قىستى شىعارىپ سالدى
«جاستار» سارايى الاڭىندا سلاۆيان حالقىنىڭ ۇلتتىق مەرەكەسى «ماسلەنيتساعا» ارنالعان ءىس-شارا ءوتتى. وعان ەلورداداعى ۇلتتىق مادەني ورتالىقتار مەن قوعامدىق بىرلەستىكتەر دە ءوز ۇلەستەرىن قوستى.
«بىرنەشە جىلدا العاش رەت مەرەكەنى كەڭ كولەمدە, اشىق الاڭدا اتاپ ءوتۋدەمىز. بۇل كۇنى ءار سلاۆيان وتباسىندا ءدامدى تاعامدار دايىندالىپ, ءبىر-ءبىرىنىڭ ۇيىنە قوناققا بارادى. ال, ءدۇيسەنبىدەن باستاپ اۋىز بەكىتەدى. بۇل دا بولسا ەلىمىزدەگى ۇلتارالىق تاتۋلىقتىڭ بەلگىسى دەپ بىلەمىن», – دەيدى كازاكتاردىڭ جەكسەنبىلىك مەكتەبىنىڭ كوركەمدىك جەتەكشىسى ناتاليا يۆانوۆا. «ماسلەنيتسا» – سلاۆيان حالىقتارىنىڭ ەرتەدەن كەلە جاتقان قىستى شىعارىپ سالىپ, كوكتەمدى قارسى الۋ مەرەكەسى. ول جەتى كۇنگە سوزىلادى. سلاۆياندار وسى جەتى كۇننىڭ ءار كۇنىن تۇرلىشە تويلاپ وتكىزەدى. بۇل مەرەكە كەزىندە ءدامدى قۇيماقتار ءپىسىرىلىپ, كورشىلەر ءبىر-ءبىرىن قوناققا شاقىرادى. كوڭىلدى ءان ايتىلىپ, بي بيلەنىپ, بارلىعى شات-شادىمان بولادى. ويتكەنى, سلاۆياندار «ماسلەنيتسانى» قالاي قارسى الساڭ, جىل بويى سولاي جۇرەسىڭ دەگەن ۇستانىمدى ۇستايدى.
ەركەجان ساتىمبەك