بولات ماجاعۇلوۆ, استانا قالاسى مادەنيەت باسقارماسىنىڭ باستىعى:
– بيىلعى ناۋرىز تويىنىڭ ەرەكشەلىگى قانداي؟
– ءار جىلدىڭ مەرەكەسى ءوز جاڭاشىلدىعىمەن ەرەكشەلەنەتىنى بار. بيىلعى باستى ەرەكشەلىك – ەلىمىزدىڭ ءار ايماعىنان كەلگەن ونەرپازدار قالا تۇرعىندارىنا مەرەكەلىك كوڭىل-كۇي سىيلاماق. بۇل كۇنى استانادا 42 مەرەكەلىك ءىس-شارا وتەدى. ونىڭ ىشىنە جەر-جەرلەردەگى بۇقارالىق ساۋىقتار, كونتسەرتتەر, كورمەلەر, دوڭگەلەك ۇستەلدەر, سپەكتاكلدەر تاعى باسقالار كىرەدى. مەرەكەنىڭ نەگىزگى ءىس-شاراسى 22 ناۋرىز كۇنى «قازاق ەلى» مونۋمەنتىنىڭ الاڭىندا وتەدى. وندا ساعات 10.00-دەن كەشكى 17.00-گە دەيىن تەاترلاندىرىلعان قويىلىمدار جانە ەلىمىزدىڭ ءار ايماعىنان كەلگەن شىعارماشىلىق ۇجىمداردىڭ مەرەكەلىك كونتسەرتتەرى ۇسىنىلادى. 21 ناۋرىز كۇنى ساعات 18.00-دە بەيبىتشىلىك جانە كەلىسىم سارايىندا ەلىمىزدىڭ ءار وبلىستان كەلگەن ونەر مايتالماندارى گالا كونتسەرت بەرەتىن بولادى.
– كونتسەرتتىك باعدارلامالارعا توقتالىپ وتسەڭىز…
– جالپى, بيىلعى تويدىڭ بازارلىعى كوپ. اتاپ ايتساق, قىزىلوردا وبلىسىنان «ديدار», «دۋداراي» ەتنو-فولكلورلىق انسامبلدەرى, پاۆلودار وبلىسىنان «توميريس», «ميراس» ۆوكالدى توبى, «ادەمى» دۋەتى ونەر كورسەتەدى. سونداي-اق, الماتى وبلىسىنان «ايجان قىز» حالىقتىق بي ءانسامبلى, سولتۇستىك قازاقستان وبلىسىنان «ارت-دۋمان» توبى كەلەدى. ال, اقمولا وبلىسىنان كەلەتىن «كوكشەتاۋ», «ون التى قىز» حالىقتىق بي انسامبلدەرى مەن «ايناكول» فولكلورلىق ءانسامبلى, «سۇڭقار» كۆارتەتى كورەرمەندەردىڭ قۇلاق قۇرىشىن قاندىرماق. «ايشا ءبيبى», «لادۋشكي» فولكلورلىق انسامبلدەرى, «قوڭىر», «الاش ۇلى» توپتارى الماتى قالاسىنىڭ اتىنان ونەر كورسەتەدى. سونىمەن قاتار, كونتسەرتتە قر ەڭبەك سىڭىرگەن مادەنيەت قايراتكەرلەرى – عازيزا جۇمەكەنوۆا, ءالمىرزا نوعايباەۆ, ابدىرەيىم ءومىروۆ, رامازان ستامعازيەۆتەر بولادى. ودان بولەك, سپورت الاڭدارىندا «قازاقشا كۇرەس», «توعىز قۇمالاق», «بۇقا تارتۋدان» سايىستار ۇيىمداستىرىلادى.
ورتالىق الاڭدا بۇقارالىق ساۋىقتار, مەرەكەلىك كونتسەرتتەر, كورمەلەر, مەرەكەلىك ساتىلىمدار ۇيىمداستىرىلادى. كەشكى ساعات 19.00-دە «قازاقستان» ورتالىق كونتسەرت زالىندا ءاليا ابىكەنوۆانىڭ «ءان گاككۋى» اتتى جەكە كونتسەرتى دە كورەرمەندەردى ءتانتى ەتەدى دەپ ويلايمىن. كەشكى 18.00-دەن 22.00-گە دەيىن ورتالىق الاڭدا جاستارعا ارنالعان بي كەشى وتەدى. وعان التىناي جوراباەۆا, اقىلبەك جەمەنەي, قايرات نۇرتاس, مارجان اراپباەۆا, «الداسپان» توبى, تاعى باسقا ونەر جۇلدىزدارى قاتىسادى. شارا سوڭىندا, ياعني, ساعات 22.00-دە مەرەكەلىك وت شاشۋ بولادى. بۇل كۇنى وتەتىن شارالاردىڭ بارلىعى قالانىڭ مادەني احۋالىنىڭ دامۋى-نا سەرپىن بەرەدى دەپ ايتا الامىن. سوندىقتان كەلىڭىزدەر, كورىڭىزدەر دەگىم كەلەدى.
ەركەجان ساتىمبەك
