2019 جىلعا ارنالعان استانا قالاسىنىڭ بيۋدجەتىنەن كوپبالالى جانە از قامتىلعان وتباسىلاردى قولداۋعا قوسىمشا 90 ملن تەڭگە ءبولۋ ۇسىنىلدى. جالپى قالا بيۋدجەتىن ناقتىلاۋ كەزىندە الەۋمەتتىك سالاعا قوسىمشا 1 ملرد 156,7 ملن تەڭگە باعىتتاۋ قاراستىرىلدى. كەشە قالالىق قوعامدىق كەڭەستىڭ وتىرىسىندا ستراتەگيالىق جانە بيۋدجەتتىك جوسپارلاۋ باسقارماسىنىڭ باسشىسى راسۋل ورازعۇلوۆ كەڭەس مۇشەلەرىن بيۋدجەتتەگى وزگەرىستەرمەن تانىستىردى.
كوپبالالى جانە از قامتىلعان وتباسىلاردى قولداۋ شارالارى بىرنەشە باعىتتى قامتيدى. سونىڭ ىشىندە تۇرعىن ءۇي كومەگىنە بولىنەتىن قارجى ورتاشا ەسەپپەن العاندا 18 پايىزعا ارتپاق. اتاپ ايتقاندا, بۇعان بيۋدجەتتەن قوسىمشا 33,9 ملن تەڭگە بولىنبەك. سونداي-اق ۇيدە تاربيەلەنىپ, وقيتىن مۇگەدەك بالالاردى ماتەريالدىق قولداۋعا 8 ملن تەڭگە ءبولۋ جوسپارلاندى.
«كوپبالالى وتباسىلار مەن وسىنداي وتباسىلاردان شىققان بالالاردى قولداۋ شارالارىن جالعاستىرۋ ماقساتىندا قازىرگى كەزدە قۇجاتتار پاكەتى دايىندالىپ جاتىر. ول دايىن بولعان سوڭ بيۋدجەتتى ناقتىلاۋدىڭ كەلەسى وتىرىسىنا شىعارىلادى. سەبەبى بۇل قۇجاتتى ازىرلەۋ ءۇشىن سايكەس ءنورماتيۆتى-قۇقىقتىق اكتىلەرگە وزگەرىستەردى ەنگىزۋ كەرەك. وزگەرىستەر كوپبالالى وتباسىلاردىڭ بالالارى قوعامدىق كولىكتە جەڭىلدىكپەن ءجۇرۋ ءۇشىن, ولاردىڭ دەمالىسىن ۇيىمداستىرۋ, ىستىق تاماقپەن قامتاماسىز ەتۋ ءۇشىن ەنگىزىلمەك» دەدى جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ.
وسى اپتادا وتكەن استانا اكىمى باقىت سۇلتانوۆتىڭ حالىققا ەسەپ بەرۋ كەزدەسۋىندە قالا باسشىسىنا تۇرعىندار تاراپىنان شاھاردا ينۆاتاكسي سانىن كوبەيتۋ تۋرالى تىلەك ايتىلدى. بۇعان ءتيىستى كولىكتەر سانى 23-تەن 30-عا دەيىن ارتاتىنى جايلى جاۋاپ بەرىلدى. بيىلعى بيۋدجەتتە ينۆاتاكسيگە قوسىمشا 35,5 ملن تەڭگە ءبولۋ قاراستىرىلعان ەكەن.
جالپى جۇمىسپەن قامتۋ جانە الەۋمەتتىك قورعاۋ باسقارماسىنا 463,1 ملن تەڭگە قوسىمشا بولىنبەك. سونىڭ ىشىندە قارتتار مەن مۇگەدەكتەرگە مەديتسينالىق-الەۋمەتتىك مەكەمەلەردە قىزمەت كورسەتۋ ماقساتىندا «شاراپات» مەكەمەسىنە 60 ملن تەڭگە, ەكىنشى دۇنيەجۇزىلىك سوعىستىڭ اياقتالعانىنا 74 جىل تولۋىنا جانە اۋعانستاننان كەڭەس جاۋىنگەرلەرى شىعارىلعانىنىڭ 30 جىلدىعىنا وراي اتالعان سوعىس ارداگەرلەرىنە 63,8 ملن تەڭگە ءبولۋ قاراستىرىلدى. ۇلى وتان سوعىسىنا قاتىسۋشىلاردىڭ ارقايسىسىنا 500 مىڭ تەڭگەدەن, اۋعانستان ارداگەرلەرىنە 52 725 تەڭگەدەن ءبىر رەتتىك ماتەريالدىق كومەك بەرىلمەك.
№86 مەكتەپ-گيمنازيانى كۇتىپ-ۇستاۋعا قوسىمشا 150 ملن تەڭگە ءبولۋ جانە قالاداعى مەكتەپتەر مۇعالىمدەرىنىڭ ادىستەمەلىك جۇمىستارىنا وسىنشاما قارجى قاراستىرىلعان. بيىل مەملەكەت قايراتكەرى, اقىن ساكەن سەيفۋلليننىڭ تۋعانىنا 125 جىل تولادى. تۇلعانىڭ مەرەيتويىن اتاپ ءوتۋ ءۇشىن مادەنيەت جانە سپورت باسقارماسىنا 10 ملن تەڭگە بولىنبەك.
بايقوڭىر جانە سارىارقا اۋداندارىنىڭ اكىمدىكتەرىنە تۇرعىن الاپتاردى اباتتاندىرىپ, كوگالداندىرۋعا دا قوسىمشا قارجى قاراستىرىلعان. قوعامدىق كەڭەس مۇشەلەرى الماتى مەن ەسىل اۋداندارى قوسىمشا قارجىلاندىرۋ جوسپارىندا نەگە جوقتىعىن سۇرادى. وتىرىستا بيىلعى بيۋدجەتتە الماتى اۋدانىنا باسقا اۋداندارمەن سالىستىرعاندا كوبىرەك قارجى بولىنگەنى ايتىلدى. كەڭەس توراعاسى سانسىزباي ەسىلوۆ: «بايقوڭىر اۋدانى اكىمىنىڭ بيىلعى حالىققا ەسەپ بەرۋ كەزدەسۋىنە قاتىستىم. بۇل اۋدانداعى ماسەلەلەر راسىمەن شاش ەتەكتەن. قايتا قوسىمشا قارجى رەتىندە اۋدانعا ءبولىنىپ وتىرعان 310 ميلليون تەڭگە از. اقشانى كوبەيتۋ كەرەك» دەدى. كەڭەستىڭ باسقا دا مۇشەلەرى بايانداماشى مەن وتىرىسقا قاتىسقان باسقارمالاردىڭ, اۋدانداردىڭ باسشىلارىنا بيۋدجەت بويىنشا سۇراقتار قويدى. بيۋدجەتتى ناقتىلاۋ كەزىندە قالا تۇرعىندارىن قولداۋعا قاتىستى استانا اكىمىنىڭ كەيىنگى كەزدە بەرگەن تاپسىرمالارى ەسكەرىلدى مە دەپ سۇرادى.
«وسىمەن ماسەلە بىتكەن جوق. بيۋدجەت ءالى دە ناقتىلانادى. سوندا ايتىلعان ۇسىنىستارىڭىز بەن سىن-ەسكەرتپەلەرىڭىز ەسكەرىلەدى. ءبىز باسقارمالاردان قوسىمشا قارجى بويىنشا ۇسىنىستاردى 6 اقپانعا دەيىن قابىلدادىق. وسى مەرزىمنەن كەيىن كەلىپ تۇسكەن وتىنىشتەردى ەنگىزۋدى ۇلگەرمەدىك. ارينە, قالا باسشىسىنىڭ تاپسىرمالارى ورىندالۋى ءۇشىن بيۋدجەتكە ءتيىستى وزگەرىستەر ەنگىزىلەدى» دەدى ر.ورازعۇلوۆ.
