جاقىندا پرەزيدەنت جانىنداعى ۇلتتىق كەڭەس قۇرىلىپ, ونىڭ مۇشەلەرى بەلگىلى بولدى. بۇل كەڭەستىڭ قۇرىلۋىن جۇرتشىلىق كوپتەن كۇتىپ ءجۇردى. ويتكەنى قوعامدا حالىق پەن بيلىك اراسىن جىبەك جىپتەي بايلانىستىرىپ تۇراتىن ديالوگ الاڭى قاجەت. بۇل – وركەنيەتتى ەلدەردە قالىپتاسقان ءۇردىس. سوندىقتان حالىق بۇل الاڭنان ۇلكەن ءۇمىت كۇتەدى. كەڭەس مۇشەلەرى دە ءوز سالاسىنىڭ بيىگىن باعىندىرعان بەدەلدى ازاماتتار. ەندى وسى تۇلعالار ەل ىشىندەگى وزەكتى ماسەلەلەردى مۇقيات باعدارلاپ, ءجىتى تالقىلايدى. تۇرعىنداردىڭ ايتقان ۇسىنىستارىن جەردە قالدىرماي, ورتاعا سالادى دەپ سەنەمىز. بۇل ۇلتتىق كەڭەسكە مەملەكەت باسشىسى قاسىم-جومارت توقاەۆتىڭ ءوزى جەتەكشىلىك ەتىپ وتىر. وسىدان-اق كەڭەستىڭ سالماعى زور ەكەنىن تۇسىنەمىز.
ءبىز وسى ورايدا بەلگىلى اقىن, مەملەكەتتىك سىيلىقتىڭ لاۋرەاتى نەسىپبەك ايتۇلىنىڭ ۇلتتىق كەڭەس تۋرالى پىكىرىن سۇراعان ەدىك.
– قازىر ءبىز ەكىنشى وتپەلى كەزەڭدە تۇرمىز. مۇنى كۇردەلى ۋاقىت دەپ تە ايتۋعا بولادى. بۇگىنگە دەيىن ەل دامۋىندا جەتكەن جەتىستىكتەرىمىز جەتەرلىك. سونىمەن بىرگە بارماق تىستەيتىن «اتتەگەن-ايلارىمىز» دا جوق ەمەس. شىندىعىن ايتقاندا, حالىقتىڭ بيلىككە كوڭىلى تولمايدى. مەن ۇلتتىق كەڭەسكە ەشنارسەدەن جالتاقتامايتىن, تابانىنىڭ ءبۇرى, اۋزىنىڭ دۋاسى بار جىلىكتى ازاماتتار مۇشە بولسا دەپ ويلاپ ەدىم…
بىزدە ساياساتتى سۋداي ساپىراتىن ساياساتكەرلەر كوپ. بىراق ولاردىڭ دەنى ۇلتتىڭ ءتىلى مەن قاسىرەتىن جان-تانىمەن سەزىنە بەرمەيدى. «رۋحاني جاڭعىرۋ» تۋرالى كوپ ايتامىز. بىراق ناقتى اتقارىلعان ءىس از. قازىر رۋحانياتىمىز وتە جۇدەۋ كۇيدى باستان كەشىپ وتىر. انا ءتىلىمىزدىڭ دە جاعدايى وڭىپ تۇرعان جوق. قازاق مەملەكەتى بولعاننان كەيىن قازاقتىڭ مۇددەسى بارىنەن جوعارى تۇرۋ كەرەك. سوندىقتان ۇلتتىق كەڭەستە مىنا ماسەلەلەر قارالسا دەيمىن. ءبىرىنشى – مەملەكەتتىك ءتىلدىڭ مارتەبەسى كوتەرىلسە ەكەن. ەكىنشى – ۇلتتىق مادەنيەتتى دامىتۋ كەرەك. مادەنيەتتىڭ باسىندا ۇلتتىق مادەنيەتتەن حابارى جوق ادامدار وتىر. ءۇشىنشى – دەموگرافياعا نازار اۋدارعان دۇرىس. قازىر كىسى ءولىمى كوبەيدى. ءتورتىنشى – ءدىن ماسەلەسىن شەشۋ قاجەت. بەسىنشى – حالىقتىڭ ءال-اۋقاتىن جاقسارتۋدى قولعا العان ءجون. سونداي-اق ۇلتتىق قاۋىپسىزدىك ماسەلەسى دە كۇن تارتىبىنەن تۇسپەۋ كەرەك.
