بۇگىن جوعارى وقۋ ورىندارى مەن كوللەدجدەردى تامامداعان تۇلەكتەر اراسىندا قازاقستاننىڭ جەتەكشى ۇيىمدارىندا تاعىلىمدامادان وتۋگە مۇمكىندىك بەرەتىن «ءساتتى قادام – تاعىلىمداما» جوباسىنىڭ ەكىنشى كەزەڭى باستالدى. ۇلتتىق كومپانيالار مەن مەملەكەتتىك ورگانداردا تاعىلىمدامادان وتۋگە نيەت بىلدىرگەن ۇمىتكەرلەرمەن تۇراقتى كوميسسيا سۇحبات وتكىزدى.
اتالعان جوبا ەلىمىزدە ءۇش جىل بويى تابىستى جۇزەگە اسىپ كەلەدى. سوڭعى جىلدارى «ءساتتى قادام» جوباسى ەكى كەزەڭ بويىنشا جۇرگىزىلدى. اتاپ ايتقاندا, ءبىرىنشى كەزەڭدە جوعارعى وقۋ ورىندارى جانە كوللەدج تۇلەكتەرىنىڭ قاتارىنداعى جەتىم بالالاردى جۇمىسقا ورنالاستىرۋ قاراستىرىلعان. ەكىنشى كەزەڭدە تاعىلىمداماعا باراتىنداردىڭ تاعدىرى شەشىلەدى.
«ءساتتى قادام» جوباسى – بۇل جوعارى وقۋ ورىندارى مەن كوللەدجدەردىڭ تۇلەكتەرى ءۇشىن ءوز مانساپ جولدارىن قازاقستاننىڭ ءىرى ۇيىمدارى, ۇلتتىق كومپانيالار, ءتۇرلى مينيسترلىكتەر مەن ۆەدومستۆولاردان تاعىلىمدامادان وتۋگە باستايتىن بىرەگەي مۇمكىندىك. جوباعا قاتىسۋشىلارعا 350 ەڭ ءىرى ۇلتتىق كومپانيا مەن مەملەكەتتىك ورگانداردا تاعىلىمدامادان ءوتۋ ۇسىنىلادى.
ۇمىتكەرلەرمەن سۇحباتتى بىرنەشە ادامنان تۇراتىن تۇراقتى كوميسسيا قابىلدايدى. ارينە, وندا قاتىسۋشىلاردىڭ ءبىلىم دەڭگەيى عانا ەمەس, ءسوز سويلەۋ شەشەندىگى, اشىقتىعى, ءبىلىم مەن جۇمىسقا ىنتاسى, ادامدارمەن قارىم-قاتىناسى دا تەكسەرىلەدى. ال ىرىكتەۋدەن وتكەن تۇلەكتەر تاعىلىمدامادان وتكەنگە دەيىن ۇجىممەن جاقسى قارىم-قاتىناس ورناتۋ ءۇشىن ءارتۇرلى تاقىرىپتاعى سەمينار-ترەنينگتەرگە دە قاتىسادى.
