سولتۇستىك كاۆكاز حالقىنىڭ قازاق ەلىنە جەر اۋدارىلعانىنا 75 جىل تولىپ وتىر. جاقىندا وسى وقيعاعا وراي العىس ايتۋ كۇنى قارساڭىندا ەلورداداعى دوستىق ۇيىندە ارنايى ەسكە الۋ جيىنى ءوتتى.
«ۆايناح» شەشەن-ينگۋش ەتنومادەني ورتالىعى» ۇيىمداستىرعان ءىس-شارانىڭ باستى ماقساتى – وتكەن تاريحقا كەزەكتى رەت ءۇڭىلىپ, ەستەلىكتەردى ساقتاۋ, قازاق حالقىنىڭ كەڭپەيىلدىگىن, دارحاندىعىن, قوناقجايلىعىن كەزەكتى رەت پاش ەتە وتىرىپ, سول تۇستاعى قيىن-قىستاۋ كەزەڭدە كورسەتكەن كومەگى ءۇشىن العىس ءبىلدىرۋ.
جيىن بارىسىندا جاستار توبىنىڭ تەاترلانعان كورىنىسى مەن ارنايى ازىرلەنگەن تاريحي بەينەفيلم جۇرتشىلىق نازارىنا ۇسىنىلدى.
– اتا-بابامىزدىڭ جەر اۋدارىلىپ كەلگەنىنە 75 جىل بولدى. ال ءوزىم وسى قازاق جەرىندە تۋىپ ءوستىم, بيىل 68 جاسقا كەلىپ وتىرمىن. مۇسىلمان ءارى مىنەزى كەڭ حالىق بولعان كورگەن قيىندىقتارىمىزدىڭ جەڭىلدەۋىنە ۇلكەن كومەگىن تيگىزدى. سول ءبىر كەزەڭ قيىن-قىستاۋ ۋاقىت بولسا دا ءبىزدى وزگەلەردەن ءبولىپ-جارماي, ءبىر ءۇيدىڭ بالاسىنداي بىرگە وستىك, – دەدى تسەلينوگراد اۋداندىق دوستىق ءۇيىنىڭ باسشىسى ماگومەد سۋكالوۆ.
ايتا كەتەيىك, ءتۇرلى زەرتتەۋلەر بويىنشا 1944 جىلدىڭ 23 اقپانى مەن 9 ناۋرىز ارالىعىندا شەشەن-ينگۋش اكسر اۋماعىنان, سونداي-اق وعان ىرگەلەس جاتقان اۋدانداردان قازاقستان مەن قىرعىزستانعا شامامەن 500-650 مىڭ ادام جەر اۋدارىلعان ەكەن.
