قالا تۇرعىندارى ءجيى باراتىن مەكەمەنىڭ ءبىرى – زەينەتاقى تولەۋ جونىندەگى مەملەكەتتىك ورتالىق. ويتكەنى, جاردەماقى, زەينەتاقى جانە تاعى باسقا الەۋمەتتىك تولەمدەردى وسى مەكەمە تاعايىندايدى. بۇگىندە ازاماتتاردىڭ ۋاقىتىن ۇنەمدەپ, ولارعا ساپالى قىزمەت كورسەتۋدە ورتالىقتىڭ اتقارار جۇگى وراسان.
بىلتىر سول جاعالاۋدا ورىن تەپكەن «نۇرسايا» تۇرعىن ءۇي كەشەنىنە الماتى جانە ەسىل اۋداندىق بولىمشەلەرى كوشىرىلدى. سودان بەرى جۇمىس قارقىنى ءبىرشاما جەڭىلدەپ, حالىقتىڭ تالاپ-تىلەگى ورىندالدى. مۇندا الەۋمەتتىك تولەم بويىنشا مەملەكەتتىك قىزمەت الۋعا كەلەتىن ازاماتتارعا ءارى قىزمەتكەرلەرگە دە قولايلى مۇمكىندىكتەر قاراستىرىلعان. ءار ادامدى قابىلداۋعا بەرىلگەن ۋاقىتتى ساقتاۋعا مۇمكىندىك بەرەتىن ەلەكتروندى كەزەك جۇيەسى كوپتىڭ كوڭىلىنەن شىقتى. كۇتۋ زالدارىندا كەڭەسشى-مامان كەلۋشىلەرگە الەۋمەتتىك تولەم تاعايىنداۋ ماسەلەلەرى بويىنشا اقپاراتتىق مالىمەت بەرىپ وتىرادى.
– ءبىزدىڭ ورتالىق اۋقىمدى جۇمىستار اتقارادى. مەملەكەتتىك بازالىق زەينەتاقىلار, الەۋمەتتىك جاردەماقىلار جانە ەڭبەك ەتۋ قابىلەتىنەن, اسىراۋشىسىنان, جۇمىسىنان ايىرىلعاندارعا الەۋمەتتىك تولەمدەر تاعايىندايمىز. سونىمەن قاتار جۇكتىلىگىنە, بالا كۇتىمىنە بايلانىستى تولەمدەر دە وسىندا راسىمدەلەدى.
جاڭادان كوشىپ كەلگەن عيماراتىمىز كەڭ ءارى جارىق. وپەراتسيالىق زالدار سوڭعى ۇلگىدەگى زاماناۋي تەحنيكالارمەن, جۇمساق جيھازدارمەن جابدىقتالعان. مۇمكىندىگى شەكتەۋلى جاندارعا بارلىق جاعدايلار قاراستىرىلعان. ياعني, ولارعا ارنالعان پاندۋستار, ارنايى كىرۋ ەسىگى مەن كولىك قوياتىن ورىندار بار, – دەيدى «زەينەتاقى تولەۋ جونىندەگى مەملەكەتتىك ورتالىعى» دەپارتامەنتىنىڭ ديرەكتورى ساعيرا ايتاناەۆا.
قوس ورتالىققا كۇنىنە ءارتۇرلى ساۋالدارمەن 500-دەن استام ادام كەلەدى. الماتى اۋدانى بويىنشا ءبىر ايدىڭ ىشىندە 7500-دەن استام تۇرعىنعا قىزمەت كورسەتىلسە, ەسىل اۋدانى بويىنشا 4500 ادامنان قۇجات قابىلدانعان. ءىس-قۇجاتتاردىڭ بارلىعى ۋاقىتىلى وڭدەلىپ, الەۋمەتتىك تولەمدەرمەن دەر كەزىندە قامتاماسىز ەتىلگەن.
ايتا كەتكەن ءجون, تۇرعىندار ءۇشىن قىزمەت كورسەتۋ تاعى جەڭىلدەيتىن بولدى. جوعارىدا ايتىلعان الەۋمەتتىك تولەمدەر بۇدان بىلاي تەك الماتى جانە ەسىل اۋداندىق بولىمشەلەردە عانا ەمەس, سونىمەن قاتار دوستىق, ساۋران, كۇيشى دينا, ساتپاەۆ, سەيفۋللين كوشەلەرى مەن رەسپۋبليكا داڭعىلىندا ورنالاسقان حالىققا قىزمەت كورسەتۋ ورتالىقتارىندا دا راسىمدەلەتىن بولدى.
گۇلميرا ايماعانبەت
