قىركۇيەك ايىنان باستاپ ەكسپو بيلەتتەرى قولما-قول كاسسالاردا ساتىلادى
الەم الدىندا ابىرويىمىزدى اسقاقتاتاتىن «ەكسپو – 2017» كورمەسىنە 290 كۇن قالعانى بەلگىلى. ال, كورمەگە بيلەتتەردى ونلاين-ساتۋ 10 ماۋسىم كۇنى باستالعان بولاتىن. كورمەنىڭ العاشقى بيلەتىن ونلاين-ساتۋ جۇيەسى ارقىلى استانا قالاسىنىڭ 24 جاسار تۇرعىنى ولجاس وڭالوۆ يەلەنگەن. بۇيىرتسا, قىركۇيەك ايىنان باستاپ بيلەتتەردى قولما-قول كاسسالاردان دا الۋعا بولادى.
كىرۋ قۇنى – 6000 تەڭگە
بيلەت ساتىپ العان ادام باعدارلاما بويىنشا كورمەنى تاماشالاي الادى. بەلگىلەنگەن كىرۋ قۇنى – 6000 تەڭگە. ءدال قازىر ارنايى اشىلعان tickets.expo2017astana.com سايتى ارقىلى ونلاين بيلەت ساتىپ الۋعا بولادى. ۇيىمداستىرۋشىلاردىڭ ايتۋىنشا, سوعىس ارداگەرلەرى, مۇمكىندىگى شەكتەۋلى جاندار, جەتىم بالالار مەن 6 جاسقا دەيىنگى بالالارعا كىرۋ – تەگىن. ال, زەينەتكەرلەر, كوپ بالالى انالار, ستۋدەنتتەر مەن وقۋشىلارعا جەڭىلدىكتەر جاسالادى.
بۇگىندە 89 مەملەكەت پەن 15 حالىقارالىق ۇيىم «ەكسپو-2017» كورمەسىنە قاتىسۋعا نيەت بىلدىرگەن. كورمەگە بيلەتتەردى ساتۋ كەزەڭ-كەزەڭمەن جۇزەگە اسۋدا. ماسەلەن, 10 ماۋسىم-10 شىلدە ارالىعىندا پرومو-كەزەڭ وتكىزىلدى. بۇل كەزدە بيلەتتەر بارىنشا تومەن باعامەن ساتىلدى. ال 10-20 ماۋسىم كۇندەرى ارالىعىندا ساتىلعان بيلەتتەرگە 50%, 21-30 ماۋسىمدا 30%, 1-10 شىلدەدە 20% جەڭىلدىك جاسالدى.
ازىرگە, ەلەكتروندى قانشا بيلەت ساتىلعانى تۋرالى اقپارات بەلگىسىز. بيلەت ساتۋمەن اينالىساتىن كومپانيا تامىز ايىنىڭ سوڭىندا ناتيجەسىن جاريالايدى.
تۋروپەراتورلارعا ءتيىمدى ۇسىنىس
وسىدان ءبىر اپتا بۇرىن تۋروپەروتورلار ءۇشىن ءتيىمدى ۇسىنىس قولعا الىندى. ياعني, ەلىمىزدىڭ جانە الەمنىڭ تۋروپەراتورلارى مەن تۋراگەنتتىكتەرى ءۇشىن بيلەتتەردى رەسمي الدىن الا ساتۋ كەزەڭى باستالادى. ارنايى ازىرلەنگەن كوممەرتسيالىق ۇسىنىس ءارتۇرلى بيلەتتىك پاكەتتەردەن تۇرادى. ساتىپ الىنعان بيلەتتەر سانىمەن عانا ەمەس, ۇسىنىلاتىن جەڭىلدىك كولەمىمەن دە ەرەكشەلەنەدى. مينيمالدى پاكەت 2000 بيلەتتەن تۇرسا, ماكسيمالدى پاكەت بويىنشا شەكتەۋلەر جوق.
سونىمەن قاتار, 10 تامىز كۇنى رەسمي رەسەللەرلەر بولۋدى جوسپارلاعان كورمە ارىپتەستەرى ءۇشىن دە ارنايى پروموكەزەڭ باستالدى. ولار كورمە بيلەتتەرى ارقىلى ءوز ونىمدەرىن ناسيحاتتاۋعا مۇمكىندىك الادى. كورمەنىڭ بيلەتتىك وپەراتورىنان ساتىپ الۋشى كومپانيا بيلەتپەن بىرگە قىزمەت كورسەتىپ, تاۋارىن ۇسىنا الادى. ماسەلەن, اۋەجاي بيلەتىن ساتىپ العاندا قوسىمشا ەكسپو بيلەتىن ۇسىنۋى مۇمكىن. سول سياقتى تەمىرجول بيلەتىن العاندا دا, كورمە بيلەتىن الۋعا مۇمكىندىك بولماق.
كورمەنىڭ بارلىق رەسەللەرلەرى ءۇشىن الىناتىن بيلەتتەردىڭ سانىنا بايلانىستى ءارتۇرلى پاكەتتىك ۇسىنىستار مەن جەڭىلدىكتەردەن تۇراتىن بىرەگەي ۇسىنىس ازىرلەنگەن. رەسەللەرلەرگە پروموكەزەڭدەر ۋاقىتىندا بيلەتتىك پاكەتتەرگە قوسىمشا جەڭىلدىكتەر ۇسىنىلادى.
وفلاين-كاسسالار اشىلادى
1-قىركۇيەكتەن باستاپ ەلىمىز بويىنشا وفلاين-كاسسالار اشىلادى. ۇلتتىق مەرەكەلەردى وتكىزۋ اياسىندا بيلەتتەردى كوشپەلى ساتۋ جوسپارلانعان. بۇدان باسقا, بيلەت ساتۋعا «ەكسپو-2017» سەرىكتەستەرى – «قازپوشتا», «قازاقستان تەمiر جولى», «Air Astana» سەكىلدى ءىرى كومپانيالار تارتىلادى. جالپى, بيلەتتەردى الدىن الا ساتۋ بيىلعى 10 ماۋسىمنان باستالىپ, 2017 جىلدىڭ 9 ماۋسىمىنا دەيىن جۇرگىزىلەدى.
بيلەت تۋرالى بىلگەن ءجون
ەلەكتروندى بيلەت ساتىپ الۋ ءۇشىن الدىمەن tickets.expo2017astana.com سايتىنا تىركەلىپ, بيلەتكە تاپسىرىس جاسايسىز. وزىڭىزگە قاجەت بيلەت ءتۇرى مەن سانىن تاڭداعاننان كەيىن , ەلەكتروندى تولەۋ ءتاسىلى ارقىلى بانك كارتاسىمەن ونلاين تولەيسىز. ەلەكتروندى بيلەت اۋىستىرىلمايدى, بىراق قايتارۋعا بولادى. ونى قاعاز بيلەتكە اۋىستىرۋدىڭ دا قاجەتى جوق, سەبەبى ەلەكتروندى بيلەت «قاعاز» بيلەتكە بالاما بولىپ تابىلادى.
ايتا كەتۋ كەرەك, كۇنى بەلگىلەنگەن جانە بەلگىلەنبەگەن بيلەتتىڭ ايىرماشىلىعى بولادى. كۇنى بەلگىلەنگەن بيلەت تەك سول كۇنى عانا كورمەگە كەلۋگە جارامدى. كۇنى بەلگىلىنبەگەن بيلەت بويىنشا كورمەگە كەلەر الدىن, ۋاقىتىن ءوزىڭىز تاڭدايسىز. ءبىر تاپسىرىس كەزىندە 50 بيلەت قانا ساتىپ الۋعا بولادى. كورمەگە كىرۋ كەزىندە ازاماتتاردىڭ جەكە باسىن كۋالاندىراتىن قۇجاتتىڭ بولۋى مىندەتتى.
سونداي-اق, ەكسپو-نى ءوتكىزۋ شەڭبەرىندە ءتۇرلى مادەني جانە قىزىقتى ءىس-شارالاردى قامتيتىن باعدارلامالارى ارنايى كۇندەر قاراستىرىلعان.
10 ماۋسىم – اشىلۋ كۇنى, 6 شىلدە – استانا كۇنى, 30 تامىز – كونستيتۋتسيا كۇنى جانە 10 قىركۇيەك – جابىلۋ كۇنى. بۇل كۇنگە ارنالعان بيلەتتىڭ باعاسى كۇنى بەلگىلەنگەن جانە اشىق داتالى بيلەت باعاسىنا قاراعاندا قىمباتتاۋ بولادى.
ارنايى كۇندەرگە بيلەتتەردىڭ ساتىلۋى تۋرالى اقپارات الدىن الا جاريالاناتىن بولادى.
گۇلميرا ايماعانبەت
