نۇر-سۇلتان قالاسى اكىمىنىڭ ورىنباسارى اسحات ورالوۆتىڭ توراعالىعىمەن ءبىلىم بەرۋ ۇيىمدارىنداعى قاۋىپسىزدىك شارالارى, سانيتارلىق نورمالاردىڭ ساقتالۋى جانە COVID-19-دىڭ الدىن الۋ جانە ونىڭ تارالۋىنا جول بەرمەۋ ماقساتىندا ونلاين-كەزدەسۋ ءوتتى.
جيىن بارىسىندا تەحنيكالىق جانە كاسىپتىك ءبىلىم بەرۋ ۇيىمدارىنىڭ باسشىلارىمەن عيماراتتاردا جانە وعان جاقىن اۋماقتاردا سانيتارلىق قاۋىپسىزدىكتى قامتاماسىز ەتۋ, ىشكى جانە سىرتقى بەينەباقىلاۋ جۇيەلەرىن تولىعىمەن پوليتسيا دەپارتامەنتىنىڭ جەدەل باسقارۋ ورتالىعىنا قوسۋ جانە COVID-19-دىڭ الدىن الۋ ءارى ونىڭ تارالۋىنا جول بەرمەۋ ماقساتىندا كۇندەلىكتى سانيتارلىق-پروفيلاكتيكالىق شارالاردى كۇشەيتۋ ماسەلەلەرى تالقىلاندى.
نۇر-سۇلتان قالاسى اكىمىنىڭ ورىنباسارى اسحات ورالوۆ ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ جانە كوروناۆيرۋستىق ينفەكتسيانىڭ تارالۋىن بولدىرماۋ ءۇشىن سانيتارلىق-ەپيدەميولوگيالىق تالاپتاردىڭ ساقتالۋى باستى مىندەت ەكەنىن ايرىقشا اتاپ ءوتتى.
«ۇجىمدىق يممۋنيتەتتى قالىپتاستىرۋ وتە ماڭىزدى. قازىرگى ۋاقىتتا قالا تۇرعىندارىنىڭ 68 پايىزدان استامى كۆي-عا قارسى ۆاكتسينانىڭ ءبىرىنشى كومپونەنتىن الدى. تولىق يممۋنداۋدان 405 مىڭ ازامات ءوتتى. بۇگىندە ەلوردادا ۆاكتسيناتسيا پۋنكتتەرى 36 مەديتسينالىق مەكەمەدە, 5 ساۋدا ورتالىعى مەن تەمىرجول ۆوكزالدارىندا جانە نۇرسۇلتان نازارباەۆ حالىقارالىق اۋەجايىندا ۇيىمداستىرىلعان. بۇل شارالاردىڭ ءبارى حالىققا ەكپە الۋعا ىڭعايلى بولۋ ءۇشىن قابىلدانىپ جاتىر» دەدى ا.ورالوۆ.
جيىن بارىسىندا ءبىلىم بەرۋ ۇيىمدارىنداعى Ashyq قوسىمشاسى تالاپتارىنىڭ ساقتالۋى جانە قىزمەتكەرلەردىڭ ۆاكتسينالانۋ ستاتۋسى, دەزينفەكتسيالاۋ رەجيمىنىڭ ورىندالۋى, ماسكا رەجيمى جانە الەۋمەتتىك قاشىقتىقتىڭ ساقتالۋىن قامتاماسىز ەتۋ جايى تالقىلاندى. سول سياقتى وقۋ پروتسەسىندە ستۋدەنتتەرگە كوروناۆيرۋستان قورعاۋ جۇيەلەرى, ياعني تەرمومەترلەردى, رەتسەركۋلياتورلاردى, سانيتايزەرلەردى جانە جەكە قورعانىس قۇرالدارىن قولدانۋدىڭ ماڭىزدى ەكەنىنە نازار اۋدارتۋ, جاتاقحانالاردا ەپيدەمياعا قارسى شارالار كەشەنىن تۇراقتى جۇرگىزۋ, تۇرعىن جايلاردى ۇنەمى جەلدەتۋ, جاتاقحانالاردا تۇراتىنداردىڭ بايلانىسىن بارىنشا ازايتۋ ماسەلەلەرى تالقىلاندى. وسىعان بايلانىستى ءبىلىم بەرۋ ۇيىمدارىنىڭ اكىمشىلىگىنە قاۋىپسىزدىكتى قامتاماسىز ەتۋ جانە ينفەكتسيانىڭ تارالۋىن بولدىرماۋ شارالارىن كۇشەيتۋ تاپسىرىلدى. ءتيىستى تەكسەرۋلەردى قالالىق سانيتارلىق-ەپيدەميولوگيالىق قىزمەتتەر ءارى قاراي دا جالعاستىرادى.
