىن جاعداي ءجيى ورىن الادى. وسى رەتتە وتانداستارىمدى مال باعاسىن شارىقتاتپاي, پايداعا ەمەس, ساۋاپقا بولەنۋگە ۇندەيمىن. ويتكەنى قۇربان ايت – قاناعات پەن قايىرىمدىلىقتىڭ مەرەكەسى.
اللا تاعالا بارشامىزدى ايتتان ايتقا امان-ەسەن جەتكىزىپ, ىزگى ىستەر مەن قۋانىشتى ساتتەردە باسقوسۋىمىزدى ءناسىپ ەتكەي! ءاۋمين!
سەرىكباي قاجى وراز,
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي
