استانا قالاسىن EXPO 2017 حالىقارالىق مامانداندىرىلعان كورمەسىنە دايىنداۋدا استانا كونۆەنشن بيۋروسى اۋقىمدى جۇمىستاردى باستاپ كەتتى. بۇل مەكەمە وتكەن جىلى استانا قالاسىنىڭ ينۆەستيتسيالار جانە دامۋ باسقارماسى جانىنان قۇرىلعان بولاتىن. ەلوردانىڭ تۋريستىك سەكتورىن جوسپارلاۋ, دامىتۋ جانە جىلجىتۋ بويىنشا نەگىزگى ۇيىم سانالاتىن مەكەمە ىشكى ينۆەستيتسيالار ەسەبىنەن قالا ەكونوميكاسىن نىعايتۋدى كوزدەيدى.
بۇگىندە ىسكەرلىك ءتۋريزمدى دامىتۋ ماقساتىندا حالىقارالىق اۋەجايدا, تەمىرجول ۆوكزالى مەن «حان شاتىر» سوو-دا اقپاراتتىق كيوسكىلەر ورناتىلعان. وسى ۋاقىتقا دەيىن وعان 5000-عا
جۋىق ءوتىنىش تۇسسە, ونىڭ تەڭ جارتىسى شەتەلدىك قوناقتاردان كەلگەن. پايدالى اقپارات بەرەتىن تاقتالار قازاق, ورىس جانە اعىلشىن تىلىندە قىزمەت كورسەتەدى.
ال, استانا كۇنى قارساڭىندا Hop-on/Hop-off جۇيەسىمەن جابدىقتالعان ەكسكۋرسيالىق اۆتوبۋستار پايدالانۋعا بەرىلمەك. قالا تۇرعىندارى مەن قوناقتارىنا ىڭعايلى تۋريستىك ينتەرنەت-پورتال مەن Astana Guide موبيلدىك قوسىمشاسى ىسكە اسىرىلادى.
– سايت پەن موبيلدىك قوسىمشانىڭ ەرەكشەلىگى سول, قالانىڭ كورىكتى جەرلەرىن 3D ارقىلى ۆيرتۋالدى ساياحاتتاۋعا مۇمكىندىك بەرەدى. بۇعان قوسا جىل سايىن شىعاتىن Astana Official Guide جۋرنالى ماڭىزدى دەگەن اقپارات انىقتامالىعىن ۇسىنادى. قىزمەت كورسەتۋدىڭ ساپاسىن ارتتىرۋ ءارى كەڭەيتۋ ماقساتىندا «Recommended by EXPO» جوباسى دۇنيەگە كەلدى. مۇندا قوناقۇيلەر, حوستەلدەر, قوعامدىق تاماقتانۋ ورىندارى, قىزمەت كورسەتۋ مەكەمەلەرى جانە ترانسپورتتىق كومپانيالار توپتاستىرىلعان, – دەيدى «استانا كونۆەنشن بيۋرو» جشس ديرەكتورى سانيار ايتەكەنوۆ.
ۇيىمنىڭ تاعى ءبىر قولعا العان باعىتى – حالىقارالىق بايلانىستى دامىتۋ. قازىرگى ۋاقىتتا استانا قالاسى شەتەلدىك 28 مەملەكەتپەن, سونىڭ ىشىندە 26 استانامەن ۇزاقمەرزىمدى كەلىسىمگە كەلۋ تۋرالى مەموراندۋمعا قول جەتكىزگەن. وسىعان بايلانىستى, ءتۋريزمدى دامىتۋ ماقساتىندا بيىل استانا قالاسىندا جەتەكشى تۋروپەراتورلاردىڭ, بلوگەرلەر مەن شەتەلدىك باق وكىلدەرىنىڭ قاتىسۋىمەن اقپاراتتىق تۋرلار ۇيىمداستىرىلماق.
«استانا كونۆەنشن بيۋرو» جشس مالىمەتىنە سۇيەنسەك, EXPO 2017 حالىقارالىق مامانداندىرىلعان كورمەسى قارساڭىندا «ەكسپو لاگەر» قۇرىلىسى بوي كوتەرمەك. 9 مىڭ ادامعا لايىقتالعان لاگەر قازاقستاننىڭ ءار وڭىرىنەن كەلگەن وقۋشىلار مەن ستۋدەنتتەرگە ارنالماقشى.
گۇلميرا شارحانقىزى
