ەلورداداعى بوتانيكالىق باقتا ۇستازدار كۇنىنە وراي پەداگوگتەر اللەياسى اشىلدى. ەسىل اۋدانى اكىمى بەرىك جاكەنوۆ پەن بىرقاتار ءبىلىم ورداسىنىڭ باسشىلارى اللەياعا 20 شىرشا وتىرعىزدى.
– بوتانيكالىق باقتا 45 مىڭعا جۋىق تال وسەدى. كوكتەمدە وقۋشىلار اللەياسىن اشقانبىز, بۇگىن مىنە, پەداگوگتەر اللەياسى پايدا بولدى. بۇگىن اۋدانعا قاراستى 20 مەكتەپتىڭ ديرەكتورلارىمەن بىرىگىپ, 20 شىرشا وتىرعىزدىق. اعاشتىڭ قادىر-قاسيەتىن ەجەلدەن جاقسى بىلگەن حالىقپىز عوي. اتا-بابالارىمىز: «ءبىر تال كەسسەڭ, ون تال ەك» دەپ تەككە ايتپاسا كەرەك. «اكەدەن مال قالعانشا تال قالسىن» دەگەن قازاقتىڭ ءسوزى بار عوي. يگى ىسكە اتسالىسقان ۇستازدارعا العىس بىلدىرە وتىرىپ, ءتول مەرەكەسىمەن شىن جۇرەكتەن قۇتتىقتايمىن! ادامزاتتىڭ ءومىرىن ءبىلىمسىز ەلەستەتۋ قيىن. كەز كەلگەن سالادا ىستە, جۇمىستا ءبىلىم قاجەت. سوندىقتان ءبىلىم سالاسى قىزمەتكەرلەرىنىڭ جاۋاپكەرشىلىگى مەن ماڭىزى دا ارتا تۇسۋدە, – دەدى ەسىل اۋدانى اكىمى بەرىك جاكەنوۆ.
استاناداعى 92 گەكتار جەردى الىپ جاتقان بوتانيكالىق باقتا قارا اققايىڭ, قىزىل ۇيەڭكى, ۇشكىر جاپىراقتى ۇيەڭكى, سۋارمالى ۇيەڭكى, قاراپايىم ارشا, مانچجۋر جاڭعاعى, ءسىبىر مايقاراعايى سياقتى كوشەتتەردىڭ 33 مىڭنان اسا ءتۇرى بار. اۋدان اكىمىنىڭ سوزىنشە, جىل سوڭىنا دەيىن بوتانيكالىق باق تاعى 3 مىڭ اعاشپەن تولىعادى.
«ەسىل اۋدانى اكىمدىگىنىڭ ۇيىمداستىرۋىمەن وتكىزىلگەن شارانىڭ ماڭىزى زور. ۇستازدار اللەياسى اشىلىپ, ءبارىمىز بىرگە اعاش وتىرعىزدىق. بوتانيكالىق باق ناعىز جەلدىڭ وتىندە ورنالاسقان. جاس قايىڭدار ءوسىپ تۇر. بولاشاقتا وسكەلەڭ ۇرپاققا, تۇرعىندارعا, قالاعا كەلگەن قوناقتارعا جايلى بولۋ ءۇشىن جاسالىپ جاتقان شارا جالعاسىن تابا بەرسىن. ەلوردانىڭ كوركەيۋىنە قوسقان ۇلەسىمىز دەپ ويلايمىن. ۇستازدار كۇنى قۇتتى بولسىن! مۇعالىمدەرگە شىعارماشىلىق تابىس پەن شىدامدىلىق تىلەيمىن. وقۋشىلارىمىز تەك قانا بيىكتەن كورىنسىن. باسەكەگە قابىلەتتى ۇرپاعىمىزبەن ماقتانىپ جۇرە بەرەيىك! ەلىمىز امان, جۇرتىمىز تىنىش بولسىن!» دەپ جۇرەكجاردى تىلەگىن جەتكىزدى №88 مەكتەپ-ليتسەيىنىڭ ديرەكتورى جانات ايتوۆا.
ۇستازدىق – مەكتەپتىڭ دە, قوعامنىڭ دا, عىلىمنىڭ دا, ءبىلىمنىڭ دە, تاريحتىڭ دا, ۇلتتىڭ دا, مادەنيەتتىڭ دە, ادامگەرشىلىك پەن ەرلىكتىڭ دە, جاقسى مىنەز بەن اقىندىقتىڭ دا ناعىز جاندى وكىلى. №78 مەكتەپ-گيمنازياسىنىڭ باسشىسى جانار جۇمابەكوۆا مۇعالىمدەرىمىزدىڭ بويىنداعى سول اسىل قاسيەتتەردى بەكىتە تۇسسەك, ولار ەلىمىز مەجەلەپ وتىرعان قانداي مىندەتتەرگە بولسا دا جاس ۇرپاقتى دايىنداۋ ىسىندە ايانباي ەڭبەك ەتەدى دەيدى.
«مۇعالىمدەرگە مەملەكەتىمىز جەتكىلىكتى دەڭگەيدە كوڭىل بولەدى. ۇلى اعارتۋشى ىبىراي التىنسارين: «مەن ءۇشىن جاقسى مۇعالىم بارىنەن دە ارتىق, ويتكەنى جاقسى مۇعالىم – مەكتەپتىڭ جۇرەگى» دەسە, حاكىم اباي: «اقىرىن ءجۇرىپ انىق باس, ەڭبەگىڭ كەتپەس دالاعا, ۇستازدىق ەتكەن جالىقپاس ۇيرەتۋدەن بالاعا» دەپ ءوتتى. «پەداگوگ مارتەبەسى تۋرالى» زاڭ قابىلدانۋى, جالاقىمىزدىڭ ءوسۋى, قاعازباستىلىقتىڭ ازايۋى مۇعالىمدەردى شابىتتاندىردى. اسىرەسە, جاستارىمىز ۇستازدىقتى جۇرەك قالاۋىمەن تاڭدايدى. ۇستاز مارتەبەسى جىلدان-جىلعا وسۋدە» دەدى №78 مەكتەپ-گيمنازياسىنىڭ باسشىسى جانار جۇمابەكوۆا.
