مەن – استانا قالاسىنىڭ بايىرعى تۇرعىنىمىن. وسى قالادا تۇرىپ جاتقانىما جارتى عاسىردان اسىپ جىعىلدى. حالقىمىز «ەلۋ جىلدا ەل جاڭا» دەپ جاتادى عوي. ءدال ايتىلعان ءسوز. بۇدان 18 جىل بۇرىن عانا اقمولا كوشەلەرى تار, شاعىن شاھار بولاتىن. سول كەزدە, ارينە, وسىنداي قالا كەيىن ەلدىڭ استاناسىنا اينالادى دەگەن وي ەشكىمنىڭ ءوڭى تۇگىلى تۇسىنە كىرمەگەنى انىق. ەلىمىزدىڭ استاناسى وسىندا كوشىرىلگەندە, العاشقى كوشتى قارسى الۋشىلاردىڭ قاتارىندا بولىپ, سول ۋاقيعانى ءوز كوزىمىزبەن كورگەن ەدىك.
كەيىن ول ومىرىمدەگى ەلەۋلى ەستەلىكتەردىڭ بىرىنە اينالاتىنىن ويلاماپپىن.
بۇل 1997 جىلدىڭ 10 جەلتوقسانى بولاتىن. وسى كۇنى الماتىدان سالتاناتتى جاعدايدا مەملەكەتتىك شتاندارتتار اكەلىندى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ وسى كۇننەن باستاپ اقمولا ەلىمىزدىڭ استاناسى بولاتىنىن جاريالادى. سول كۇنى بىزدەر ءۇشىن قالىپتى ايازدى كۇندەردىڭ ءبىرى بولعانىمەن, الماتى سياقتى اۋا رايى جىلى قالادان كەلگەندەرگە ناعىز ۇسكىرىك ايازداي كورىنگەنى ءبىلىندى. الايدا, كوپ ۇزاماي-اق, وسى جاقتىڭ كليماتىنا ساي, جاڭا زامان تالابىمەن سالىنعان اسەم دە, جىلى عيماراتتار, كوركى كوز تارتاتىن تۇرعىن ۇيلەر, جايلى قونىستار جىلىلىعىمەن باۋراپ, كوپشىلىكتى باۋىرىنا تارتتى. سونىڭ ارقاسىندا كوپ ۇزاماي, كوشىپ كەلگەندەردىڭ ءبارى دە بۇل جاقتىڭ قىسىنا دا ۇيرەنىپ كەتتى عوي.
استانادا قازىرگى ۋاقىتتا قانداي ساۋلەتتى عيماراتتار بار, سونىڭ ءبارى ءبىزدىڭ كوز الدىمىزدا بوي كوتەردى. ءبىر كەزدەرى ەلباسىمىزدىڭ ەل استاناسىن اقمولاعا كوشىرۋ جونىندەگى باستاماسىنا قارسىلىق بىلدىرگەندەر دە بولىپ, ولاردىڭ كەيىن ساۋلەتتى ەلوردامىزدىڭ كوركىنە قالاي باس يگەنىنە دە كۋا بولدىق. ويتكەنى, قازىرگى استانا – الەمدەگى بىرەگەي قالالاردىڭ ءبىرى. مەنىڭ وزىمە ەلوردامىزدىڭ ءبىر جۇيەمەن, ىڭعايلى دا كەڭ, ساۋلەتتى سالىنعان كەلبەتى قاتتى ۇنايدى. قازىرگى ۋاقىتتا استانانىڭ ىشىندە قانشاما ساياباقتار مەن گۇلزارلار بار. بۇل قالا تۇرعىندارى ءۇشىن كەشكىلىك سەرۋەندەۋىنە, تابيعات اياسىنا جاقىن بولۋىنا وتە قولايلى. باس جوسپارىمىزدا استانامىزدىڭ تابيعاتپەن ۇندەستىگىن ساقتاۋعا باسا ءمان بەرىلگەنى دە ۇلكەن ۇتىمدىلىق بولعانىن ايتا كەتۋ كەرەك.
بىلاي قاراساڭىز, 17 جىل تاريح ءۇشىن ونشا كوپ ۋاقىت ەمەس. ءتىپتى, جاڭا قالانىڭ قۇرىلۋ تاريحى ءۇشىن دە تىم از ۋاقىت. بىراق, سوعان قاراماستان, الەمدىك دەڭگەيگە تەز كوتەرىلگەن جاس استانامىزدا قانشاما ماڭىزدى شارالار ءوتتى. مەن بۇل جەردە الەمدىك دەڭگەيدەگى ۇلكەن ماڭىزدى شارالاردى ايتىپ وتىرمىن. بىرنەشە مارتە وتكەن الەمدىك ءداستۇرلى دىندەر سەزدەرى, وبسە ءسامميتى, حالىقارالىق ەكونوميكالىق فورۋمدار, ازيادا – 2011 ويىندارى ەلوردامىزدىڭ الەمگە تانىمالدىلىعىن ارتتىرا ءتۇستى. شەتەلدەن كەلگەن كوپتەگەن مارتەبەلى مەيمانداردىڭ قالامىزعا دەگەن سۇيىسپەنشىلىككە تولى جىلى لەبىزدەرى دە ءبىزدىڭ جۇرەگىمىزدە ساقتالىپ قالدى. ەلوردامىزعا بەرىلگەن جوعارى باعالار ءبىزدىڭ دە مارتەبەمىزدى بيىكتەتتى. استانا – ۇلتتىڭ رۋحىن كوتەرگەن, حالىق رەتىندە الەمدەگى بەدەلىمىزدى ارتتىرعان قالا.
استانامىزدىڭ تاعى ءبىر ۇلكەن جەتىستىگى – الەمدەگى ەڭ ايتۋلى «ەكسپو – 2017» كورمەسىن وتكىزۋ مارتەبەسىنە يە بولۋى. قازىر كورمەگە بايلانىستى دايىندىق جۇمىستارى قىزۋ ءجۇرىپ جاتىر. بۇل شارانى وتكىزۋ ءبىر جاعىنان مارتەبە بولعانىمەن, ەكىنشى جاعىنان ەلدىگىمىزگە سىن دا بولماق. وسى كورمەنى ۇيىمداستىرۋ ارقىلى ءبىزدىڭ مەملەكەتتىڭ قۋاتتىلىعى مەن تۇراقتىلىعى, استانامىزدىڭ ساۋلەتى مەن داۋلەتى الەم قوعامداستىعىنا جاڭا قىرىنان تانىلا تۇسەدى. ويتكەنى, ەكسپو كورمەسىن وتكىزۋ مارتەبەسىنە كوشباسشى ەلدەر عانا يە بولعان. ولاي بولسا, وسى حالىقارالىق شارانى جاقسى وتۋىنە استانالىقتاردىڭ بارشاسى وزىنشە تىلەۋقور بولۋى ءتيىس دەپ ويلايمىن. ويتكەنى, بۇل – ءبىزدىڭ باس قالامىز, ەلىمىزدىڭ جۇرەگى بولىپ سوعىپ تۇرعان ەلوردامىز.
قابىكەن زاكاريانوۆ,
«ادىلەت» تۇتىنۋشىلار قۇقىعىن قورعاۋ قوعامى» بىرلەستىگىنىڭ توراعاسى, ەڭبەك ارداگەرى
