قازاق ۇلتتىق ونەر ۋنيۆەرسيتەتىندە جاس ديزاينەرلەردىڭ «شابىت» حالىقارالىق ساندىك-قولدانبالى ونەر جانە بودي-ارت فەستيۆالى ءوتتى. ەكى كۇنگە سوزىلعان شارا قازاق حاندىعىنىڭ 550 جىلدىعىنا ارنالدى.
«Fashion House Kazakhstan» اگەنتتىگىنىڭ قولداۋىمەن وتكەن فەستيۆال بودي-ارت جانە ساندىك-قولدانبالى ونەر سالاسىندا جۇرگەن جاس تالانتتارعا قولداۋ كورسەتۋدى كوزدەيدى. قاتىسۋشىلار بايقاۋعا سان ءتۇرلى ساندىك بۇيىمدار اكەلگەن. ولاردىڭ اراسىندا قىزداردىڭ القا, سىرعالارى, قوبديشالار, سومكەلەر, ءتىپتى, قازاقى ويۋمەن ورنەكتەلگەن اعاش ەسىك تە بار. «مۇرا», «جاز», «سۋاستى الەمى», «شىعىس ناتيۋرمورتى», «قىزىل ءىڭىر» دەپ اتالعان تۋىندىلاردىڭ ءبىرى گوبەلەننەن, ەندى ءبىرى شيدەن توقىلعان.
بايقاۋدىڭ باس جۇلدەسىن يەلەنگەن «ۇلى جىبەك جولى» ءتريپتيحى قاراعان جاندى ەرىكسىز تاريحتىڭ تەرەڭ قويناۋىنا جەتەلەپ اكەتەدى. بۇل – ۇجىمدىق جۇمىس. ءبىر توپ استانالىق سۋرەتشى تۋىندىنى تولىققاندى اياقتاۋ ءۇشىن باس-اياعى ءۇش جىلداي ۋاقىت جۇمساعان ەكەن. كەسكىندەمەشى اندرەي پلۋگوۆوي بىزگە مۇنداي كارتيناعا كىرىسپەس بۇرىن تاريحتى جاقسى ءبىلۋ كەرەكتىگىن ايتتى.
– بۇل جۇمىس بۇگىن ءبىرىنشى رەت كوپشىلىك نازارىنا ۇسىنىلىپ وتىر. مۇندا ءبىز ۇلى جىبەك جولىنىڭ ورتا عاسىرلارداعى تاريحىن جانە قازىرگى قازاقستاندى بەينەلەگىمىز كەلدى. ءوزىڭىز بىلەسىز, كەزىندە ۇلى جىبەك جولى ساۋدا-ساتتىقتىڭ وركەندەۋىنە ۇلەس قوسىپ قانا قويماي, مادەنيەتتىڭ دە دامۋىنا ىقپال ەتتى. ەڭ الدىمەن, ستسەناريىن جازدىق, ودان سوڭ, ەسكيزدەرىن سىزۋعا ءبىراز ۋاقىت كەتتى, – دەيدى سۋرەتشى.
شەبەرلەر ءتريپتيحتى سالىپ شىعۋ ءۇشىن سەكسەننەن استام اعاش تۇرلەرىن پايدالانىپتى. ولاردىڭ اراسىندا سوناۋ افريكا, ءۇندىستان جەرىنەن اكەلىنگەن اعاشتار دا بار ەكەن. ەسىك پەن توردەي جەردى الاتىن الىپ كارتينادا جەر-انا, قاسيەتتى قاعبا, ارعىماقتار, دومبىرا, ۇلى كوش, قازاقتىڭ قوناقتى قارسى الۋ ءداستۇرى جانە ت.ب. بەينەلەنگەن.
ال, «اعاش وڭدەۋ» اتالىمىندا ءبىرىنشى ورىنعا يە بولعان الىبەك نىشانباەۆ – ءبىزدىڭ تاشكەنت قالاسىنان كەلگەن قانداسىمىز. ول تاشكەنتتەگى اعاش ويۋ ونەرىنىڭ ورتالىق ازيا مەكتەبىندە ءتالىم العان. ال قازىر قازاق ۇلتتىق ونەر ۋنيۆەرسيتەتىندە وقيدى. الىبەك اعاشتان ساندىق, باقان, توعىزقۇمالاق تاقتاسى, قىمىز ىشۋگە ارنالعان كەسەلەر, قوبديشالار جاسايدى. ونىڭ توپتاماسىنداعى ەرەكشە كوزگە تۇسەتىن زات – اقسۇيەك. «اقسۇيەك» ويىنىنا ارنالعان بۇل تۋىندى جاس شەبەردىڭ «قازاقتىڭ ۇلتتىق ويىندارى» سەرياسىنان ويىپ تۇرىپ ورىن الادى.
بايقاۋ قورىتىندىسىندا, «بودي-ارت» اتالىمىندا ءبىرىنشى ورىن اقەركە مۇحاماديەۆاعا, ەكىنشى ورىن دينارا مۇحامەتقاليەۆاعا, ال, ءۇشىنشى ورىن ايگەرىم ساعىناەۆاعا بۇيىردى. «توقىما» اتالىمىنداعى جۇلدەلەردى رايحان قۇسايىنوۆا, گۇلفارا جاقىپ جانە ديانا ەدىرەسوۆالار جەڭىپ الدى. «گوبەلەن» اتالىمىندا ءبىرىنشى ورىن دينا تولەگەنوۆاعا بەرىلدى. ەكىنشى جانە ءۇشىنشى ورىنداردى فاريزا جۇماعات پەن ماليكا كەڭەسوۆالار ءبولىستى. «اعاش وڭدەۋ» اتالىمىنىڭ ءبىرىنشى ورنىن الىبەك نىشانباەۆ ەنشىلەسە, ەكىنشى ورىندى ەرجان تۇتان قانجىعاسىنا بايلادى. ال, ءۇشىنشى ورىندى باتىل قادىرسىزوۆ يەلەندى.
روزا ارەن
