كەشە ەلورداداعى يندۋستريالدى پارك اۋماعىندا «GLB» ءۇي قۇرىلىسى كومبيناتى اشىلدى. بۇرىن-سوڭدى قازاقستاندا وسى سالامەن اينالىساتىن تولىق تسيكلدى بىردە-ءبىر زاۋىت بولماعان. جاڭا نىساننىڭ باستى ەرەكشەلىگى دە سوندا.
«قولجەتىمدى باسپانا – 2020» باعدارلاماسى اياسىندا بوي كوتەرگەن بۇل مەكەمە ونىمدىلىك كولەمى جاعىنان بۇگىندە ەلىمىزدە ءبىرىنشى ورىندا تۇر, ال الەم بويىنشا ۇزدىك بەستىكتىڭ قاتارىنا كىرەدى. كومبيناتتىڭ اتقارۋشى ديرەكتورى دىنمۇحاممەد قۇسايىنوۆتىڭ مالىمدەۋىنشە, جوبانىڭ جىلدىق قۋاتتىلىعى 250 مىڭ شارشى مەترگە تەڭ.
– ءبىز 2017 جىلدىڭ مامىر ايىندا العاشقى تۇرعىن ءۇيدى پايدالانۋعا بەرۋدى جوسپارلاپ وتىرمىز. تۇرعىن ۇيلەرمەن قاتار, مەكتەپ, بالاباقشا, اۋرۋحانا سەكىلدى ءارتۇرلى الەۋمەتتىك وبەكتىلەر دە سالامىز. قولداعى شيكىزاتتىڭ 80 پايىزى – وتاندىق ءونىم. تسەمەنت جانە قۇم ءتارىزدى ماتەريالداردىڭ ءبارىن ءوزىمىزدىڭ استانادان الامىز, – دەدى ول.
ايتپاقشى, كومبينات قۇرىلىس قارقىنىن ارتتىرۋعا دا كومەكتەسەدى ەكەن. ياعني, تەمىربەتون بۇيىمدارىن وسى زاۋىتتا شىعارۋ ارقىلى قۇرىلىس مەرزىمى 2-3 ەسە ازايماق. ءماسەلەن, وسى كەزگە دەيىن 2-2,5 جىلدا تۇرعىزىلعان ۇيلەر ەندىگى ۋاقىتتا نەبارى 6-9 ايدا-اق داپ-دايىن بولادى. دەمەك, باعا دا تومەندەيدى. ماماندار بولجامىنا سۇيەنسەك, ءۇي قۇرىلىسى كومبيناتى تۇرعىن ۇيلەر قۇنىن كەمىندە 20 پايىزعا ارزانداتۋعا مۇمكىندىك بەرەدى.
قازىرگى تاڭدا اتالمىش زاۋىتتا قاسبەتتىك قۇرال-جابدىقتار مەن قابىرعالىق پانەلدەردەن باستاپ جابىندىق پليتالار, ليفتىلىك شاحتالار, باعانالار سياقتى بۇيىمدار وندىرىلەدى.
بوتاگوز ماراتقىزى
