ءبىز – قازاق حالقىنا ءاردايىم ريزاشىلىقتا بولىڭدار دەپ وسيەت ەتكەندەردىڭ ۇرپاعىمىز. وتباسىندا اتا-انامىزدىڭ اقجارما سوزدەرىن كوڭىلگە توقىپ وستىك.
وسىدان ءۇش جىل بۇرىن الماتى وبلىسى, قاراتال اۋدانى, ۇشتوبە قالاسىنداعى باستوبە تاۋىنىڭ بوكتەرىندە العىس مونۋمەنتىنىڭ ىرگەتاسىن قالاعان ەدىك. «قازاق حالقىنا مىڭ العىس» دەپ قازاق, ورىس, كورەي تىلدەرىندە تاسقا قاشالىپ جازىلعان سوزدەر قازاق جەرىن مەكەندەگەن وزگە ۇلت وكىلدەرى رازىلىعىنىڭ ءبىر بەلگىسى بولدى. بۇل جەر جاي تاڭدالىپ الىنعان جوق. وسىدان 78 جىل بۇرىن قازاق جەرىنە جەر اۋدارىلعان كورەيلەردىڭ العاشقى لەگى وسى توبەنى پانالاعان ەدى. تاۋدىڭ ەتەگىندە جەرتولەلەردىڭ ورنى ءالى كۇنگە دەيىن ساقتالعان. وسى ماڭدا سۋىق پەن اشتىقتان, اۋرۋدان قىرىلعان كورەيلەر جەرلەنگەن. مۇنداي بەلگى ءولى ارۋاقتارعا دا, وسكەلەڭ ۇرپاققا دا كەرەك. قۋعىن-سۇرگىن جىلدارىنىڭ ادام توزگىسىز اۋىرتپالىعى ەشقاشان قايتالانباس ءۇشىن, وتكەنىمىز بەن بۇگىنىمىزدى زەردەلەۋگە قاجەت. بۇل ەرەن حالىقتىڭ ىزگىلىك ونەگەسىن جۇرەكتەرىمىزدە ساقتاپ, ونى كەلەر ۇرپاققا جەتكىزۋدەگى تالپىنىسىمىز ەدى.
قازاقستان حالقى اسسامبلەياسىنىڭ 22-سەسسياسىندا ەلباسى نۇرسۇلتان نازارباەۆ جۇرەگىمىزدىڭ تۇكپىرىندە جۇرگەن ويدى قوزعادى. بيىك ءمىنبەردەن ەلىمىزدەگى ءتۇرلى ۇلت وكىلدەرىنىڭ ءبىر-بىرىنە العىس ءبىلدىرەتىن ارنايى كۇنىنىڭ بولۋى ماڭىزدى دەدى. بۇل بىرىنشىدەن, قازاقستانعا تاعدىردىڭ جازۋىمەن اۋىپ كەلگەن ادامداردىڭ بۇگىنگى ۇرپاعىنىڭ قازاق حالقىنا العىس ايتۋدىڭ مۇمكىندىگىن قاراستىرادى. بۇل كۇن ۇلى حالىقتىڭ شەكسىز مەيىرىمى مەن كەڭدىگىن ۇلىقتاۋ كۇنى بولىپ تا اتالىپ وتەر ەدى. ءجۇرەكتەردى ىزگىلىك شۋاعىمەن تولتىراتىن العىس كۇنى بۇكىل ەل بولىپ اتاپ وتەتىن ايتۋلى مەرەكەگە اينالادى دەپ ويلايمىن.
رومان كيم,
ءماجىلىس دەپۋتاتى,
قازاقستان كورەيلەرى قاۋىمداستىعىنىڭ پرەزيدەنتى
