استانادا بوكستان ايەلدەر اراسىنداعى الەم چەمپيوناتى مارەسىنە جەتتى. بۇرىمدى بوكسشىلاردىڭ بايراقتى باسەكەسىندە قازاق ارۋلارى 4 التىن, 2 قولا مەدال ولجالادى. كوماندالىق ەسەپتە قازاقستان قۇراماسى ءبىرىنشى ورىن يەلەندى. بۇل – بۇرىن بولماعان تولاعاي جەتىستىك.
«استانا ارەنا» سپورت سارايىندا توعىز كۇنگە سوزىلعان ءدۇبىرلى دودانىڭ اقتىق ايقاستارىن ەڭ جەڭىل سالماقتاعى ارۋلار باستادى. شارشى الاڭنىڭ كوك بۇرىشىنا قازاقستاندىق نازىم قىزايباي كوتەرىلگەندە اتشاپتىرىم ساراي ءىشى گۋىلدەپ كەتتى. ولاي بولاتىنى وسىدان ەكى جىل بۇرىن قازاق قىزدارى اراسىنان تۇڭعىش بولىپ الەم چەمپيونى اتاعىن جەڭىپ العان نازىمنىڭ ەكىنشى رەت توپ جارۋعا مۇمكىندىگى پايدا بولعان. سوندىقتان دا جانكۇيەر قاۋىم سۇيىكتى سپورتشىسىن قىزۋ قولداۋعا كىرىستى. ال شارشى الاڭداعى ايقاسقا كەلسەك, قىتايلىق يان ۆانگ ءبىزدىڭ بوكسشىعا قارسىلىق كورسەتە المادى. نازىم ءتورت راۋندتا دا باسىمدىق تانىتىپ, تاماشا جەڭىسكە جەتتى. وسىلايشا قازاقستان سپورتىنا تاعى ءبىر تاريحي كورسەتكىش قوسىلدى. نازىم قىزايباي – ايەلدەر بوكسىنان الەمنىڭ ەكى دۇركىن چەمپيونى!
الامان جارىستا دينا جولامان ەسىمدى ارۋىمىز دا ايدى اسپاننان شىعاردى. 54 كەلى سالماقتا سىنعا تۇسكەن قازاق قىزى اقتىق ايقاستا بولگاريا ەلىنىڭ ءۇمىتىن ارقالاپ كەلگەن وتە تاجىريبەلى ستويكا پەتروۆانى تىزە بۇكتىردى. بۇل قازاقستان قۇراماسى قورجىنىنا تۇسكەن ەكىنشى التىن مەدال بولدى.
ارادا كوپ ۋاقىت وتپەي-اق قازاقستان جانكۇيەرلەرى تاعى ءبىر قۋانىشقا بولەندى. بۇل جولى 69 كەلى سالماقتا باق سىناعان استانالىق بوكسشى ۆالەنتينا حالزوۆا الەم بىرىنشىلىگىنىڭ جەڭىمپازى اتاندى. اقتىق ايقاستا قىتاي قىزى گۋ حونگپەن قولعاپ تۇيىستىرگەن ۆالەنتينا ناعىز جەڭىسكە دەگەن جىگەر تانىتتى. وزىنەن بويشاڭ قارسىلاسىنا قارسى ۇتىمدى تاكتيكا تاڭداي بىلگەن استانالىق ارۋدىڭ جەڭىسىنە ەشكىم دە كۇمان كەلتىرمەدى. الايدا جەڭىس تاعدىرى تورەشىلەردىڭ قولىندا ەكەنى بەلگىلى عوي. سوندىقتان دا جەكپە-جەك اياقتالعان ساتتەن باستاپ جانكۇيەرلەر «قازاقستان», «قازاقستان» دەپ داۋىستاپ جاتتى. ال شارشى الاڭداعى تورەشى ۆالەنتينانىڭ قولىن كوتەرگەندە كەڭ ساراي ءىشى تەڭسەلىپ كەتكەندەي بولدى. جەلبىرەگەن تۋلار, قۇشاقتاسقان جانكۇيەرلەر… وسىلايشا, قازاقستان قۇراماسى قورجىنىنا ءۇشىنشى التىن مەدال ءتۇستى. بۇل دا ەل سپورتىنىڭ تاريحىنداعى جارقىن بەلەس, جاڭا كورسەتكىش بولدى.
قازاق جانكۇيەرلەرىنىڭ جۇرەگىن تولقىتقان جەكپە-جەكتىڭ ءبىرى ءالى الدا ەدى. ەڭ اۋىر سالماقتاعى ايقاس. بۇل سىنعا تاعى ءبىر قازاق قىزى قىزدىرىنىپ جاتتى. ول – 2014 جىلعى الەم بىرىنشىلىگىنىڭ كۇمىس جۇلدەگەرى استانالىق ءلاززات كۇنگەيباەۆا بولاتىن. ونىڭ قارسىلاسى امەريكالىق شاداسيا گرين ەدى.
«رينگتىڭ كوك بۇرىشىنا ءلاززات كۇنگەيباەۆا شىعادى. قازاقستان» دەگەن داۋىس ساڭق ەتكەندە «بارىس ارەنا» سارايىندا كوتەرىلگەن داۋىستان قۇلاق تۇنعانداي بولدى. جارتىلاي فينالدا وزىنەن ءبىر باس ۇزىن ءارى قارۋلى قىتاي قىزىنان ايلاسىن اسىرعان لاززاتقا جانكۇيەر قاۋىم ابدەن ريزا بولعان ەدى. ونىڭ ۇستىنە استانالىق ارۋدىڭ قازاقستان قۇراماسى ساپىندا ونەر كورسەتە باستاعانىنا ون جىلدىڭ ءجۇزى بولىپ قالعان. تۇپتەپ ايتقاندا, تاجىريبەسى تولىسقان, الەم چەمپيوناتىنىڭ فينالىنا دەيىن جەتكەن بوكسشىنىڭ ەندىگى ماقساتى, ارينە, الەم بىرىنشىلىگىنىڭ التىن جۇلدەسى بولاتىنى ايتپاسا دا تۇسىنىكتى ەدى.
…كۇنگەيباەۆا ءبىرىنشى راۋندتان-اق وتە ساق قيمىلداپ, الدىمەن قارسىلاسىنىڭ شابۋىلىن كۇتكەندەي بولدى. ونىسىن الدىمەن جاقسىلاپ تۇرىپ قارسى الۋ سوققىسىن جاساۋدى ويلاستىردى ما دەپ جورىدىق. شىنىمەن دە سولاي بولعانداي. اقش-تىڭ دەنەلى ارۋى ايتقاندايىن بىردەن العا ۇمتىلدى. كەرەگى وسى دەگەندەي ءلاززات گريننىڭ سول شىقشىتىنان سىلق ەتكىزىپ سوقتى دا جىبەردى. تاعى بىرنەشە سوققىسىن ءدال تيگىزگەن قازاق بوكسشىسى ءبىرىنشى راۋندتى ءوز پايداسىنا شەشتى. باپكەرلەرى جاعدايدى جەتكىزىپ ايتسا كەرەك, ەكىنشى راۋند باستالىسىمەن امەريكالىق بوكسشى تاعى دا العا وڭمەڭدەي ءتۇستى. ءلاززاتتىڭ دا كۇتكەنى وسى ەدى. ءبىرىنشى راۋندتا ەسەسىن جىبەرىپ العانىنا قانى قىزعان گرين تاعى دا ءلاززاتتىڭ قارسى العان اۋىر سوققىسىنا تاپ بولدى. ءۇشىنشى كەزەڭدە تارازى باسى تەڭەسكەندەي بولعانىمەن تورەشىلەر قازاق قىزىنىڭ باسىمدىعىن انىقتادى. ال سوڭعى شەشۋشى راۋندقا ەكى بوكسشى دا ەداۋىر السىرەپ شىقتى. قالاي دەگەنمەن 81 كەلىدەن اۋىر بوكسشىلاردىڭ قيمىلى دا, سوققىلارى دا اۋىر بولاتىنى زاڭدىلىق قوي. جەڭىلىپ جاتقانىن بىلەتىن امەريكالىق بوكسشى قانشا تىرىسقانىمەن لاززاتقا شاماسى جەتپەدى. «ەندىگى ماقساتىم – الەم چەمپيونى اتانۋ» دەپ وزىنە سەرت بەرگەن قازاق بوكسشىسى ءوزىن دە, ەلىن دە ۇلكەن قۋانىشقا بولەدى.
وسىلايشا الەم چەمپيوناتىنىڭ فينالىندا قازاقستان تۋى ءتورتىنشى رەت بيىكتەن جەلبىرەپ, قالىڭ جانكۇيەر قازاق ەلىنىڭ ءانۇرانىن شىرقادى.
وسى چەمپيوناتتاعى تاعى ءبىر جەتىستىگىمىز 51 كەلى سالماقتا قولا جۇلدەگە قول سوزعان جاينا شەكەربەكوۆا بيىل جازدا ريو-دە-جانەيرودا وتەتىن جازعى وليمپيادا ويىندارىنا جولداما الدى.
سونىمەن استانا تورىندە ۇيىمداستىرىلعان ايەلدەر اراسىنداعى الەم چەمپيوناتى تاريح قويناۋىنا ءوتتى. ەڭ باستىسى, بۇل جارىس قازاق قىزدارى تورتكۇل دۇنيەنى قايران قالدىرىپ, ەل سپورتىنىڭ تاريحىنا جاڭا جارقىن كورسەتكىشتەر قوستى.
عالىم قوجابەكوۆ
