نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن مەملەكەت جانە قوعام قايراتكەرى, ءتىل جاناشىرى ورازكۇل اسانعازىقىزىنىڭ 70 جاسقا تولۋىنا وراي «تىلەگىم – ءتىل مەرەيى» اتتى كەش ءوتتى.
نۇر-سۇلتان قالاسىندا مەملەكەتتىك ءتىلدىڭ قولدانىس اياسىن كەڭەيتۋ باعىتىندا, سونداي-اق ەلوردامىزدىڭ تاريحىندا ماڭگىلىك ساقتالاتىن ونوماستيكا سالاسىندا جۇرگىزىلگەن جۇمىستاردى ناسيحاتتاۋ, ورازكۇل اسانعازىقىزىنىڭ ءومىر جولىنداعى ەل مۇددەسى ءۇشىن جاساعان ەڭبەگىنىڭ ونەگەلى تۇستارىن كورسەتۋ ماقساتىندا وتكىزىلگەن بۇل كەشتە قازاق ءتىلىنىڭ بۇگىنى مەن كەلەشەگىنە قاتىستى كوپتەگەن اسەرلى اڭگىمەلەر ايتىلدى.
[smartslider3 slider=2378]سونىمەن قاتار, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترى ارتىستەرىنىڭ قاتىسۋىمەن تەاترلاندىرىلعان قويىلىمدار قويىلىپ, ەلىمىزگە تانىمال ونەرپازدار اننەن شاشۋ شاشتى.
كەش تىزگىنىن قازاقستان رەسپۋبليكاسى سەناتىنىڭ دەپۋتاتى, بەلىگلى جۋرناليست دانا نۇرجىگىت ۇستادى. ورازكۇل ومىرنە قانىق جۇيرىك جۋرناليست كەش يەسىن كەرەمەت اڭگىمەگە تارتىپ, انا ءتىلىمىز بەن ۇلتتىق رۋحىمىزدى وياتاتىن يگىلىكتى ىستەر جايلى تەرەڭنەن تولعاپ, تەبىرەنىسپەن قايىرىپ وتىردى. ينە شانشار جەر قالماي, تۇرەگەپ تۇرىپ كەشتى تاماشالاعان كورەرمەندەر دە كەشتەن كەرەمەت وي الىپ قايتتى.
كەش بارىسىندا ەلوردا اكىمى التاي كولگىنوۆ ارناۋلى قۇتتىقتاۋ حاتىن جىبەرىپ, كەش يەسىن مەرەي تويىمەن قۇتتىقتادى.
– بۇل كەش ماعان عانا كورسەتىلىپ وتىرعان قۇرمەت ەمەس, بۇل قازاق تىلىنە جاسالعان قامقورلىق دەپ بىلەمىن. ۇلتىمىزدىڭ ەڭ ۇلكەن بايلىعى – ول ءتىلى مەن ءدىنى. ونى ارداق تۇتۋ – بارلىق ازاماتتىڭ بورىشى. ءتىل تاۋەلسىز بولماي, سانا دا تاۋەلسىز بولمايدى. كوشە اتۋلارىن قازاقشالاۋ دا – رۋحتى وياتاتىن يگىلىكتى ءىس. ەندەشە بۇل جۇمىس جاڭا قازاقستاندا دا جاڭاشا باعىتپەن ءوز جالعاسىن تابۋى كەرەك. قازىر استانادا ارالاس ءتىلدى مەكتەپتەر كوبەيىپ كەلەدى دەپ ەستيمىن. بالامىزدى قازاق مەكتەپتەرىنە بەرمەي, قازاق ءتىلىنىڭ كوسەگەسى كوگەرمەيدى. وسىنى دا ەسكەرىڭىزدەر, – دەپ ەلوردا تۇرعىندارىنا العىسى مەن ءوتىنىشىن قوسا ءبىلدىردى.
