قوياندى سۋ قويماسىنا بالىق جىبەرىلدى. ايدىنعا كۇز ايلارىندا بالىق جىبەرۋدى «جاس نۇر» وندىرىستىك-شارۋاشىلىق كاسىپورنىنىڭ ماماندارى جۇرگىزدى.
– مۇنداي شارا جەرگىلىكتى بيولوگيالىق الۋانتۇرلىلىكتى ساقتاۋ, ەكوجۇيەنى جاقسارتۋ جانە سپورتتىق-اۋەسقوي بالىق اۋلاۋدى دامىتۋ ءۇشىن قولعا الىنادى. بالىق جىبەرۋ – شارۋاشىلىقتاردا كەزەڭ-كەزەڭىمەن جۇرگىزىلەتىن شارا. ول – سۋ ايدىنىنداعى بالىقتىڭ سانىن جاساندى جولمەن رەتتەۋگە مۇمكىندىك بەرەدى.
بۇل جولى قوياندى سۋ قويماسىنا «جاس نۇر» وندىرىستىك-شارۋاشىلىق كاسىپورنىنىڭ ماماندارى جامبىل بالىق پيتومنيگىنىڭ ينكۋباتسيالىق تسەحتارىنان 90 647 دانا اق امۋر, تۇقى, موڭكە سىندى سۇرىپتى بالىقتى ايدىنعا جىبەردى, – دەيدى نۇر-سۇلتان قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى باسشىسىنىڭ ورىنباسارى جانار بەسكەمپىروۆا.
بالىق شارۋاشىلىعى عىلىمي-وندىرىستىك ورتالىعىنىڭ ۇسىنىمدارىنا ساي ايدىنعا اق امۋر سۇرىپتى بالىق كوبىرەك جىبەرىلەدى. ولار تەز كوبەيۋ قابىلەتىمەن ەرەكشەلەنەدى. ۇلكەن اق امۋردىڭ ۇزىندىعى 1 مەتر 20 سانتيمەتر بولسا, سالماعى 30-32 كەلىگە دەيىن جەتەدى. ماماندار اق امۋرلاردى شوپتەرمەن قورەكتەندىرەدى.
سول سەكىلدى ايدىنعا نارىقتا ۇلكەن سۇرانىسقا يە تۇقى بالىعى دا جىبەرىلگەن. بالىقتىڭ بۇل ءتۇرى تۇششى جانە تۇزدى سۋدا دا ءومىر سۇرە الاتىن قابىلەتىمەن ەرەكشەلەنەدى.
ايدىنعا بالىق جىبەرۋ پروتسەسى سالا ماماندارى مەن ارنايى كوميسسيا مۇشەلەرىنىڭ قاتاڭ باقىلاۋىمەن جۇزەگە اسىرىلدى.
