كەشە استانا قالاسىنىڭ اكىمى ادىلبەك جاقسىبەكوۆ 72 جاس وتباسىعا سالتاناتتى جاعدايدا پاتەر كىلتىن تاپسىردى. باسپانالى بولعان ەلوردالىقتار «وڭىرلەردى دامىتۋ – 2020» باعدارلاماسىنىڭ شەڭبەرىندە پايدالانۋعا بەرىلگەن سارىبۇلاق وزەنىنىڭ بويىنداعى ن.تىلەنديەۆ داڭعىلىنان وڭتۇستىككە قاراي ورنالاسقان تۇرعىن ءۇي كەشەنىنە قونىستانادى.
قالا باسشىسى باسپاناعا يە بولعانداردى قۋانىشتارىمەن قۇتتىقتاي وتىرىپ, اكىمدىك ءوز جۇمىسىنداعى باستى باسىمدىقتى الەۋمەتتىك مىندەتتەمەلەردى ىسكە اسىرۋعا بەرىپ وتىرعاندىعىن جانە ولار تولىق كولەمدە ورىندالاتىنىن اتاپ ءوتتى.
–قازاقستان رەسپۋبليكاسىنىڭ تاۋەلسىزدىگى كۇنى قارساڭىندا جاس وتباسىلارعا پاتەر كىلتىن تاپسىرىپ جاتىرمىز. «جاس وتباسىلارعا ارنالعان باسپانا» اتتى تۇرعىن ءۇي قۇرىلىسىنىڭ جاڭا باعىتى ارقىلى بۇعان قول جەتكىزىپ وتىرمىز. اتالمىش باعىت تىكەلەي ەل پرەزيدەنتىنىڭ تاپسىرماسىمەن ازىرلەندى. مەملەكەت بۇل ماسەلەگە ارقاشان ءجىتى كوڭىل ءبولىپ, بارىنشا قولداۋ كورسەتىپ كەلەدى. سىزدەردى بۇگىنگى قۋانىشپەن شىن جۇرەكتەن قۇتتىقتايمىن! جاڭا قونىستارىڭىز بەرەكە مەن قۋانىشقا تولا بەرسىن! – دەدى ءا.جاقسىبەكوۆ.
الەۋمەتتىك باعدارلامالاردى ىسكە اسىرۋدىڭ ارقاسىندا سوڭعى جىلدارى 4,5 مىڭ ەلوردالىق تۇرعىن باسپانالى بولعاندىعىن ايتا كەتۋ كەرەك. سونىڭ ىشىندە بىلتىر ەلوردادا جاس وتباسىلارعا ارنالعان تۇرعىن ءۇي باعىتى بويىنشا 672 پاتەر ءبولىندى. بۇگىندە 211 وتباسى ۇيلەرىنە قونىستانىپ ۇلگەردى. جاس وتباسىلارعا ارنالعان وزگە 389 پاتەر تۇرعىن ءۇي كوميسسياسىنىڭ الداعى وتىرىسىندا بولىنەدى.
جالپى, «وڭىرلەردى دامىتۋ – 2020» باعدارلاماسى اياسىندا باسپانا ءبولۋدىڭ نەگىزگى بەس باعىتى قاراستىرىلعان. ونىڭ ىشىندە ەسكى جانە اپاتتى جاعدايداعى ۇيلەردى ءسۇرۋ اتتى قاناتقاقتى جوبا دا بار. اتالمىش جوبا شەڭبەرىندە 3 500 وتباسى 2017 جىلدىڭ سوڭىنا دەيىن جاڭا, جايلى تۇرعىن ۇيلەرگە كوشىرىلمەك.
امانعالي قالجانوۆ
