كەشە استانا قالاسى قوعامدىق كەڭەسىنىڭ وتىرىسىندا باس قالاداعى 2018-2027 جىلعا دەيىنگى رەنوۆاتسيا باعدارلاماسى تالقىلاندى. بۇل جوبانىڭ نەگىزگى ماقساتى – استانانىڭ ەسكى بولىگىندەگى قۇرىلىستاردى كەشەندى تۇردە رەكونسترۋكتسيالاۋ ارقىلى زاماناۋي ساۋلەتتىك كەلبەتىن قالىپتاستىرۋ.
بۇعان دەيىن جۇرگىزىلگەن رەنوۆاتسيانىڭ ءبىرىنشى كەزەڭىندە 2280 گەكتار اۋماقتاعى نىساندار بۇزىلىپ, ول جەرگە جاڭادان 5,2 ملن شارشى مەتر تۇرعىن ءۇي سالىندى. 20 جىلدا كەنەسارى كوشەسىندەگى, سلوبودكا اۋدانىنداعى جانە كومسومول كەنتىندەگى ساياجايلار مەن تۇرعىن ۇيلەر بۇزىلدى. ول جەرلەردە تۇرعىن ۇيلەردەن بولەك, جاڭا كوشەلەر سالىندى, جەلىلەر تارتىلدى. سونىڭ ىشىندە ءبىرىنشى كەزەڭنىڭ شەڭبەرىندە 2013 جىلدان بەرى اپاتتىق ۇيلەردى بۇزۋ باعدارلاماسى دا جۇزەگە اسىرىلدى. بۇل باعدارلاما ناتيجەسىندە قالانىڭ ەسكى بولىگىندەگى 228 اپاتتى ۇيلەر بۇزىلىپ, 3,5 مىڭنان اسا تۇرعىندار جاڭا, جايلى ۇيلەرگە قونىس اۋداردى.
2018-2027 جىلدارعا جوسپارلانعان رەنوۆاتسيانىڭ ەكىنشى كەزەڭىندە 1350 گەكتار جەردەگى ەسكى عيماراتتاردى بۇزۋدى قاراستىرادى. بۇل جۇمىس ءۇش كەزەككە بولىنگەن. ءبىرىنشى كەزەكتە 570 گەكتار (2018-2020 جىلدار), ەكىنشى كەزەكتە 680 گەكتار (2021-2025 جىلدار) جانە ءۇشىنشى كەزەكتە 100 گەكتار (2025-2027 جىلدار) جەردەگى نىسانداردى بۇزۋ قاراستىرىلعان. بوساتىلعان اۋماقتاردا مىناداي الەۋمەتتىك ماڭىزى زور نىساندار بوي كوتەرەدى: 14 مەكتەپ, 34 بالاباقشا جانە 3 مەديتسينالىق مەكەمە. رەنوۆاتسيا پروتسەسىن كەزەڭ-كەزەڭمەن جۇزەگە اسىرۋ ءۇشىن قالانىڭ اۋماعى 14 ۋچاسكەگە بولىنگەن. ايتارلىعى, جوبادا اسان قايعى كوشەسىمەن شەكتەسەتىن اۋماقتا جۇرگىزىلەتىن رەنوۆاتسيانىڭ ءبىرىنشى كەزەڭى بۇگە-شىگەسىنە دەيىن جوسپارلانعان. اتاپ ايتساق, بۇزىلاتىن نىسانداردىڭ ءتىزىمى ناقتىلانىپ, ەسكى عيماراتتاردى بۇزۋعا جانە جەر ۋچاسكەلەرىن ساتىپ الۋعا جۇمسالاتىن قاراجات دالمە-ءدال ەسەپتەلگەن. سونىمەن قاتار, كولىكتىك-ينجەنەرلىك ينفراقۇرىلىم سالۋ بويىنشا ۇسىنىستار دايىندالىپتى. 2022 جىلعا دەيىن 600-دەن اسا اپاتتى ۇيلەردىڭ تۇرعىندارىن باسقا جەرگە كوشىرىپ, 420 مىڭ شارشى مەتر باسپانا سالۋ جوسپارلانعان. باسقوسۋعا توراعالىق ەتكەن استانا قالالىق قوعامدىڭ كەڭەسىنىڭ جەتەكشىسى سانسىزباي ەسىلوۆ اسان قايعى كوشەسىنىڭ بويىندا ورنالاسقان بەيىتتەرگە قاتىستى تۇيتكىلدى ماسەلەنى كوتەردى.
