ناۋرىز مەيرامى كەزىندە حالىق «قازاق ەلى» مونۋمەنتى الاڭىنا كوپتەپ جينالادى. دەمەك, مەرەكەنى ءمىنسىز وتكىزۋ ءۇشىن جول پوليتسياسى باسقارماسىنىڭ ينسپەكتورلارى قوزعالىستى قاۋىپسىز ءارى كەپتەلىسسىز ەتىپ ۇيىمداستىرۋى قاجەت.
«بايتەرەك» حالىقارالىق مەديا-ورتالىعىندا استانا قالالىق جپب باستىعىنىڭ ورىنباسارى قالي ايماعامبەتوۆ, ءبولىم باستىعى ارلان ايتىبەكوۆ جانە «جولاۋشىلار تاسىمالداۋ ورتالىعى» جشس باستىعىنىڭ ورىنباسارى جومارت داۋمەنوۆ جۋرناليستەرگە وسى شارۋا بارىسىن باياندادى. ايتۋلارىنشا, ءبىرقاتار جول ماگيسترالدارىنىڭ قوزعالىس سىزباسىندا اجەپتاۋىر ءوزگەرىس بولادى. ولار ءتيىستى اۋماقتا تۇراقتاردىڭ جەتكىلىكسىزدىگىن ەسكەرىپ, اۆتوكولىكتەردىڭ جينالىپ قالۋىن بولدىرماۋ ماقساتىندا قالا تۇرعىندارى مەن قوناقتارىنا جەكە اۆتوكولىكتى ەمەس, مەيلىنشە قوعامدىق كولىكتى پايدالانۋعا كەڭەس بەرىپ وتىر. ال اۆتوكولىك قوزعالىسىنىڭ ءدال مەرەكە كۇنى تاڭعى ساعات 8-دەن باستاپ ءىس-شارا اياقتالعانعا دەيىن تولىعىمەن جابىق بولاتىن جوباسى: تاۋەلسىزدىك داڭعىلى, ر. قوشقارباەۆ, سارايشىق كوشەلەرىنەن ج. ناجىمەدەنوۆ كوشەسىنە دەيىنگى, ا. بايتۇرسىنوۆ كوشەسى مەن ب. مومىشۇلى كوشەسىنەن سارىكول كوشەسىنە دەيىنگى, سارايشىق كوشەسى م1 جانە سىعاناق كوشەسى م3-تەن وباعان كوشەسىنە دەيىنگى ارالىق. ال ناۋرىزدىڭ وتكىزىلۋى بارىسىندا جۇرت ۋاقىتشا ورىنبور كوشەسى بويىنشا اينالما جولدى پايدالانا الادى.
سونىمەن قاتار, «قازاق ەلى» مونۋمەنتى الاڭىندا وتەتىن مەرەكە سالتاناتىنا بايلانىستى ساعات تاڭەرتەڭگى 9-دان كەشكى 4-كە دەيىن قولدانىستاعى №3, 4, 14, 21, 32, 40 باعدارلى اۆتوبۋستارعا قوسىمشا №2, 26, 35, 41 جانە 46 باعدارلى اۆتوبۋستاردىڭ قوزعالىس سىزباسىنا ءىشىنارا وزگەرىستەر ەنگىزىلەتىن بولدى. سول كۇنى №4, 14, 21 قوعامدىق كولىك باعىتتارى ر. قوشقارباەۆ, وباعان, ج. ناجىمەدەنوۆ كوشەلەرى ارقىلى شەكتەۋسىز جۇرە بەرەدى, ال №3, 32, 40 باعىتىنداعى اۆتوبۋستار قولدانىستاعى قوزعالىس سىزباسىمەن ا. بايتۇرسىنوۆ جانە تاۋەلسىزدىك داڭعىلى ارقىلى قاتىنايدى.
«تۋرا 22 ناۋرىز كۇنى حالىق جۇما نامازىنا كوپ جينالاتىن بولعاندىقتان, مەشىتتەرگە قاتىنايتىن قوعامدىق كولىكتەردىڭ سىزبا نۇسقاسى تۋرالى اقپاراتتاردى ءبىز تۇرعىندارعا «حازىرەت سۇلتان» مەشىتى ارقىلى تاراتتىق. مەرەكە وتەتىن ورىنعا قاتىنايتىن التى باعدارعا قوسىمشا تاعى بەس باعداردىڭ سىزبا نۇسقاسىن وزگەرتىپ, ولاردىڭ ۋاقىتىن دا ۇزارتىپ وتىرمىز. ال شارا وتكىزىلەتىن جەرلەردەن باسقا جولدار ادەتتەگى سىزبا نۇسقالارىن وزگەرتپەيدى» دەيدى جومارت داۋمەنوۆ.
بۇنىڭ ءبارى الدىن الا رەتتەلىپ بولعاننان كەيىن مەرەكە كۇندەرى ەلوردا جولدارىنداعى قاۋىپسىزدىكتى استانا قالاسىنىڭ 450-دەي جول پوليتسياسى ينسپەكتورلارى قامتاماسىز ەتپەك.
ءمولدىر حالىقوۆا
