استانادا وتكەن دەۆيس كۋبوگىنىڭ 1/8 فينالىندا قازاقستان ۇلتتىق قۇراماسى شۆەيتساريادان 4:1 ەسەبىمەن باسىم ءتۇستى.
ۇلتتىق تەننيس ورتالىعىندا وتكەن بايراقتى باسەكەنىڭ جەرەبەسى بويىنشا الدىمەن قازاقستاندىق تەننيسشى دميتري پوپكو مەن قارسىلاس كوماندانىڭ ءبىرىنشى ءنومىرى گەنري لااكسونەنمەن كەزدەسىپ, ناتيجەسىندە وتانداسىمىز 3:1 ەسەبىمەن جەڭىسكە جەتتى. ودان سوڭ ميحايل كۋكۋشكين ادريان بودمەردەن ايلاسىن اسىرىپ, كومانداسىن 2:0 ەسەبىمەن العا شىعاردى.
جارىستىڭ ەكىنشى كۇنى جۇپتىق كەزدەسۋلەر ءوتتى. الەكساندر نەدوۆەسوۆ پەن تيمۋر حابيبۋلين جۇبى شۆەيتساريالىقتار اندرەا حۋسلەرا مەن لۋكا مارگاروليمەن وينادى. ويىن 6:4, 6:4, 3:6, 6:7, 6:3 ەسەبىمەن اياقتالىپ, قازاقستان ۇلتتىق قۇراماسى ۋاقىتىنان بۇرىن جەڭىسكە جەتتى.
تاعدىرى شەشىلىپ قويعان دودانىڭ بۇدان كەيىنگى ەكى ويىنى جولداستىق كەزدەسۋ رەتىندە ءوتتى دەسەك تە بولادى. رومان حاسانوۆ قارسىلاسى مارك-اندرەا حۋسلەردەن ەكى پارتيا قاتارىنان جەڭىلگەننەن سوڭ, راكەتكاسىن تاستاي سالدى. ال قورىتىندى ماتچتا دميتري پوپكو ادريان بودمەردى ۇتىپ, كومانداسىنا ەكىنشى رەت ۇپاي سىيلادى.
وسىلايشا, تۇڭعىش رەت قازاقستان دەۆيس كۋبوگىنىڭ شيرەك فينالىنا جولداما الدى. ەندىگى قارسىلاس – حورۆاتيا قۇراماسى. بۇل كەزدەسۋ 6-8 ءساۋىر كۇندەرى وتەدى.
ورىنبەك وتەمۇرات
