باس قالادا باسپانا ماسەلەسىنەن بولەك, ستۋدەنتتەرگە ارنالعان جاتاقحانا جايى دا كۇن تارتىبىندە تۇر.
قازىرگى ۋاقىتتا ەلوردادا 90 مىڭعا جۋىق ستۋدەنت ءبىلىم الۋدا. ال قالاداعى 32 جاتاقحانا 14 مىڭ ستۋدەنتكە عانا ارنالعان. وسى ماسەلەنى شەشۋ ءۇشىن استانا اكىمدىگى جوعارى وقۋ ورىندارىنا جاتاقحانا قۇرىلىسى ءۇشىن 15 جەر تەلىمىن ءبولدى.
– ءۇش جىل جاتاقحانادا تۇردىم. اكە-شەشەم جۇمىس ىستەمەيدى. تابىسى جوق تۋرالى قۇجات وتكىزگەنىم ءۇشىن جىلدا ءبىر ورىن بۇيىردى. ال مەنىڭ گرۋپپالاستارىمنىڭ كوبى 1-كۋرستىڭ وزىندە-اق تۋىستارىنىڭ ۇيىندە تۇردى نەمەسە ارزان پاتەر جالداپ ءجۇردى. سوڭعى كۋرسقا جەتكەندە مەن دە جاتاقحانانى بوساتۋعا ءماجبۇر بولدىم. سەبەبى بىزدە جوعارى كۋرس ستۋدەنتتەرىنە جاتاقحانادان بولمە قاراستىرىلماعان. مەنىڭ ويىمشا, ستۋدەنت بولعان سوڭ جاتاقحانادا جاتقان وتە ىڭعايلى. ساباق ۇلگەرىمىڭ تۇراقتى بولادى, وقۋدان دا قالمايسىڭ. ال كەيبىر پاتەر جالداپ جۇرگەندەردىڭ ساباق ۇلگەرىمى جاقسى ەمەس. ويتكەنى ولار ساباقتان تىس ۋاقىتىندا پاتەراقى مەن كوممۋنالدىق تولەمدەردى تولەۋ ءۇشىن قوسىمشا جۇمىس ىستەۋگە ءماجبۇر, – دەيدى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ تۇلەگى نۇرجان جالعاسۇلى.
جالپى, بۇعان دەيىن ەلباسى ستۋدەنتتەردىڭ جاعدايىن نازاردان تىس قالدىرماي, جاتاقحانا سالۋدى تاپسىرعان ەدى. ءويت-
كەنى جوعارى وقۋ ورىندارىنىڭ, اسىرەسە 4-كۋرس ستۋدەنتتەرى بىرىگىپ پاتەر جالدايتىنى اقيقات.
ەگەر استانادا 88 مىڭ ستۋدەنتتىڭ 14 مىڭى جاتاقحانادا تۇرسا, تۇرعىن جايمەن تولىق قامتاماسىز ەتۋ ءۇشىن قوسىمشا ءالى 11 مىڭ ورىن قاجەت. پرەزيدەنتتىڭ ءۇشىنشى باستاماسى بويىنشا وقۋ ورىندارى جاتاقحانالاردى سالۋعا اكىمدىك جالپى اۋدانى 17 گەكتاردى قۇرايتىن 15 جەر ۋچاسكەسى ءبولىندى. بۇل – ءبىر عانا جولى. ماسەلەنى شەشۋدىڭ ەكىنشى جولى دا ۇسىنىلدى. ناقتى ايتقاندا, جەرگىلىكتى بيۋدجەتتەن مەملەكەتتىك-جەكەمەنشىك ارىپتەستىك تەتىگى شەڭبەرىندە حوستەلدەرگە كوللەدج ستۋدەنتتەرىن ورنالاستىرۋ. بۇل ءۇشىن ايىنا جەرگىلىكتى بيۋدجەتتەن 19 ميلليون تەڭگە بولىنەدى. ايتا كەتەرلىگى, ستۋدەنتتەر ءۇشىن دە ءتيىمدى جوبا. ايىنا پاتەر يەسىنىڭ ءبىر بولمەسى ءۇشىن 20-30 مىڭ تەڭگە تولەپ تۇرعانشا, حوستەلگە 5 مىڭ تەڭگە تولەۋ الدەقايدا جەڭىل. حوستەلگە تولەنەتىن قالعان 22 مىڭ تەڭگەنى اكىمدىك تولەپ بەرەدى. وسىلايشا 860 ستۋدەنتتىڭ وقۋ كەزىندەگى جاعدايى جاتاقحانا سالىنعانشا جەدەل شەشىلەدى.
