استانادا قر مادەنيەت جانە سپورت مينيسترلىگى ءدىن ىستەرى كوميتەتىنىڭ ۇيىمداستىرۋىمەن «ءدىن سالاسىنداعى ماسەلەلەردى باق-تا جاريالاۋ جونىندەگى قاعيداتتارى مەن باسىمدىقتارى» اتتى تاقىرىپتا جۋرناليستەرگە ارنالعان سەمينار-ترەنينگى ءوتتى.
جيىندا ءدىن ىستەرى كوميتەتىنىڭ توراعاسى عالىم شويكين سوڭعى جىلدارى اقپاراتتىق جاھاندانۋ جاعدايىندا ءدىن تاقىرىبى سەكىلدى سەزىمتال سالاعا قاتىستى باق- وكىلدەردىنىڭ رولىنە ەرەكشە توقتالىپ ءوتتى.
-ءدىن سەكىلدى نازىك ماسەلەدە جۋرناليستىك ەتيكانى ساقتاۋ وتە ماڭىزدى. سوندىقتان بۇل ماسەلە جايلى ۋاكىلەتتى ورگاننىڭ وكىلدەرى, ساراپشىلار ءدىني بىرلەستىكتەرمەن بىرگە اقىلداسىپ جۇمىس ىستەۋ كەرەك. ءبىزدىڭ ويىمىزشا, ءدىني تاقىرىپتار وبەكتيۆتى جانە ۇستامدى بولۋى ءتيىس,- دەدى ول.
سونىمەن قاتار, كوميتەت توراعاسى ءدىن ساياساتىنىڭ مەملەكەتتىڭ تۇراقتىلىعىن ساقتاۋدا الاتىن ورنى مەن بۇگىنگى الەمدەگى ءدىن ماسەلەسى توڭىرەگىندە بولىپ جاتقان وقيعالار تۋرالى تەرەڭىرەك ءسوز قوزعادى. اسىرەسە, قازىرگى دۇنيەجۇزىندەگى ءدىندى جەلەۋ ەتىپ, ءوز ماقساتىنا جەتكىسى كەلەتىن تەرروريستىك ۇيىمداردىڭ پايدا بولا باستاعانىن, ولاردىڭ دەنى يسلام ءدىنىن جامىلىپ, سونىڭ اتىنان بەيبىت حالىققا كۇش قولدانىپ, اسىل دىنىمىزگە كەسىرىن تيگىزىپ جاتقانىن ايتىپ ءوتتى. «بۇگىندە «يگيل» ۇيىمىنىڭ قاتارىندا كوپتەگەن وتانداستارىمىز بار. قازىر ەلىمىزدە وسى ازاماتتار بويىنشا جۇمىس جۇرگىزىلىپ جاتىر. ولار تەررور جانە ەكسترەميزم باعىتىنا ەرىپ كەتكەن ادامدار. ەندى ولاردى ازاماتتىعىنان ايىرماي, تولقۇجاتىن جارامسىز دەپ تانۋ ماسەلەسى قارالۋدا», دەپ كوميتەت توراعاسى ءسوزىن ءبىر ساباقتاپ ءوتتى.
دالىرەك ايتقاندا, جيىندا ءدىن سالاسىنداعى وزەكتى ماسەلەلەر تالقىلاندى. ايتالىق, «نۇرلى ءبىلىم» قوعامدىق بىرلەستىگىنىڭ توراعاسى رۇستەم سىزدىقوۆ, «رۋحاني قوعام الەمى» قوعامدىق قورى مەن استانا قالاسىنىڭ كمم ءدىني اعىمداردان زارداپ شەككەندەرمەن جۇمىس جۇرگىزۋ ءبولىمىنىڭ باسشىسى ليمانا قويشيەۆا سەكىلدى بىرقاتار لاۋازىمدى تۇلعالار بايانداما جاسادى. اسىرەسە, «نۇرلى ءبىلىم» قوعامدىق بىرلەستىگىنىڭ توراعاسى رۇستەم سىزدىقوۆ قازاقستان مۇسىلماندارى ءدىني باسقارماسىنا نەمەسە رەسپۋبليكالىق تۇسىندىرمە-ناسيحات جۇمىستارىنا قاتىستى جوق ادامداردىڭ قازاق جانە ورىس تىلىندەگى ۋاعىزدارىن تىڭداۋعا بولمايتىنىن جەتكىزدى.
سونداي-اق, ترەنينگ اياسىندا ءدىن ىستەرى كوميتەتى «ەۋرازيا» ءبىرىنشى ارناسى مەن باس رەداكتورلار كلۋبى مەموراندۋمعا قول قويدى.
ازامات ەسەنجول
