ەلباسىنىڭ ەلورداعا دەگەن سۇيىسپەنشىلىگى ەرەكشە. استانانىڭ ءار ادىمى مەن دامۋ قارقىنى, ءتىپتى, ۇساق-تۇيەك جۇمىسىنا دەيىن پرەزيدەنتتىڭ نازارىنان تىس قالعان ەمەس. «استانا – بارشا قازاقستاندىقتىڭ ماقتانىشى جانە جەكە مەنىڭ دە ماقتانىشىم ءارى قۋانىشىم. ءبىز استانانى مۇلدە جاڭادان سالدىق. ونى كوشىرۋگە بايلانىستى بولعان بارلىق پروبلەمالاردى جۇرەگىمىزدەن وتكىزدىك. بۇل – ارمان ەدى. ەندى ول – تاماشا قالا, وتانىمىزدىڭ جۇرەگى, تاۋەلسىزدىگىمىزدىڭ تىرەگى» دەيدى نۇرسۇلتان ءابىشۇلى. مەملەكەت باسشىسىنىڭ ءوزى ايالى الاقانىنا سالىپ, جان جىلۋى مەن جاناشىرلىق سەزىمىنە بولەپ وسىرگەن باس شاھار قاس-قاعىم ساتتە قارقىندى دامىپ, ۇلتىمىزدىڭ ۇياسىنا, ەلدىگىمىزدىڭ شەجىرەسىنە اينالدى.
ەلوردا سالعان ەر قازاق
ەلباسى مەن ەلوردا ەل نازارىندا ەگىز ۇعىم ىسپەتتى قالىپتاستى. ارينە, قاتارداعى قاراپايىم قالادان ءبۇتىن ءبىر مەملەكەتتىڭ استاناسىن جاساپ شىعارۋ – ەرلىكپەن پارا-پار.
ەل استاناسىن اۋىستىرۋ يدەياسى قيىن-قىستاۋ كەزەڭدە دۇنيەگە كەلدى. بۇل ەشكىمنىڭ ويىنا كەلمەگەن تىم باتىل شەشىم ەدى. نۇرسۇلتان ءابىشۇلىنىڭ ءوزى: «استانانى كوشىرۋ يدەياسىنا بەلدى ءبىرجولاتا بەكەم بۋا تۇرىپ, مەن ورتاعا ءبارىن سالاتىنىمدى, ياعني, ءوزىمنىڭ ساياسي مانسابىمدى, ءتىپتى, مۇمكىن ءومىرىمدى بايگەگە تىگەتىنىمدى, ءسوز جوق, ءتۇسىندىم. ارينە, مەن ءومىردى قيۋ ماعىناسىندا ەمەس, فيلوسوفيالىق تۇرعىدا – ەل پرەزيدەنتى رەتىندە قوعام الدىنداعى ءوزىمنىڭ ومىرلىك مىندەتتەمەلەرىمدى ورىنداۋ ماعىناسىندا ايتىپ تۇرمىن» دەپ ەسكە الادى. مۇنداي تاۋەكەلدىلىك ەكىنىڭ ءبىرىنىڭ قولىنان كەلە بەرمەيدى. دۇنيەجۇزىندە استانالاردى اۋىستىرعان 140-تان استام دەرەك تىركەلگەن ەكەن. بىراق ولاردىڭ ءبارى بىردەي ءساتتى بولا بەرمەگەن. سەبەبى, استانانى اۋىستىرۋدىڭ ماشاقاتى كوپ. ول ءۇشىن بولاشاق استانادان باستاپ, سول ەلدىڭ بارلىق جاعدايى, ستراتەگيالىق ماقسات-مۇراتى, كەلەشەكتەگى دامۋ باعدارى, باسقارىلۋ تەتىگى, حالىقتىڭ كوزقاراسى – ءبارى-ءبارى ەسكەرىلۋى كەرەك. بۇل دەگەنىڭىز – الەۋمەتتىك-ەكونوميكالىق تۇرعىدان دا سالماعى اۋىر دۇنيە. ەل باسقارىپ وتىرعان كوپتەگەن باسشىلاردىڭ وعان باتىلى بارا بەرمەيتىنى سوندىقتان. مىسالى, يندونەزيا ءوز استاناسىن اۋىستىرام دەگەلى ءبىر عاسىردان استام ۋاقىت ءوتتى. بيلىك باسىنداعىلارى ءالى كۇنگە دەيىن تارتىنشاقتاپ كەلەدى. وسى ماسەلەدە تايلاند تا ءبىر شەشىمگە كەلە العان جوق. «استانانى اۋىستىراتىن بولدىق» دەپ ايداي الەمگە جار سالعان ارگەنتينا دا ءۇنسىز ءالى. ال قازاق ەلى استاناسىن اۋىستىرۋ تۋرالى شەشىمدى جۇزەگە اسىرۋعا بىردەن كىرىستى. «تاۋەلسىز ەلمىز, تاۋەلسىز مەملەكەتتىڭ ءوز استاناسى بولۋى كەرەك» دەگەن ەلباسى ءوزىنىڭ ۇسىنىسى ۇزاق تولعانىستان كەيىن تۋعان تۇجىرىم ەكەنىن دالەلدەپ شىقتى. «استانانى كوشىرۋ قازاقستاندى جاڭا تاۋەلسىز مەملەكەت رەتىندە ورنىقتىرۋدا زور ءرول اتقاراتىنىنا مەن سەنىمدى بولدىم» دەدى پرەزيدەنت كەيىن ەستەلىكتەرىندە.
ەلدىڭ بولاشاق استاناسى رەتىندە اقمولا قالاسىنىڭ تاڭدالىپ الىنۋى تەگىن ەمەس. ەر بابامىز ەدىگەدەن باستاپ, ءاز تاۋكە مەن ايبىندى ابىلايعا دەيىنگى حاندارىمىزدىڭ ءبارى ەركە ەسىل بويىندا وردا تىككەندەرى تاريحتان ءمالىم. پرەزيدەنتتىڭ پايىمداۋىنشا, اقمولا – قازاقستاننىڭ گەوگرافيالىق ورتالىعى. قالا ءىرى كولىكتىك ارنالاردىڭ قيىلىسىندا, توعىز جولدىڭ تورابىندا تۇر. ءارى قازاقستاننىڭ شەتەلگە شىعۋعا مەيلىنشە توتە جولى – ترانسەۋروازيا ارنالارىنا تاياۋ ورنالاسقان. شاھاردى ءارى قاراي وركەندەتۋگە دە كەدەرگىلەر جوق. ستراتەگيالىق ماقساتتى دا ەسكەرگەن ەلباسى ەلوردانى تاڭداۋ بارىسىندا قاۋىپسىزدىك ماسەلەسى دە ماڭىزدى ورىن العانىن ايتادى. قىسقاسى, اقمولاداي قاراپايىم قالا استانا بولۋعا لايىق 32 ولشەمنىڭ بارىنە ساي بولىپ شىققان.
وسىلايشا, ەلباسىنىڭ تاباندىلىعىنىڭ ارقاسىندا سارىارقانىڭ توسىندە ادام ايتسا نانعىسىز اسەم شاھار استانا بوي كوتەردى. «ءبىزدىڭ ۇزاقتى كۇندەر مەن ۇيقىسىز تۇندەردەگى ويلارىمىز بەن تولعانىسىمىزدىڭ, كەشكى قينالىسىمىز بەن تاڭ الدىنداعى ارمان-مۇراتىمىزدىڭ ءمانى, مىنەكي, استانا بولدى» دەيدى نۇرسۇلتان ءابىشۇلى.
استانا – كۇللى الاش جۇرتىنىڭ ارمانى ءھام اماناتى. استانا – بار قازاقتىڭ باقىت مەكەنى. ەلىمىزدىڭ جاڭا عاسىرداعى جارقىن شەجىرەسى دە وسىندا جازىلىپ جاتىر. «الەمدە تاماشا عيماراتتارى مەن جاڭا ۇيلەرى بار قالالار كوپ بولعانىنا قاراماستان, مەن استانانىڭ ءار عيماراتىن ءوز جۇرەگىممەن, ءوز جانىممەن سەزىنەمىن. بولاشاقتا ۇرپاقتارىمىز حالقىمىزدىڭ يگىلىگى ءۇشىن وسى جەردەن بيلىك جۇرگىزۋى, قازاقستاندىقتار ءوز ەلىن, ءوز ەلورداسىن ماقتان تۇتۋى ءۇشىن مەن وتانىمىزدىڭ ەلورداسىنىڭ شاڭىراعىن وسى جەردەن كوتەردىم» دەگەن ەلباسىنىڭ كوركى كوز تارتار كوركەم قالانى سالىپ بەرگەنى ناعىز ەرلىك ەكەنى ءسوزسىز.
اتاۋى دا اۋەزدى باس قالا
ەلباسىنىڭ ەلورداعا دەگەن ەرەك سەزىمى استانا دەگەن اتاۋدان دا اڭعارىلادى. قاي تىلدە دە يكەمدى ايتىلاتىن اۋەزدى ەسىمدى پرەزيدەنتتىڭ ءوزى قويعانىن جۇرتشىلىق جاقسى بىلسە كەرەك. العاش اقمولا استانا بولادى دەگەندە كەيبىر جىمىسقى نيەتتى باسىلىمدار «جاڭا استانا سالماق تۇگىلى, جاڭا ءۇي سالۋدىڭ ءوزى مۇڭ بولىپ وتىرعان قيىن-كەزەڭدە قازاقتاردىڭ مۇنىسى نەسى؟» دەپ جارىسا جازعاندارى ەسىمىزدە. كەيىن ويلاعاندارى جۇزەگە اسپاعان سوڭ باس شاھاردىڭ اقمولا اتاۋىنا ءتيىسىپ, «بەلايا موگيلا» دەپ مىسقىلدادى. البەتتە, كەرجاق پىكىرلەر ەلباسىنا جەتپەي قالعان جوق. پرەزيدەنت ءتول پەرزەنتىن ءجون-جوسىقسىز «ايىپتاۋلاردان» اراشالاپ الدى. «بۇل قالا – قازاقستاننىڭ جاڭا استاناسى جانە مەنىڭ ماقتانىشىم ەدى, سوندىقتان ونىڭ اتاۋىن سان قۇبىلتۋعا جول بەرە المايتىن ەدىم» دەي كەلە, ەلوردانىڭ اتاۋى قازاقستاندىقتاردىڭ, وسىندا مەكەندەگەن بارشا ۇلت پەن ۇلىستىڭ عانا ەمەس, كىرپياز شەتەلدىكتەردىڭ دە كوڭىلىنەن شىعۋى كەرەكتىگىن ايتتى. باسىندا ەلوردانى قاراوتكەل دەپ اتايىق دەگەن ۇسىنىستار ءتۇستى. ەسىل, سارىارقا اتاۋلارى دا قاراستىرىلدى. بىراق, قازاق ەلىنىڭ جاڭا ەلورداسىنىڭ اتاۋى سول كەزدەگى وزگەرىستەرگە, جالپى كوڭىل اۋانىنا ءدوپ كەلۋى كەرەك ەدى. «استانانىڭ اتاۋىن اۋىستىرۋ ۇدايى ويىمنان شىقپاي, ات ىزدەۋمەن بولدىم. ءسويتىپ جۇرگەندە, ءبىر جولى تۇنگى ساعات 2-دە «استانا» دەگەن اتاۋ ويىما ساپ ەتىپ, كوكەيىمە قونا كەتكەنى. استانا دەگەنىمىز – استانا. قازاقشا ادەمى ەستىلەدى. قوماقتى, اۋىز تولادى, قىسقا دا نۇسقا, اۋەزدى. ورىسشا دا, اعىلشىنشا دا بۇرمالانباي ەستىلەدى. بۇل اتاۋدا باتىلدىق, مىعىمدىق جانە ايقىندىق رەڭك بار. استانا ءبىزدىڭ جالپى كوڭىل اۋانىمىزدى جانە استانانى كوشىرۋدەن كۇتەرىمىزدى بەينەلەيتىن وتە اۋقىمدى ءارى قىسقا ۇران سياقتى» دەيدى ەلباسى. ءسويتىپ, 1998 جىلدىڭ 6 مامىرىندا «قازاقستان رەسپۋبليكاسىنىڭ استاناسى اقمولا قالاسىن استانا قالاسى دەپ اتاۋ تۋرالى» قر پرەزيدەنتىنىڭ جارلىعى شىقتى.
مىنە, استانا اتاۋى وسىلاي دۇنيەگە كەلگەن ەدى. ءار اتا-انا بالاسىنىڭ بولاشاعىنا الاڭدايتىنى سەكىلدى, ەلباسى دا ەلوردانىڭ اتاۋىنان باستاپ كوڭىل ءبولىپ, ءار قالانعان كىرپىشىنە دەيىن ءوزى قاداعالادى. ءتىپتى, كەيبىر كورنەكتى عيماراتتاردىڭ نوبايلارىن دا الدىمەن ءوزى قاعازعا ءتۇسىردى. پرەزيدەنتتىڭ بۇل ادەتى ءالى دە سول قالپىندا. استانانى پرەزيدەنتتىڭ ءتول پەرزەنتى دەيتىنىمىز دە – وسى.
حالقىمەن اسقاق استانا
وتانىمىزدىڭ جۇرەگى استانا قاي جاعىنان دا وزگەلەرگە ونەگە بولۋى كەرەك. ەلوردانىڭ ءسان-سالتاناتى ءوز الدىنا, ونىڭ اتىنا ساي بولۋى ادامدارعا بايلانىستى ەكەنىن ەلباسى ۇنەمى ايتىپ كەلەدى.
استانالىقتاردىڭ قارىم-قاتىناسى, مادەنيەتى مەن سانا-سەزىمى, ىشكى الەمى ەلوردالىق دەڭگەيگە ساي بولۋى كەرەك. ءاربىر استانالىق ءوزىنىڭ ەلوردا كەلبەتى ءۇشىن جەكە جاۋاپكەرشىلىگىن سەزىنۋگە, باس قالانىڭ تۇرعىنى دەگەن اتقا قاي جاعىنان دا لايىق بولۋعا ءتيىس. پرەزيدەنتتىڭ ايتۋىنشا, استانا دەگەنىمىز – الدىمەن ادامدار. باس قالانىڭ كوشەلەرى دە, كولىكتەرى دە, جارىعى دا, جارناماسى دا, قىزمەت كورسەتۋ سالاسى دا, مەكتەپتەرى مەن مەكەمەلەرى دە, ەمحانالارى مەن اۋرۋحانالارى دا اتىنا زاتى ساي بولعانى ابزال. ەلباسى ەلورداعا ەڭ جاقسى دارىگەرلەر, مۇعالىمدەر, باسقا دا مامان يەلەرى شوعىرلانۋى كەرەكتىگىن ايتىپ كەلەدى.
ەلورداعا مەملەكەت تاراپىنان ەرەكشە كوڭىل ءبولىنىپ جاتقاننان كەيىن زاماناۋي تەحنولوگيالار, نەبىر وزىق تەحنيكالىق قۇرال-جابدىقتار الدىمەن استاناعا اكەلىنەدى. باسقانى بىلاي قويعاندا, قازىرگى كۇنى استانادا سوڭعى اشىلعان ەمحانالار مەن مەكتەپ عيماراتتارىنىڭ ءوزى كىسى قىزىعارلىقتاي. جۇمىس ىستەگىسى كەلگەن ادامعا مۇندا كەرەكتىنىڭ ءبارى تابىلادى.
استانانىڭ باس جوسپارى بويىنشا ەلوردا كوركەم عيمارات, تاماشا تۇرعىن ۇيلەرىمەن عانا ەمەس, تۇرعىندارعا قولايلى تىرشىلىك-تىنىسىمەن دە ەرەكشەلەنۋى كەرەك-ءتى. ەلباسىنىڭ ايتۋىنشا, استانادا جاسالىپ وتىرعان جاعدايدىڭ ءبارى ەلوردالىقتاردىڭ مەيلىنشە جايلىلىقتى سەزىنۋىنە ىقپال ەتۋگە ءتيىس. وسى ماقساتتا اتقارىلعان اۋقىمدى شارۋالاردىڭ ارقاسىندا باس شاھار تمد جانە ەۋرازيالىق ەكونوميكالىق قوعامداستىقتىڭ ۇزدىك قالالاردى ساراپتايتىن حالىقارالىق بايقاۋىندا «ءومىر سۇرگىڭ كەلەتىن قالا» اتاندى. بۇل اتاق قالامىزعا جايدان-جاي بەرىلە سالعان جوق. ساراپشىلار قالالاردىڭ ەكولوگيالىق تازالىعىن, اسەمدىگىن, تىرشىلىكتى قامتاماسىز ەتۋ جۇيەلەرى مەن الەۋمەتتىك سالالاردا كەشەندى يننوۆاتسيالىق تەحنولوگيالاردىڭ ەنگىزىلۋىن, جاستاردى جۇمىسقا ورنالاستىرۋداعى تىڭ باستامالاردىڭ بولۋىن – ءبارىن ەسكەرە وتىرىپ, وسىنداي قورىتىندىعا كەلدى.
استانانىڭ شىنىمەن دە ءومىر سۇرگىڭ كەلەتىن قالا ەكەنىن سوڭعى جىلداردا ەنگىزىلگەن وزگەرىستەردەن-اق انىق اڭعارۋعا بولادى. ايتالىق, بۇگىندە ەلوردانىڭ كوشەلەرى مەن جولاۋشىلار كولىكتەرى بەينەكامەرالارمەن جابدىقتالىپ جاتىر. بۇل جوبا قوعامدىق ءتارتىپتى قامتاماسىز ەتىپ قانا قويماي, قاراپايىم حالىقتىڭ قاۋىپسىزدىگىن دە ساقتاۋعا باعىتتالعان. ال قالا كوشەلەرىندە ورناتىلعان ءبىر مىڭنان استام بەينەكامەرا مەن «اقىلدى باعدارشامدار» كولىك كەپتەلىسىن ازايتۋعا ايتارلىقتاي اسەر ەتكەن. كەلەشەكتە ءار مەكەمەنىڭ تۇسىنا بەينەكامەرا ورناتىپ, جوبانى ءارى قاراي دامىتۋ جوسپاردا بار.
استانانىڭ حالىق كوپ باراتىن الەۋمەتتىك سالالارىندا دا تىڭ جوبالار جۇزەگە اسىرىلۋدا. مىسالى, جالپى ءبىلىم بەرەتىن ۇيىمداردا «بولاشاقتىڭ مەكتەبى» اتتى جوبا بار. ونىڭ ەرەكشەلىگى, اتا-انالار بالالارىنىڭ مەكتەپكە قاشان كىرىپ-شىققانىن ءبىلىپ وتىرادى. بۇگىنگە دەيىن اتا-انالار بالاسىنىڭ بالاباقشا كەزەگى قانشالىقتى جىلجىعانىن ەلەكتروندىق جۇيە ارقىلى باقىلاپ كەلگەن ەدى. ەندى مەكتەپكە دەيىنگى مەكەمەلەرگە ارنالعان جولدامانى ۇزىن-سونار كەزەككە تۇرماي-اق, ەلەكتروندىق نۇسقادا الاتىن كۇن دە الىس ەمەس.
ەلوردانىڭ ەمحانالارىندا دا تىڭ جوبالار ىسكە اسىرىلۋدا. جاقىن كەلەشەكتە استانالىقتار دارىگەر قابىلداۋىنا ون-لاين رەجيمىندە جازىلىپ, امبۋلاتورلىق كارتالاردىڭ ەلەكتروندىق نۇسقاسىنا قول جەتكىزەتىن بولادى.
ەلباسىنىڭ ءوزى باقىلاپ وتىرعان استانا كەلەشەكتە بۇدان دا جايلى, بۇدان دا قولايلى بولارىنا ەل سەنەدى.
جەتىستىككە جەتەلەگەن جىلدار
پرەزيدەنت نۇرسۇلتان نازارباەۆ ۇلكەن ءىستى باستاپ, حالىق ونى قوستاپ, ەسىلدىڭ بويىندا ەرتەگىدەي ەڭسەلى ەلوردا بوي كوتەردى. استانانىڭ از ۋاقىتتىڭ ىشىندە قارقىندى دامۋى تالايلاردى تامساندىردى. قالامىز ەلىمىزدىڭ باس شاھارى مارتەبەسىن يەلەنگەلى قول جەتكىزگەن تابىستارى تولايىم.
بيىلعى ەڭ ۇلكەن جەتىستىك – استانا ءوزىن-ءوزى قامتاماسىز ەتەتىن دەڭگەيگە جەتتى. ەندى ەلوردا الماتى, اتىراۋ جانە ماڭعىستاۋ وبلىستارىمەن قاتار, رەسپۋبليكالىق بيۋدجەتكە قارجى تۇسىرەتىن دونور قالاعا اينالدى. قالالىق اكىمدىكتىڭ رەسمي سايتىنداعى مالىمەتكە سۇيەنسەك, 2015 جىلى استانا مەملەكەتتىك بيۋدجەتكە 7,5 ميلليارد تەڭگە اۋدارادى.
ەلباسىنىڭ تاپسىرماسى بويىنشا, قالادا شاعىن جانە ورتا كاسىپكەرلىكتى دامىتۋ ماسەلەسىنە دە ايرىقشا كوڭىل بولىنۋدە. جالپى استانا ەكونوميكاسىنىڭ 60 پايىزىن كاسىپكەرلىك سالاسى قۇرايدى. بۇگىندە قالادا 60 مىڭعا جۋىق شاعىن جانە ورتا بيزنەس سۋبەكتىسى بەلسەندى جۇمىس ىستەيدى. وسى سالادا 233 مىڭداي ادام ەڭبەك ەتۋدە. بىلتىردىڭ وزىندە بيزنەس سالاسىندا 34 مىڭ جاڭا جۇمىس ورنى اشىلعان.
يندۋستريالدىق-يننوۆاتسيالىق دامۋ باعىتىندا دا اۋقىمدى جۇمىستار اتقارىلىپ جاتىر. ءبىر عانا يندۋستريالدىق پارك اۋماعىندا جالپى ينۆەستيتسيا كولەمى 168 ميلليارد تەڭگەگە جۋىقتايتىن 50 جوبا تىركەلگەن. قالانىڭ نەگىزگى كاپيتالىنا قۇيىلعان ينۆەستيتسيا كولەمى ايتارلىقتاي ارتىپ, 644 ميلليارد تەڭگەگە جەتتى.
استانانىڭ ەلوردالىق كەلبەتى قالىپتاسقالى مۇندا كەلۋشىلەردىڭ قاتارى دا ارتقان. بىلتىر ەلورداعا 600 مىڭعا تارتا تۋريست كەلگەن ەكەن. نەبىر ايشىقتى عيماراتتار مەن رۋحاني وردالاردىڭ كوبەيۋى دە الىس-جاقىننان اعىلعان ادامداردىڭ قىزىعۋشىلىعىن ارتتىرعانى انىق.
ءيا, ارمانداي اسقاق استانانىڭ الدىندا ءالى تالاي مىندەتتەر مەن بيىك بەلەستەر تۇر. سونىڭ ىشىندە ۇلكەنى – ەكسپو حالىقارالىق مامانداندىرىلعان كورمەسى. كۇللى الەم كوز تىگىپ وتىرعان جاھاندىق شاراعا ەلوردا جان-جاقتى دايىندىقپەن كەلۋى كەرەك. ەلىمىز بەن ەلوردانىڭ جەتىستىكتەرى اسپەتتەلەتىن دۇنيەجۇزىلىك شارانىڭ يگىلىكتەرى دە كوپ بولماق. ەڭ ءبىرىنشى, مەملەكەتتىك ماڭىزدى جوبالارعا ينۆەستيتسيا تارتۋعا مۇمكىندىك بولادى. باس شاھاردىڭ بارلىق سالاسى جاڭعىرىپ, قايتا تۇرلەنەدى. كورمە قارساڭىندا كوپسالالى «ابۋ دابي پلازا» كەشەنى اشىلىپ, جەدەل جۇرەتىن جۇيرىك ترامۆايلار جۇيتكيتىن بولادى. ەلوردانىڭ جاڭا ۆوكزالى دا وسى كەزەڭدە پايدالانۋعا بەرىلەدى دەپ جوسپارلانىپ وتىر.
قىسقاسى, ەكسپو كورمەسىن وتكىزۋ ارقىلى ەلىمىزدىڭ تاعى ءبىر تاريحي پاراعى اشىلعالى تۇر. ەلباسى ءباسى بيىك باسەكە استانا مارتەبەسىن ودان ءارى اسقاقتاتۋعا مۇمكىندىك بەرەتىنىن ايتادى.
«ەكسپو-داي جاۋاپكەرشىلىگى ۇلكەن جاھاندىق شارانى وتكىزۋگە استانانىڭ تاڭدالۋى بەكەردەن-بەكەر ەمەس. ەلوردا الەمدىڭ دەڭگەيدەگى شارانى لايىقتى دەڭگەيدە وتكىزە الاتىن ورتالىق رەتىندە الەمگە تانىلدى. ەڭ باستىسى, كورمەنىڭ باس قالامىزدا ءوتۋى – بارشا حالىقتىڭ كۇش-جىگەرىنىڭ ناقتى جەمىسى» دەيدى پرەزيدەنت. ول حالىقارالىق كورمە ەلوردانى مۇلدە باسقا قىرىنان تانىتاتىنىن ايتادى. كەيىن ەكسپو وتكەننەن كەيىن وعان ارنالىپ سالىنعان نىسانداردىڭ ءبىرى قالماي پايدالانىپ, ەل يگىلىگىنە بەرىلەتىن بولادى.
ەندەشە, بيىك ماقساتتارعا ۇمتىلعان استانانىڭ ابىرويى اسقاقتاي بەرسىن! ەلدىگىمىز ەرەن, ەلوردامىز ەڭسەلى بولسىن لايىم!
قىمبات توقتامۇرات
