كەڭەستىڭ بيىلعى وتىرىسى «استانا – حالىقارالىق قارجى ورتالىعى» اتتى تاقىرىپپەن ءوتتى. ونىڭ جۇمىسىنا قازاقستان جانە شەت ەلدەر تاراپىنان كەڭەس مۇشەلەرى, ءىرى كورپوراتسيالاردىڭ, مۇددەلى مەملەكەتتىك ورگاندىڭ باسشىلارى, قازاقستاننىڭ ىسكەرلىك ورتا وكىلدەرى قاتىستى.
مەملەكەت باسشىسى جيىن باستالار الدىندا «استانا» حقو-نىڭ الەمدىك قارجى ورتالىقتارى تۋرالى اقپارات بەرىلەتىن, سونداي-اق الەمنىڭ ءىرى قالالارى مەن ىسكەرلىك ورتالىقتارىنا جەتكىزەتىن قازىرگى رەيستەردى قامتيتىن استانانىڭ حالىقارالىق اۋە قاتىناسى كارتاسى بەينەلەنگەن اقپاراتتىق-تانىستىرىلىمدىق ستەندپەن تانىسىپ شىقتى.
قازاقستان پرەزيدەنتى شاراعا قاتىسۋشىلارعا ارناعان سوزىندە كەڭەس ەڭ ماڭىزدى تاقىرىپتار جونىندەگى ديالوگ ءۇشىن اشىق الاڭعا اينالعانىن اتاپ ءوتتى
– كەڭەس ءوزىنىڭ قۇرىلعان ساتىنەن باستاپ كەڭەيە ءتۇستى, قۇرامى وزگەردى, بىراق نەگىزگى ۇستىنى ساقتالدى. مۇنى قازاقستانعا حالىقارالىق بيزنەس قوعامداستىعىنىڭ قىزىعۋشىلىعىن ارتا تۇسكەنىن, ءبىزدىڭ ەلگە ۇدايى كەلىپ جاتقان شەتەلدىك ينۆەستيتسيا اعىنىنىڭ مولايا تۇسكەنىن كورسەتەتىن زاڭدى ۇدەرىس دەپ سانايمىن, – دەدى مەملەكەت باسشىسى.
نۇرسۇلتان نازارباەۆ بيىلعى جيىن الەم ەكونوميكاسى ءۇشىن كۇردەلى كەزەڭدە ءوتىپ وتىرعانىن ايتتى.
– وزدەرىڭىز بىلەسىزدەر, جاھاندىق ەكونوميكالىق تۇراقسىزدىق جاعدايىندا بىلتىردان بەرى قازاقستان ەكونوميكاسىنىڭ ءوسىمى دە ايتارلىقتاي باياۋلادى. بۇعان ەلدىڭ نەگىزگى ەكسپورتتىق تاۋارلارى باعاسىنىڭ تومەندەۋى, نەگىزگى ساۋدا سەرىكتەستەرىمىزدىڭ ۇلتتىق ۆاليۋتالارىنىڭ السىرەۋى جانە نارىقتارداعى احۋالدىڭ ناشارلاۋى اسەر ەتتى. ءبىز دەرەۋ ەكونوميكانى جاڭا جاعدايعا بەيىمدەۋ باعىتىنداعى اۋقىمدى جۇمىستى باستاپ كەتتىك. سونىڭ الدىندا ەكونوميكانى ءارتاراپتاندىرۋدى كوزدەگەن باعىتقا, قۇرىلىمدىق رەفورمالار جۇرگىزۋگە جانە الەۋمەتتىك تۇراقتىلىقتى قامتاماسىز ەتۋگە باسا دەن قويىلدى, – دەدى قازاقستان پرەزيدەنتى.
مەملەكەت باسشىسى ساراپشىلار مەن ءبىزدىڭ ەلدە جۇمىس جۇرگىزىپ جاتقان ينۆەستورلاردىڭ بەرگەن باعاسىنا سايكەس, بۇگىندە رەسپۋبليكادا ينۆەستيتسيا ءۇشىن ءوڭىر بويىنشا ەڭ قولايلى جاعداي جاسالعانىن اتاپ ءوتتى.
– ماسەلەن, دۇنيەجۇزىلىك بانك, ەقدب, ادب, يدب سياقتى قارجى ۇيىمدارىمەن ىنتىماقتاستىق باعدارلامالارى اياسىندا تاياۋداعى 5 جىلدا كاسىپكەرلىكتى, قارجى سەكتورىن, ينفراقۇرىلىمدى, ەلەكتر ەنەرگەتيكاسىن دامىتۋ, سونداي-اق ينستيتۋتسيونالدىق رەفورمالار جۇرگىزۋ ءۇشىن ەلگە 9 ملرد دوللارعا جۋىق ينۆەستيتسيا كەلەدى. سونىمەن بىرگە يندۋستريالاندىرۋ باعدارلاماسىنا قولداۋ كورسەتۋ ءۇشىن 10 ملرد دوللارعا جۋىق كولەمدە شەتەلدىك ينۆەستيتسيا تارتىلادى, – دەدى نۇرسۇلتان نازارباەۆ.
قازاقستان پرەزيدەنتى ەىدۇ ستاندارتتارىن ەنگىزۋگە باعىتتالعان ينۆەستيتسيالىق احۋالدى جاقسارتۋ جونىندەگى جۇمىستىڭ جالعاسىپ جاتقانىنا نازار اۋداردى.
– ماسەلەن, بيىل بارلىق وڭىرلەردە ينۆەستورلارعا «ءبىر تەرەزە» قاعيداتى بويىنشا قىزمەت كورسەتۋ سەكتورلارى اشىلدى, «ينۆەستيتسيالىق ومبۋدسمەن» ينستيتۋتى, ينۆەستورلار تارتۋ ماسەلەلەرى جونىندەگى ۇكىمەتتىك جانە وڭىرلىك كەڭەستەر قۇرىلدى. ەگەر 2015 جىلى ۆيزاسىز رەجىمدەگى ەلدەر سانى 35 بولسا, 2017 جىلدان سوڭ 54-كە جەتكىزىلەدى. ينۆەستيتسيالىق جوبالاردى جۇزەگە اسىرۋ ءۇشىن قولدانىلاتىن شيكىزات پەن ماتەريالداردى يمپورتتاۋ كەزىندە قوسىلعان قۇن سالىعىنان بوساتۋ تۇرىندەگى سالىقتىق جەڭىلدىكتەر ەنگىزىلۋدە. جوعارعى سوت جانىنان داۋلاردى قاراستىرۋ ءۇشىن ءىرى ينۆەستورلاردىڭ قاتىسۋىمەن مامانداندىرىلعان القا قۇرىلىپ جاتىر. ونىڭ اياسىندا تۋىنداعان قۇقىقتىق داۋلاردى ساپالى ءارى ادىلەتتى تۇردە شەشۋ بارىسىندا شەتەلدىك ينۆەستورلاردىڭ قۇقىعى وسى القا اياسىندا جۇزەگە اسىرىلاتىن بولادى. ۇكىمەت ترانسۇلتتىق كورپوراتسيالارمەن جانە نەگىزگى ينۆەستورلارمەن بىرگە وڭدەۋ ونەركاسىبىندە, سونداي-اق ينفراقۇرىلىم, ەنەرگەتيكا جانە وزگە دە سالالاردا بىرلەسكەن كاسىپورىندار قۇرۋ جۇمىسىن جۇرگىزۋدە, – دەدى مەملەكەت باسشىسى.
نۇرسۇلتان نازارباەۆ قۇرىلىمدىق رەفورمالار اياسىندا قازاقستاندا جەكەشەلەندىرۋدىڭ جانە ەكونوميكانى مەملەكەت يەلىگىنەن الۋدىڭ جاڭا كەزەڭى باستالىپ كەتكەنىن ايتتى.
– ءبىز مەملەكەتتىڭ ەكونوميكاعا قاتىسۋ ۇلەسىن ازايتۋ جانە جەكە سەكتوردىڭ اياسىن كەڭەيتۋ جونىندە اۋقىمدى ناۋقان ۇيىمداستىرۋدى جوسپارلاپ وتىرمىز. تىزبەگە تاۋ-كەن جانە مەتاللۋرگيا, مۇناي ءوندىرۋ, ەنەرگەتيكا, كولىك جانە بايلانىس سالالارىنداعى كاسىپورىنداردىڭ مەملەكەتتىك جيىنتىق اكتسيالارى, ينفراقۇرىلىمدىق نىساندار, باسقا دا كوپ نارسە ەنگىزىلدى. قازاقستاندىق جانە شەتەلدىك ينۆەستورلارعا ادىلەتتى نارىقتىق باعا بويىنشا اكتيۆتەردى بەرۋگە قويىلاتىن شەكتەۋلەردى الىپ تاستايتىن زاڭنامالىق وزگەرىستەر قابىلداندى. قور نارىعىنا اكتسيالاردى شىعارۋ جانە اشىق ءباسساۋدا ۇيىمداستىرۋ جەكەشەلەندىرۋدىڭ نەگىزگى تەتىكتەرى بولادى. بۇل – ينۆەستورلار ءۇشىن ءوزارا ءتيىمدى ىنتىماقتاستىقتى تەرەڭدەتۋدىڭ كەرەمەت مۇمكىندىگى, – دەدى قازاقستان پرەزيدەنتى.
مەملەكەت باسشىسى بۇگىنگى پلەنارلىق وتىرىسقا «استانا – حالىقارالىق قارجى ورتالىعى» دەگەن تاقىرىپتىڭ كەزدەيسوق تاڭدالماعانىنا توقتالىپ ءوتتى.
– بايانداماشىلار ايتىپ وتكەندەي, بۇل جوبا وتە كۇردەلى جانە سونىمەن بىرگە وتە ماڭىزدى. بولاشاققا كوز جىبەرە وتىرىپ, ءبىز احقو-نى ينۆەستورلىق كاپيتال تارتۋ جانە قارجىلىق تاسىلدەر سالاسىنداعى يننوۆاتسيالار ورتالىعى رەتىندە كورگىمىز كەلەدى. ول ەۋرازيانىڭ «قارجى قاقپاسىنا» اينالۋى كەرەك. ءبىزدىڭ ەلوردامىز استانا ىسكەرلىك, مادەني جانە عىلىمي ورتالىق رەتىندە دامىپ, جاڭا اۋەجايدى قوسا العاندا, زاماناۋي حالىقارالىق كولىك-لوگيستيكا جۇيەسىنە يە بولاتىن بولادى. احقو الدىمەن مۇنداي ورتالىقتار جوق ءبىزدىڭ ءوڭىردى يگەرىپ, سوسىن بىرتىندەپ مۇمكىندىكتەرىمىزدى وزگە وڭىرلەرگە كورسەتۋگە ءتيىس, – دەدى نۇرسۇلتان نازارباەۆ.
قازاقستان پرەزيدەنتى حالىقارالىق وكىلدەردى احقو-عا تارتۋ ءۇشىن پوستكەڭەستىك كەڭىستىكتە بالاماسى جوق تەڭدەسسىز جاعدايلار جاسالىپ جاتقانىن ايتتى
– ورتالىقتىڭ قاتىسۋشىلارى مەن قىزمەتكەرلەرى سالىق تولەۋدەن بوساتىلادى. ولار ءۇشىن جەڭىلدەتىلگەن ۆيزا جانە ەڭبەك رەجىمى قولدانىلادى. جەتەكشى قارجى ورتالىقتارىمەن اراداعى تىكەلەي اۋە قاتىناسىمەن قاتار, استانا دا الەمدىك قارجى ورتالىقتارى تىزبەگىندەگى اۆياتسيالىق حابقا اينالادى دەپ ۇمىتتەنەمىز, – دەدى مەملەكەت باسشىسى.
نۇرسۇلتان نازارباەۆ احقو-دا اعىلشىن قۇقىعى قاعيداتتارىنا نەگىزدەلگەن ايرىقشا قۇقىقتىق رەجىم ورناتىلاتىنىنا نازار اۋداردى.
– ورتالىقتىڭ تاۋەلسىز سوتى جاريالىلىققا, ادىلەتتىلىككە جانە ينۆەتورلاردىڭ, بيزنەستىڭ قۇقىقتارىنىڭ قورعالۋىنا كەپىلدىك بەرەتىن بولادى. مۇندا بەدەل مەن سەنىمگە يە بولعان حالىقارالىق سۋديالار جۇمىس ىستەۋگە كەلەدى. بيزنەس احۋالىن جاقسارتۋ ءۇشىن تاۋەلسىز قارجىلىق رەتتەۋشى – احقو كوميتەتى قۇرىلادى, – دەدى قازاقستان پرەزيدەنتى.
مەملەكەت باسشىسى ورتالىقتىڭ جۇمىسىنا جوعارى بىلىكتى كاسىپقوي ماماندار تارتىلاتىنىن ايتتى.
– ءبىز ءبىلىم مەن تەحنولوگيا ترانسفەرتىن قامتاماسىز ەتەتىن تاجىريبەلى شەتەلدىك قىزمەتكەرلەرمەن قاتار, الەمنىڭ جەتەكشى ۋنيۆەرسيتەتتەرىندە, سونىڭ ىشىندە «بولاشاق» باعدارلاماسى بويىنشا ءبىلىم العان جوعارى ءبىلىمدى قازاقستاندىق مامانداردى دا كوپتەپ تارتامىز. قازىر قازاقستانعا ورالىپ, جۇمىس ىستەپ جاتقان جاستاردى ءبىز بۇل باعدارلاما بويىنشا شەت ەلدەردە وقىتىپ الدىق. بۇگىندە 40 مىڭعا جۋىق ستۋدەنتىمىز شەت ەلدەردەگى جوعارى وقۋ ورىندارىندا دايىندىقتان وتۋدە. سونداي-اق استاناداعى جاڭا حالىقارالىق ۋنيۆەرسيتەت جىل سايىن 500-دەي تاڭداۋلى ماماندى تۇلەتىپ وتىرادى, – دەدى نۇرسۇلتان نازارباەۆ.
قازاقستان پرەزيدەنتى جوعارى تەحنولوگيالىق ينفراقۇرىلىم «ەكسپو-2017» كورمەسىنىڭ ونىڭ نەگىزگى تاقىرىبىن «جاسىل» ەكونوميكانى دامىتۋعا باعىتتالعان جوبالار ارقىلى جالعاستىرۋعا مۇمكىندىك بەرەتىنىن ايتتى.
– «جاسىل» وبليگاتسيالار شىعارۋ, «جاسىل» ساقتاندىرۋ ينستيتۋتىن ەنگىزۋ, «جاسىل» بانك اشۋ – احقو اياسىندا پايدالانىلۋى ىقتيمال مۇمكىندىكتەردىڭ بىرنەشەۋى عانا. مەنىڭ ويىمشا, بۇل باعىتتى ورتالىقتىڭ اياسىندا دامىتۋدىڭ بولاشاعى زور, – دەدى مەملەكەت باسشىسى.
نۇرسۇلتان نازارباەۆ احقو قىزمەتىنىڭ ەكونوميكالىق ناتيجەلەرى تىكەلەي شەتەلدىك ينۆەستيتسيالار اعىنى ەسەبىنەن ىشكى جالپى ءونىم ءوسىمىنىڭ جەدەلدەۋى ارقىلى كورىنۋگە ءتيىس ەكەندىگىنە نازار اۋداردى.
– ەل ەكونوميكاسى ءۇشىن ورتالىق قۇرۋدان جانە ونىڭ وڭىرلىك ەكسپانتسياسىنان تۇسەتىن قورىتىندى جيىنتىق پايدا تاياۋداعى 10 جىلدا 40 ملرد دوللارعا جۋىقتاۋى مۇمكىن. بۇدان بولەك, احقو اياسىندا 2 مىڭنان استام مامانداندىرىلعان جۇمىس ورىندارىن اشۋ جوسپارلانۋدا, – دەدى قازاقستان پرەزيدەنتى.
مەملەكەت باسشىسى ورتالىقتىڭ بازاسىندا جەر قويناۋىن پايدالانۋشىلار ءۇشىن تورونتو بيرجاسى ۇلگىسىندەگى الاڭ قالىپتاستىرۋ كوزدەلىپ وتىرعانىن, وندا ءاربىر كومپانيانىڭ ءوز جوباسىن دامىتۋ ءۇشىن كاپيتال تارتۋىنا بولاتىنىن ايتتى.
– مەنىڭ ويىمشا, وسى زالدا وتىرعان كاسىپورىندار باسشىلارى بۇل يدەيانى قولدايدى. احقو-دا جاڭا قارجىلىق تەحنولوگيالاردى دامىتۋ ءۇشىن قولايلى جاعدايلار جاسالادى, ول – يكەمدى ۇيلەستىرۋشى ورتا جانە جاڭا تەحنولوگيالاردى تەستىلەۋ ءۇشىن مالىمەتتەر مەن ينكۋباتورلاردى ساراپتاۋدان وتكىزەتىن ورتالىق تۇرىندەگى زاماناۋي ينفراقۇرىلىم, – دەدى نۇرسۇلتان نازارباەۆ.
قازاقستان پرەزيدەنتى ەڭ ءبىرىنشى مىندەت ەكونوميكاعا ينۆەستيتسيا تارتۋ, وتاندىق قارجى سەكتورىن الەمدىك اۋقىمداعى باسەكەگە قابىلەتتى سالاعا اينالدىرۋ ەكەنىن اتاپ ءوتتى.
– بىلتىر مەن نيۋ-يوركتە, لوندوندا, پاريجدە, بەيجىڭدە, كاتاردا ءىرى كاسىپكەرلەرمەن كەلىسسوزدەر جۇرگىزدىم. ولاردىڭ ءبارى احقو-نى قۇرۋدى قولدادى, قازاقستانعا ينۆەستيتسيا سالۋ جانە وسىندا بيزنەس جاساۋ جونىندەگى كەلىسىمدەرگە قول جەتكىزىلدى. بۇل دا وسى جوبانىڭ پەرسپەكتيۆالى ەكەنىنە دەگەن سەنىمدى ارتتىرا تۇسەدى. شەتەلدىك سەرىكتەستەردىڭ ءبىزدىڭ وڭىرگە دەگەن قىزىعۋشىلىعىن ەسكەرە وتىرىپ, شەتەلدىك ينۆەستورلار كەڭەسى مۇشەلەرىن ورتالىقتى قۇرۋعا جانە ونىڭ جۇمىسىنا بەلسەنە قاتىسۋعا, شەت ەلدەردە ونى ىلگەرىلەتۋگە جانە شەتەلدىك قارجى ينستيتۋتتارىمەن ءوزارا ءتيىمدى قارىم-قاتىناستى جولعا قويۋعا سەپتەسۋگە شاقىرامىن, – دەدى مەملەكەت باسشىسى.
نۇرسۇلتان نازارباەۆ احقو-نى باسقارۋ جونىندەگى كەڭەسكە ءىرى كومپانيالار مەن الەمدەگى ءىرى قارجى ۇيىمدارىنىڭ ىقپالدى باسشىلارى شاقىرىلعانىن ايتتى.
– كۇنى كەشە كەڭەستىڭ ءبىرىنشى وتىرىسى ءوتتى, ونىڭ بارىسىندا ءبىز احقو-نىڭ قالىپتاسۋ پەرسپەكتيۆالارىن تالقىلاپ, ستراتەگياسىن قابىلدادىق جانە ونى دامىتۋدىڭ نەگىزگى باعىتتارىن ايقىندادىق. قازاقستان احقو اياسىندا سەرىكتەس بولۋ جونىندەگى سىزدەردىڭ بارلىق ۇسىنىستارىڭىزدى قاراستىرۋعا ءازىر. ءبىزدىڭ ىنتىماقتاستىعىمىز قازاقستاننىڭ جانە بۇكىل ءوڭىردىڭ ورنىقتى الەۋمەتتىك-ەكونوميكالىق دامۋى ءۇشىن قولايلى جاعداي قالىپتاستىرادى دەپ سەنەمىن, – دەدى قازاقستان پرەزيدەنتى.
مەملەكەت باسشىسى رەسپۋبليكامىز ءۇشىن تاياۋ ون جىلداعى نەگىزگى مىندەت ەكونوميكالىق دامۋدىڭ الەمدەگى 30 دامىعان ەلدىڭ قاتارىنا قوسىلۋ ماقساتىنا جەتۋگە مۇمكىندىك بەرەتىن مۇلدە جاڭا مودەلىن قالىپتاستىرۋ ەكەنىن ايتتى.
– قازاقستاننىڭ باسەكەلىك ارتىقشىلىقتارىن بارىنشا پايدالانۋ, ادامي كاپيتالدى دامىتۋ جانە جەكە سەكتوردىڭ باسىمدىعىنىڭ ءرولىن ارتتىرۋ قاجەت. ءبىز «ەكسپو-2017» وتەتىن ورىندا ورنالاساتىن احقو جونىندەگى ماسەلەنى تالقىلاعاندىقتان, كەلەسى كەزدەسۋ تاقىرىبىن «جاڭا ەنەرگەتيكا» دەپ اتاۋدى جانە ونى كورمە ۇيىمداستىرىلاتىن كەزدە استانادا وتكىزۋدى ۇسىنامىن, – دەدى نۇرسۇلتان نازارباەۆ.
سونداي-اق وتىرىس بارىسىندا ەۋروپا قايتا قۇرۋ جانە دامۋ بانكىنىڭ پرەزيدەنتى س.چاكرابارتي, ينۆەستيتسيا جانە دامۋ ءمينيسترى ءا.يسەكەشەۆ, «قازاقستاننىڭ شەتەلدىك ينۆەستورلار كەڭەسى» قاۋىمداستىعى باسقارماسىنىڭ توراعاسى ۋ.ۆوكۋركا, «استانا» حالىقارالىق قارجى ورتالىعىنىڭ باسقارۋشىسى ق.كەلىمبەتوۆ ءسوز سويلەدى.
بۇدان بولەك, «دجي-پي مورگان چەيز ينتەرنەشنل» كومپانياسى ديرەكتورلار كەڭەسىنىڭ توراعاسى دج.فرەنكەل, «سيتيگرۋپ» كومپانياسىنىڭ باس اتقارۋشى ديرەكتورى دج.كوۋلز, «بەيكەر ەند ماكەنزي ينتەرنەشنل» فيرماسى اتقارۋ كوميتەتىنىڭ مۇشەسى/باس ديرەكتورىنىڭ ورىنباسارى ە.شير, ERG S.a.r.l. مەنەدجەرلەر كەڭەسىنىڭ توراعاسى ا.ماشكەۆيچ, «ەرنست ەند يانگ» كومپانياسىنىڭ قارجى سەكتورى ءۇشىن كونسۋلتاتسيالىق قىزمەت كورسەتۋ جونىندەگى باسقارۋشى سەرىكتەسى د.باركەر, «دەلويت سنگ» باس اتقارۋشى ديرەكتورى ي.كوۋلبەرن كۇن تارتىبىندەگى نەگىزگى ماسەلەلەرگە قاتىستى پىكىرلەرىن ءبىلدىردى.
س.چاكرابارتي ءوز سوزىندە ەقدب ءبىزدىڭ ەلمەن ىنتىماقتاستىقتى بۇدان ءارى دامىتۋعا مۇددەلى ەكەنىن ءبىلدىردى.
– بىلتىر بانكتىڭ قازاقستان ەكونوميكاسىنا سالعان ينۆەستيتسياسىنىڭ جالپى قۇنى 700 ملن ەۆرودان استى. قازاقستان قازىرگى كەزدە ەقدب-مەن ىنتىماقتاستىق ورناتىپ وتىرعان 36 ەلدىڭ ىشىندەگى ءتورتىنشى ءىرى نارىق بولىپ سانالادى. وسى ينۆەستيتسيالاردى سالۋ ەلدە قازىر جۇرگىزىلىپ جاتقان رەفورمالاردىڭ ارقاسىندا مۇمكىن بولدى. ماسەلەن, ءتيىستى سالادا قابىلدانعان زاڭناما العاشقى جەل جانە كۇن ەلەكتر ستانسالارىنا ينۆەستيتسيا سالۋعا كومەكتەستى. سونىمەن قاتار, بانك ايەلدەر باسشىلىق ەتىپ وتىرعان كومپانيالاردى قارجىلاندىرۋ جانە ولارعا بيزنەس-كونسۋلتاتسيا بەرۋ باعدارلاماسىن ىسكە قوستى. ەقدب-نىڭ قازاقستانعا ينۆەستيتسيا سالۋ مودەلى تۇتاس ورتالىق ازيا وڭىرىندەگى ءبىزدىڭ قىزمەتىمىزدىڭ نەگىزى بولىپ سانالادى, – دەدى س.چاكرابارتي.
ەقدب باسشىسى قازاقستان باستاماشىلىق ەتكەن «استانا» حالىقارالىق قارجى ورتالىعى تۋرالى ايتا كەلىپ, ونىڭ رەفورمالار جۇرگىزۋ جانە وتاندىق قارجى سەكتورىن دامىتۋ ءىسى ءۇشىن قىزمەت ەتۋگە ءتيىس ەكەدىگىنە توقتالدى .
ۋ.ۆوكۋركا ءوز سوزىندە «قازاقستاننىڭ شەتەلدىك ينۆەستورلار كەڭەسى» قاۋىمداستىعى ەلدەگى ينۆەستيتسيالىق احۋالدى جاقسارتۋ جۇمىسىن بەلسەندى تۇردە جۇرگىزىپ جاتقانىن, بۇل رەتتە ۇزاق مەرزىمگە ارنالعان ستراتەگيالىق ماسەلەلەردى باسشىلىققا الۋعا, ءتيىستى ۇسىنىمدار ازىرلەۋگە دەن قويىپ وتىرعانىن ايتتى. وسى ورايدا ول كەڭەستىڭ قاراۋىنا سالىقتىق ءتارتىپ بۇزۋ جايتتارىن قىلمىستىق سيپاتتان ارىلتۋدى, احقو اياسىندا قالپىنا كەلتىرىلەتىن ەنەرگيا كوزدەرىنە ينۆەستيتسيا سالۋدىڭ يننوۆاتسيالىق فورمالارىن دامىتۋدى قامتيتىن بىرقاتار ۇسىنىمدار بەردى.
اقپارات اقوردا سايتىنىڭ حابارلاماسى بويىنشا دايىندالدى
