اپتا باسىندا نۇر-سۇلتان قالاسىنىڭ اكىمى التاي كولگىنوۆتى قابىلداعان قازاقستان پرەزيدەنتى قاسىم-جومارت توقاەۆ استانانى اباتتاندىرۋ جۇمىستارىنا تىڭ سەرپىن بەرۋدى تاپسىردى. قالا باسشىسى وسى تاپسىرمانى ورىنداۋ ماقساتىندا شاھاردىڭ سارىارقا اۋدانىنىڭ «بيۋدجەتكە قاتىسۋ» قاناتقاقتى جوباسىنىڭ اياسىندا اباتتاندىرىلعان 10-نان اسا اۋلانى ارالاپ شىقتى.
جالپى بيىل ەلوردادا بارلىعى 110 اۋلانى اباتتاندىرۋ مەجەلەندى. سونىڭ ىشىندە سارىارقا اۋدانىندا 40 اۋلا كوركەيتىلەدى. ال «بيۋدجەتكە قاتىسۋ» جوباسىنا تۇرعىندار تاراپىنان 22 جوبا ۇسىنىلىپ, حالىقتىق داۋىس بەرۋ قورىتىندىسى مەن اۋدان اكىمدىگى جانىنان قۇرىلعان ساراپتامالىق كەڭەستىڭ شەشىمىمەن ولاردىڭ 15-ءى تاڭداپ الىندى.
قالا اكىمى بارىپ كورگەن سونداي جوبالاردىڭ ءبىرى رەسپۋبليكا داڭعىلى, 74 مەكەنجايى اۋلاسىنداعى «بالالار – ءبىزدىڭ بولاشاعىمىز» اتالاتىن ويىن الاڭى. اتالمىش جوبانى ەرلى-زايىپتى ەۆگەني جانە سۆەتلانا ترۋحانوۆتار ۇسىندى. تۇرعىنداردىڭ ايتۋىنشا, بۇدان بۇرىن بۇل اۋلادا جەتكىنشەكتەر وينايتىنداي جاعداي جاسالماعان. جوبا قابىلدانعاننان كەيىن وعان 6 ملن تەڭگە ءبولىنىپ, ءتيىستى جۇمىستار باستالىپ, قازىر اياقتالۋعا جاقىن قالدى.
اۋلادا بالالارعا ارنالعان قوس مۇنارالى كەشەن, كۇركەلى ۇيشىك, ءارتۇرلى اتكەنشەكتەر, سپورتتىق ترەناجەرلەر, وزگە دە قۇرالدار ورناتىلادى. ءدال وسىنداي الاڭدار ءى.ەسەنبەرلين كوشەسى 15/1 جانە 11/1 مەكەنجايلارىندا دا بوي كوتەرەدى. سول سياقتى بەيبىتشىلىك كوشەسى 60, ك.كۇمىسبەكوۆ كوشەسى 7/1 مەكەنجايلارىندا جاڭا ويىن الاڭدارى سالىنادى.
بۇل جوبالار «قاۋىپسىز بالالار الاڭى», «بالالار باقىتى», «جاس جانە زاماناۋي استانانىڭ بالالارى», «قالاداعى جايلى اۋلادا تۇرعىم كەلەدى» اتاۋلارىن يەلەنگەن. وسى اۋلالاردىڭ بارىنە بارعان التاي كولگىنوۆ تۇرعىندارمەن سويلەستى. بالالاردى اڭگىمەگە تارتىپ, قانداي اۋلادا تۇرىپ, ويناعىلارى كەلەتىنىن سۇرادى. استانالىقتاردىڭ الەۋمەتتىك جوبالارعا بەلسەندى قاتىسۋىنىڭ ماڭىزدىلىعىن اتاپ ءوتتى.
«قالانى كوركەيتۋگە تۇرعىنداردىڭ بەلسەندى قاتىسۋى قۋانتادى. جالپى, قالا بويىنشا 1560 اۋلا بار. ونىڭ 473-ىنە جوندەۋ جۇمىستارىن جۇرگىزۋ قاجەت. سونىڭ دەنى – وڭ جاعالاۋدا. جوسپارعا سايكەس جۇمىستار جۇرگىزىلەدى» دەدى نۇر-سۇلتان اكىمى.
بۇعان قوسا, قالا باسشىسى بەيبىتشىلىك كوشەسى 62, جەڭىس داڭعىلى 25 جانە گەتە كوشەسى 10 مەكەنجايلارىنا باردى. بۇل اۋلالاردا فۋتبول الاڭدارى جانە شاعىن ساۋلەت نىساندارى ورناتىلىپ, ترەناجەرلەر قويىلادى. ءبىرجان سال كوشەسى, 2 ءۇي اۋلاسىندا دا ءتيىستى جۇمىستار جۇرگىزىلەدى.
جالپى بيىل «بيۋدجەتكە قاتىسۋ» جوباسى اياسىندا №187 كوشە 21, 23, 25, 27, د. باباتايۇلى كوشەسى 9, 9ا, سارىارقا داڭعىلى 29 مەكەنجايلارىنداعى اۋلالار دا اباتتاندىرىلادى. «كوكتال» سىندى قالانىڭ شەت ايماقتارىنداعى تۇرعىن الاپتار دا اباتتاندىرۋدان شەت قالمايدى.
