قوعامدىق كەڭەس ماقۇلدادى
استانا قالاسى قوعامدىق كەڭەسىنىڭ وتىرىسى ءوتتى. جيىندى اشقان كەڭەس توراعاسى سانسىزباي ەسىلوۆ جينالعانداردى كۇن تارتىبىندە قارالاتىن اكىمدىكتىڭ نورماتيۆتىك-قۇقىقتىق اكتىلەرىنىڭ جوبالارىمەن تانىستىرىپ ءوتتى.
ودان سوڭ «استانا قالاسى بويىنشا ەسەپتەۋ اسپاپتارى جوق تۇتىنۋشىلار ءۇشىن ەلەكترمەن جابدىقتاۋ, جىلۋمەن جابدىقتاۋ, سۋمەن جابدىقتاۋ جانە سۋ بۇرۋ, گازبەن جابدىقتاۋ بويىنشا كوممۋنالدىق كورسەتىلەتىن قىزمەتتەردى تۇتىنۋ نورمالارىن بەكىتۋ تۋرالى» استانا قالاسى اكىمدىگىنىڭ بىلتىرعى قاۋلىسىنا وزگەرىستەر ەنگىزۋ جايىندا قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆ بايانداما جاسادى. كەڭەس مۇشەلەرى ۇسىنىلعان وزگەرىستەردى تۇگەلدەي ماقۇلدادى.
ال قالالىق جۇمىسپەن قامتۋ, ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ابيلدينوۆ جينالعانداردى «استانا قالاسىندا الەۋمەتتىك-ەڭبەك سالاسىنداعى مەملەكەتتىك كورسەتىلەتىن قىزمەت رەگلامەنتتەرىن بەكىتۋ تۋرالى» قاۋلىعا ەنگىزىلەتىن وزگەرىستەرمەن تانىستىردى. سونداي-اق ول «استانا قالاسىندا الەۋمەتتىك-ەڭبەك سالاسىنداعى مەملەكەتتىك كورسەتىلەتىن قىزمەت رەگلامەنتتەرىن بەكىتۋ تۋرالى» قالالىق اكىمدىكتىڭ قاۋلىسىنا وزگەرىستەر ەنگىزۋ جوباسى جونىندە دە باياندادى. كەڭەس مۇشەلەرى بۇل جوبالاردى قولدادى.
اتالمىش باسقارمانىڭ «شەتەلدىك قىزمەتكەرگە جۇمىسقا ورنالاسۋعا جانە ءتيىستى اكىمشىلىك-اۋماقتاعى ەڭبەككە شەتەلدىك قول كۇشىن تارتۋعا رۇقسات بەرۋ جانە ۇزارتۋ» مەملەكەتتىك كورسەتىلەتىن قىزمەت رەگلامەنتىن بەكىتۋ جونىندەگى جوباسىنا دا كەڭەس مۇشەلەرى كەلىسىمدەرىن بەردى.
مەڭدوللا نۇرىمۇلى