«رۋحاني جاڭعىرۋ» ساراپشىلارى الداعى پارلامەنت ءماجىلىسى دەپۋتاتتارىن سايلاۋعا بايلانىستى پىكىرلەرىن ءبىلدىردى
مەملەكەت باسشىسى قاسىم-جومارت توقاەۆ قر پارلامەنتى ءماجىلىسى دەپۋتاتتارىنىڭ كەزەكتى سايلاۋىن تاعايىنداۋ تۋرالى جارلىققا قول قويدى. پارتيالىق تىزىمدەر بويىنشا سايلاناتىن پارلامەنت ءماجىلىسى دەپۋتاتتارىنىڭ كەزەكتى سايلاۋى 2021 جىلعى 10 قاڭتاردا وتەدى, ال كەلەسى كۇنى قازاقستان حالقى اسسامبلەياسى سايلايتىن پارلامەنت ءماجىلىسى دەپۋتاتتارىنىڭ كەزەكتى سايلاۋى وتەدى.
«رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ ساراپشىلارى ەل بولاشاعى ءۇشىن ماڭىزدى سانالاتىن پارلامەنت ءماجىلىسى دەپۋتاتتارىنىڭ الداعى سايلاۋىنىڭ ماڭىزدىلىعى تۋرالى ايتىپ بەردى.
«رۋحاني جاڭعىرۋ» باسقارماسى توراعاسىنىڭ ورىنباسارى, ساياسي عىلىمدار دوكتورى اسەم قايداروۆانىڭ پىكىرىنشە, الداعى سايلاۋ بۇعان دەيىنگىلەردەن تۇبەگەيلى وزگەشە بولادى.
«ءماجىلىس دەپۋتاتتارىن سايلاۋ ەلدەگى ازاماتتىق قوعامنىڭ بەلسەندىلىگىنىڭ ارتۋىمەن سايكەس كەلىپ تۇر. بۇل الداعى سايلاۋ بۇرىنعىعا قاراعاندا وزگەشە بولاتىنىن كورسەتەدى. قازاقستاندىق قوعام دا بۇدان وڭ وزگەرىستەردى كۇتەدى. جاڭا ۇردىستەر, جاڭا باعىت, ەلدەگى وزگەرىستەر, جالپى وسىلاردىڭ بارلىعى سايىپ كەلگەندە جاڭا جارقىن باستامالارعا جول اشادى, – دەدى اسەم قايداروۆا.
قاسىم-جومارت توقاەۆ ءوزىنىڭ حالىققا ۇندەۋىندە وسىناۋ قيىن-قىستاۋ كەزەڭدە قازاقستاننىڭ الدىندا ۇلكەن مىندەتتەر تۇرعانىن اتاپ ءوتتى. ناقتى ايتقاندا, داعدارىسقا قارسى ءتيىمدى شارالاردى قابىلداۋ, تۇراقتى ەكونوميكالىق دامۋدى قامتاماسىز ەتۋ, ازاماتتاردىڭ الەۋمەتتىك ءال-اۋقاتىن ارتتىرۋ جانە حالىقتىڭ جاعدايىن جاقسارتۋ مىندەتتەرى تۇرعانىن ايتتى. ءوز كەزەگىندە, الەۋمەتتانۋ عىلىمدارىنىڭ دوكتورى, تالداۋ جانە ادىستەمەلىك قامتاماسىز ەتۋ باسقارماسىنىڭ باسشىسى ءلاززات نۇرقاتوۆا الداعى سايلاۋ قازاقستاننىڭ دەموركاتيزاتسيانى بەرىك ۇستاناتىندىعىنىڭ دالەلى بولىپ, ساياسي ينستيتۋتتاردىڭ جاڭعىراتىندىعىنا سەنىمدى.
«مەملەكەت باسشىسى اتاپ وتكەن «ءۇش كيت» – پارلامەنتتىك وپپوزيتسيا ينستيتۋتى, ايەلدەر مەن جاستارعا ارنالعان پارتيالىق تىزىمدەردەگى 30 پايىزدىق كۆوتا جانە پارتيالىق تىزىمدەر بويىنشا ماسليحاتتارعا سايلاۋ ەلدىڭ ساياسي جۇيەسىنىڭ جاڭارۋىن قامتاماسىز ەتۋى ءتيىس. جاڭا باستامالار پارتيالارعا ءوز پوزيتسيالارىن نىعايتۋ ءۇشىن قوسىمشا مۇمكىندىكتەر بەرەدى دەپ ەسەپتەيمىن», – دەيدى ءلاززات نۇرقاتوۆا.
سونداي-اق, 2021 جىلعى سايلاۋعا قاتىستى «رۋحاني جاڭعىرۋ» باعدارلاماسى جوبالار باسقارماسىنىڭ باسشىسى, PhD دوكتورى دۋمان جامپەيىسوۆ تە ءوز پىكىرىن ءبىلدىردى. ونىڭ ايتۋىنشا, ساياسي جاڭعىرتۋ شارالارى وزەكتى زاماناۋي سىن-قاتەرلەرگە دەر كەزىندە جاۋاپ بولىپ تابىلادى.
«پارلامەنت ءماجىلىسىنىڭ دەپۋتاتتارىن زاڭنامانىڭ جاڭا نورمالارىنا سايكەس سايلاۋ قازاقستاننىڭ الەمنىڭ دامىعان 30 ەلىنىڭ قاتارىنا كىرۋگە ۇمتىلۋىنىڭ ايقىن كورسەتكىشى. ساياسي جاڭعىرۋ, كوپپارتيالىقتى دامىتۋ جانە ەلىمىزدىڭ قوعامدىق-ساياسي ومىرىنە ازاماتتىق قوعامنىڭ بەلسەندى ارالاسۋى قازىرگى زامانعى وزەكتى سىن-قاتەرلەردىڭ الدىن الادى», – دەپ اتاپ ءوتتى دۋمان جامپەيىسوۆ.
«رۋحاني جاڭعىرۋ» ققدي وتباسى ينستيتۋتىن زەرتتەۋ ورتالىعىنىڭ تالداۋشىسى ايگەرىم ءاشىموۆانىڭ پىكىرىنشە, بۇگىندە ءبىرىنشى كەزەكتە ەلىمىزدەگى الەۋمەتتىك-ەكونوميكالىق رەفورمالاردى زاڭنامالىق تۇردە ساپالى ەتكەن ءجون.
«بۇگىندە الەمدىك ەكونوميكالىق داعدارىس جاعدايىندا ەلىمىز دەرەۋ شەشىلۋى ءتيىس بىرقاتار ماسەلەلەرگە تاپ بولىپ وتىر. الداعى پارلامەنت ءماجىلىسى دەپۋتاتتارىنىڭ سايلاۋى دەموكراتيالىق تۇردە ءوتىپ, ەلىمىزدىڭ ساياسي جۇيەسىنىڭ جاڭارۋىن قامتاماسىز ەتەدى دەپ ويلايمىن. پرەزيدەنت اتاپ وتكەندەي, ءبىزدىڭ مەملەكەتىمىزدىڭ باستى ميسسياسى – قازاقستاننىڭ گۇلدەنۋى جانە ءاربىر ازاماتتىڭ ءال-اۋقاتىنىڭ جاقسارۋى. ول ءۇشىن ارقايسىمىزدىڭ بويىمىزدا پاتريوتيزم مەن جاۋاپكەرشىلىك جوعارى دەڭگەيدە بولۋى ءتيىس», – دەپ قورىتىندىلادى ءسوزىن ايگەرىم ءاشىموۆا.
ال ءوز كەزەگىندە «جاستار» عزو ديرەكتورى ايان ساكوشەۆ ءماجىلىس پەن ماسليحاتتارعا لايىقتى ادامداردىڭ كەلگەنى ماڭىزدى ەكەندىگىن ايتتى.
«پرەزيدەنت اتاپ وتكەندەي, الداعى سايلاۋدا – ەلدەگى ساياسي ينستيتۋتتاردىڭ جاڭعىرۋى ارقىلى مەملەكەتىمىزدىڭ ساياسي جۇيەسى دە جاڭارۋى ءتيىس. بۇگىندە قازاقستان ءۇشىن ءماجىلىس پەن ماسليحاتتارعا بىلىكتىلىگى زور جانە مەن تاجىريبەسى تولىسقان ادامداردىڭ كەلىپ, حالىقتىڭ مۇددەسىن قورعاۋى ماڭىزدى», – دەدى ساقوشەۆ.
ايتا كەتەيىك, الداعى پارلامەنتتىك سايلاۋ 2004 جىلدان باستاپ العاش رەت كونستيتۋتسيالىق مەرزىمدە وتەدى. 2007, 2012 جانە 2016 جىلدارداعى سايلاۋلار مەرزىمىنەن بۇرىن وتكىزىلگەن.
