1 قازان – حالىقارالىق قارتتار كۇنى! بۇل – اعا بۋىننىڭ قوعام ومىرىنە قوسقان ۇلەسىنە شىنايى ريزاشىلىق بىلدىرەتىن جانە ارداگەرلەرگە قامقورلىق كورسەتەتىن ايرىقشا كۇن. قارتتارىمىزعا ىقىلاس ءبىلدىرۋ, قۋانىش سىيلاۋ – ءبىزدىڭ حالقىمىزدىڭ داستۇرىنە سىڭگەن قاسيەت.
بايقوڭىر اۋدانى اكىمشىلىگى مەرەيلى مەرەكەنى بەيبىت ءومىردى بىزگە سىي ەتكەن ۇلى وتان سوعىسى ارداگەرلەرىن قۇتتىقتاۋدان باستادى. ۇلى وتان سوعىسىنىڭ ارداگەرلەرىن اۋدان اكىمى – نۇربول نۇرساعاتوۆ ءوزى قۇتتىقتاپ, ارداقتىلارىمىزدىڭ باتاسىن الدى. سونىمەن قاتار, ارنايى باعالى سىيلىقتارىن دا تابىس ەتىپ, پاراسات ونەگەسى بولىپ وتىرعان ارداگەرلەرىمىزگە زور دەنساۋلىق تىلەدى.
«قۇرمەتتى اسىل قازىنامىز بولعان ارداقتى ارداگەر اعالار مەن اقجاۋلىقتى انالار, سىزدەردى كەلىپ جەتكەن حالىقارالىق قارتتار كۇنىمەن شىن جۇرەكتەن قۇتتىقتايمىن! سىزدەر, قوعامدىق جۇمىستارعا بەلسەنە ارالاسىپ, دارالىق پاراساتتىڭ ونەگەسى بولىپ, وسكەلەڭ جاس ۇرپاقتىڭ ءتالىم-تاربيەسىنە دە ەلەۋلى ۇلەس قوسىپ كەلەسىزدەر. سىزدەردى بۇگىنگى مەرەكەلەرىڭىزبەن قۇتتىقتاپ زور دەنساۋلىق, ۇزاق عۇمىر, وتباسىلىق اماندىق, بەيبىت تە بەرەكەلى ءومىر تىلەيمىن! ەڭسەلەرىڭىز تىك, ومىرلەرىڭىز شۋاقتى بولىپ, كۇش-قۋاتتارىڭىز سارقىلماسىن. ەلىمىز تىنىش, تاۋەلسىزدىگىمىز ماڭگى بولسىن!» دەدى اۋدان اكىمى نۇربول نۇرساعاتوۆ ارداگەرلەرگە ارناعان قۇتتىقتاۋىندا.
