بايتاق قازاقستاننىڭ جەرى كەڭ, حالىق سانى از بولعانىمەن, ورتانىڭ لاستانۋى ءبىرشاما اۋىر دەپ ايتۋعا تولىق نەگىز بار. وسى تۇرعىدان العاندا, #Birge #TazaQazaqstan ەكولوگيانى قورعاۋ شاراسىنا ۇكىمەت باسشىسى اسقار مامين باستاعان مينيسترلەر مەن ءماجىلىس دەپۋتاتتارى, قالا اكىمى التاي كولگىنوۆ, مەملەكەتتىك قىزمەتكەرلەر جانە ۇكىمەتتىك ەمەس ۇيىمداردىڭ وكىلدەرى مەن ەرىكتى جاستار, قوعام بەلسەندىلەرىنىڭ بەلسەندى اتسالىسۋى قۋانارلىق باستاما. نۇر-سۇلتاننان باستاۋ العان بۇل يگىلىكتى شارا ەندى بۇكىل رەسپۋبليكادا جالعاسىن تاپسا يگى ەدى… 
ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ باستاماسىمەن #Birge #TazaQazaqstan ەكولوگيالىق شاراسى ۇيىمداستىرىلىپ, ەلوردا ىرگەسىندەگى قوياندى سۋ قويماسىندا جالپىحالىقتىق سەنبىلىك ءوتتى.
ەكولوگيالىق شاراعا ۇكىمەت باسشىسى اسقار مامين باستاعان مينيسترلەر مەن ءماجىلىس دەپۋتاتتارى, قالا اكىمى التاي كولگىنوۆ, مەملەكەتتىك قىزمەتكەرلەر جانە ۇكىمەتتىك ەمەس ۇيىمدار وكىلدەرى مەن ەرىكتى جاستار, قوعام بەلسەندىلەرى, مىڭنان اسا قالا تۇرعىنى قاتىستى.
– تابيعاتتى قورعاۋ, ايالاۋ – ءبارىمىزدىڭ ورتاق مىندەتىمىز. سوندىقتان بۇل باستاما قۇتتى بولسىن! وسى ەكولوگيالىق شاراعا بارلىق قازاقستاندىقتى قاتىسۋعا شاقىرامىن. بارلىق دەڭگەيدەگى اكىمدەرگە اتالعان اكتسيانى جالعاستىرۋدى تاپسىرامىن, – دەدى پرەمەر-مينيستر اسقار مامين ەكولوگيالىق شارانىڭ اشىلۋ سالتاناتىندا.
ءوز كەزەگىندە ءسوز العان ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ كۇننىڭ ىستىعى مەن دەمالىسقا قاراماستان ەكولوگيالىق شاراعا قولداۋ كورسەتىپ كەلگەن تۇرعىندارعا العىسىن ءبىلدىردى.
– الداعى ۋاقىتتا ءبىلىم جانە عىلىم مينيسترلىگىمەن بىرلەسىپ ءار مەكتەپ پەن بالاباقشادا دا ەكولوگيالىق ساعاتتار وتكىزىپ, قالدىقتى سۇرىپتاۋ جۇمىستارىن ۇيىمداستىرۋ جوسپارىمىزدا بار. سەبەبى ادام بويىنداعى تازالىق بالا كەزدەن باستالادى. بىرگە! تازا قازاقستان! – دەدى ماعزۇم مىرزاعاليەۆ.
ەستەرىڭىزگە سالساق, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ءوزىنىڭ تۆيتتەردەگى پاراقشاسىندا ەكولوگيالىق شارا وتكىزۋ باستاماسىن كوتەرىپ, وعان ەلوردا اكىمى التاي كولگىنوۆ قولداۋ كورسەتىپ, شاراعا قالا تۇرعىندارىن بەلسەندى قاتىسۋعا شاقىرعان بولاتىن. قالا اكىمى وسىنداي يگى شارانىڭ شاھار ىشىندە دە وتكىزۋدىڭ ماڭىزىنا توقتالدى.
– دەمالعاندى جاقسى كورەمىز دە, سوڭىنان جيناۋدى ەسكەرمەيمىز. بۇل دۇرىس ەمەس. تازالىق – دەنساۋلىعىمىزدىڭ كەپىلى. وسىنداي يگى شارانىڭ جالعاسقانى ءجون. كەلەسى اپتادا وسى ەكولوگيالىق شارانى قالا ىشىندە دە تۇراقتى تۇردە ۇيىمداستىراتىن بولامىز, – دەدى التاي كولگىنوۆ ءوزىنىڭ الەۋمەتتىك جەلىدەگى پاراقشاسىندا.
قوياندى سۋ قويماسىندا وتكەن شارانىڭ رەسمي اشىلۋىنان سوڭ بيلىك وكىلدەرى دە قولدارىنا قولعاپ كيىپ, قاراپايىم تۇرعىندارمەن بىرگە سۋ قويماسىنىڭ جاعالاۋىن تازالاۋعا بىلەك سىبانا كىرىستى. سونىمەن قاتار شاراعا الماتى وبلىسى تالعار اۋدانىنان ارنايى كەلگەن بەلسەندى جاستار دا قاتىسىپ, قورشاعان ورتانىڭ تازالىعىنا ءوز ۇلەستەرىن قوستى.
– بۇل – بەيرەسمي جاعدايداعى ەرەكشە شارا. سەبەبى بيلىك پەن حالىق بىرگە كۇش بىرىكتىرىپ, تابيعاتتى تازارتۋ جۇمىستارىن ءبىر ادامداي اتقارىپ جاتىر. مۇنى داستۇرگە اينالدىرۋ كەرەك, – دەدى سەنبىلىككە قاتىسقان قوعام بەلسەندىسى مۇرات ابەنوۆ تىلشىلەرگە بەرگەن سۇحباتىندا.
قالا اكىمىنىڭ ۇسىنىسىمەن بۇل ەكولوگيالىق ەستافەتا سەنبى, 27 شىلدە كۇنى ەلوردادا جالعاسىن تاپپاق. ەسىل جانە قاراسۋ وزەندەرىنىڭ جاعالاۋلارىن اينالىپ وتەتىن اۋەجايدان قاراعاندى تاس جولىنا قاراي تازارتۋ جوسپارلانىپ وتىر. شاھار باسشىسى قالا تازالىعىنا بەيجاي قارامايتىن بارلىق تۇرعىندى سەنبىلىككە قاتىسۋعا شاقىردى.
