وتباسىلىق جانجالدارعا بايلانىستى كومەك سۇراپ 102-گە قوڭىراۋ شالاتىنداردىڭ قاراسى قالىڭ. ولاي دەيتىنىم, شاڭىراق شايقاسى «ۇلى وتان سوعىسىنا» ۇلاسىپ تۇرعان جايى بار. ماسەلەن, نۇر-سۇلتان قالاسى پوليتسيا دەپارتامەنتىنىڭ مالىمەتى بويىنشا جەدەل شاقىرتۋ ارناسىنا اپتا سايىن ەلوردالىق تۇرعىنداردان وتباسىلىق جانجالعا بايلانىست ى 300-دەن استام ارىز-شاعىم تۇسەدى. ەسىرگەن ەركەكتەردىڭ ءبىرى – ايىپپۇل تولەيدى, ءبىرى – ۋاقىتشا قاماۋ يزولياتورىنا جىبەرىلەدى… تەك ۇيدە بولعان كەرىس ءۇشىن كەشىرىم جوق. ەرلى-زايىپت ى – ەكى تاراپ ءوزارا تاتۋلاسسا دا, ءبارىبىر ايىپپۇل تولەيسىز.
ىدىس-اياق سىلدىرلامايتىن ءۇي بولا ما؟! ۇرىس دەگەن – ۇرى يت, بەرەكەڭدى قاشىرىپ, «سۇعاناق» بولماي تۇرا ما؟ شاڭىراقتا شۋ-شۇرقان شىقسا, بىردەن سىرتقا «وت» الا جۇگىرمەس ءۇشىن جاقسىلاپ تۇرىپ ويلانعان ءجون. ايتپەسە, ءىس ناسىرعا شاۋىپ, وتباسىنداعى ارازدىق پەن الاۋىزدىقتىڭ سوڭى ەش جاقسىلىققا اپارمايدى, ءابۇيىر اپەرمەيدى. سوسىن ارقا ەتىڭ ارشا, بورباي ەتىڭ بورشا بولىپ تاپقان-تايانعان تيىنىڭدى بالا-شاعاڭنىڭ اۋزىنان جىرىپ, ايىپپۇل ارقالايسىڭ, وتباسىلىق قورجىندى ورتالايسىڭ. ەشكىمنىڭ ەشتەڭەسى كەتپەيدى. ءتارتىپ ساقشىسى بار بولعانى ءوز مىندەتىن مۇلتىكسىز ورىندايدى. ودان وكىمەتتىڭ قالتاسى «قالىڭدايدى»… ايتپاعىمىز, 102 قابىلداعان اۋىزشا ارىزىن قايتارىپ الا الماي تالاي قازاق ايەلى سورلاپ ءجۇر.
– اشۋمەن شاقىرىپ قويىپپىن, كەشىرمەي قايدا بارامىن, ايىپپۇلىن تولەسە بولدى ەمەس پە, كۇيەۋىمدى جىبەرىڭىزدەرشى, وتباسىمنىڭ جالعىز اسىراۋشىسىن قاماماڭىزدارشى, ەرتەڭ جۇمىسىنان ايىرىلىپ قالسا ءبىزدى كىم اسىرايدى؟!.
– جوق! وسىنىڭ ءبارىن 102-گە قوڭىراۋ شالماس بۇرىن ويلانۋىڭىز كەرەك ەدى! كۇيەۋىڭىز ەندى ايىپپۇل دا تولەيدى, 20-25 كۇنگە «كۋرورتقا» دا كەتەدى. تەلەفوننان تۇسكەن ارىز ءولىپ كەتسەڭىز دە قايتارىپ الىنبايدى!
مىنە, ەستيتىن جاۋابىڭىزدىڭ سيقى – وسىنداي.
PS. «وتان – وتباسىنان باستالادى» دەپ شەشەنسيمىز انشەيىندە. دەي تۇرا, مەملەكەتتىڭ ءبىر بولشەگىن ءوز قولىمىزبەن ويران-توپىر ەتە سالامىز. ال «اكىمشىلىك راسىمدىك-پروتسەستىك كودەكسى» بويىنشا ءالسىز تاراپ پەن ديىرمەن تارتاتىن جاقتىڭ داۋىن سوت ارقىلى رەتتەۋگە كەلگەندە ءبىز شەبەر ەكەنبىز. مەملەكەتتىك اپپارات تاراپىنان جول بەرىلگەن قۇقىق بۇزۋشىلىقتاردى بەيبىت جولمەن شەشۋ ءۇشىن «تاتۋلاسۋ» دەگەن ارنايى باپ ەنگىزىپ تاستايمىز. جول بولسىن؟!. ءجا, بۇل – ۇلكەن مەملەكەتتىڭ كىشكەنتاي شارۋاسى عوي, ال «كىشى مەملەكەتتىڭ» ۇلكەن شارۋاسىن كىم رەتتەيدى؟
باۋىرجان سەگىزباەۆ
