شولپان قوجاحمەتوۆا, استانا قالالىق №1 پەريناتالدىق ورتالىق باس دارىگەرىنىڭ ورىنباسارى
ورىنگۇل:
– وتكەن جىلدىڭ اياعىندا ءسىزدىڭ ورتالىقتا بوسانعانمىن. بالامنىڭ سالماعى 3 كەلى 670 گرامم, بويى 55 سم بولىپ تۋىلعان. 2014 جىلدىڭ 2 اقپانىندا پەرزەنتحانادان شىقتىق. اۋرۋحانادان شىققاندا دارىگەرلەردىڭ بەرگەن قاعازىن جوعالتىپ الدىم. ونى قايتا الۋىما بولا ما؟
– شارۋاشىلىق قۇقىعىنداعى «№1 پەريناتالدىق ورتالىق» مكك سىزگە بۇل قاعازدىڭ كوشىرمەسىن بەرە الادى. ول ءۇشىن ورتالىققا كەلىپ, جەكە كۋالىگىڭىزبەن ستاتيستيكا بولىمشەسىنە بارۋىڭىز كەرەك.
باقىتجان:
– سالەمەتسىز بە, شولپان بۇتىنبايقىزى؟ سىزدەردە ءىس جۇرگىزۋشى, اۋدارماشى نەمەسە مۇراعاتشىنىڭ بوس ورنى بار ما؟
– بۇگىنگى كۇنى ءبىزدىڭ ورتالىقتا بۇل ماماندىقتارعا بوس ورىن جوق. دەگەنمەن, كەلىپ, تۇيىندەمەڭىزدى قالدىرىڭىز.
ايتبالا:
– جۇكتىلىگىم بويىنشا قالالىق №8 ەمحانادا تىركەلگەنمىن. تۇرعىلىقتى مەكەنجايىم بويىنشا ءسىزدىڭ ورتالىقتا بوسانۋىما بولا ما الدە جازباشا تۇردە ءوتىنىش بەرۋىم كەرەك پە؟
– قازاقستان رەسپۋبليكاسىنىڭ 2009 جىلعى 5 قازانداعى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ 88, 91-باپتارىنا سايكەس, ءسىز ءوزىڭىز بوساناتىن مەديتسينالىق ۇيىمدى, ساپالى ءارى ۋاقىتىلى مەديتسينالىق كومەكتى ەركىن تاڭداۋعا قۇقىلىسىز. سونىمەن بىرگە ءسىزدىڭ اكۋشەر-گينەكولوگ نەمەسە نەوناتولوگ دارىگەردى تاڭداۋعا, اۋىستىرۋعا قۇقىعىڭىز بار. ال, ءبىزدىڭ ورتالىقتا جۇكتى ايەلدەر مەن جاس بوسانعان انالارعا اكۋشەرلىك پەن گينەكولوگيا سالاسىنىڭ جوعارى ساناتتى, تاجىريبەلى, بىلىكتى ماماندارى, كافەدرامىزدىڭ پروفەسسورلارى مەن دوتسەنتتەرى مەديتسينالىق قىزمەت كورسەتەدى.
ايگەرىم:
– سەگىز جاسار ۇلىم بار. ودان كەيىن بالا تۇرماي قويدى. العاشقى جۇكتىلىگىم جاقسى وتكەن. سودان بەرى ءۇش رەت تۇسىك تاستادىم. گەنەتيكتىڭ كەڭەسىنە جۇگىنسەم بە دەيمىن. ءسىزدىڭ ورتالىقتا ەمدەلە الام با؟
– جۇكتىلىكتى, اسىرەسە, ونى العاشقى كەزەڭىندە ساقتاۋ ءۇشىن بارلىق جاعداي قاراستىرىلعان. گەنەتيكتىڭ كەڭەسىن الۋعا دا مۇمكىندىگىڭىز بار. قوسىمشا اقپاراتتار مەن بايلانىس تەلەفونىنىڭ ءنومىرىن ءبىزدىڭ ورتالىقتىڭ سايتىنان (www.pc-1.kz) الاسىز.
جانسايا قاناتبەك:
– سالەمەتسىز بە؟ №1 قالالىق پەريناتالدىق ورتالىقتا سپەرموگرامما ءاناليزىن تاپسىرۋعا بولا ما جانە ول ءۇشىن قانشا اقشا تولەيمىن؟
– جانسايا, ەياكۋليات نەمەسە سپەرموگرامما ءاناليزىن ءبىزدىڭ ورتالىقتىڭ كلينيكالىق-دياگنوستيكالىق لابوراتورياسىندا تاپسىرۋىڭىزعا بولادى. قالاساڭىز, ونى اقىلى نەگىزدە تاپسىرا الاسىز. ال, ەگەر دارىگەرىڭىز جولداما بەرسە, كەپىلدەندىرىلگەن تەگىن مەديتسينالىق كومەكتىڭ شەڭبەرىندە بۇل ءاناليزدى اقىسىز دا تاپسىرۋىڭىزعا بولادى. بەكىتىلگەن پرەيسكۋرانت بويىنشا بۇل ءاناليزدىڭ باعاسى بۇگىنگى كۇنى مورفولوگيانى قوسا ەسەپتەگەندە 3000 تەڭگە تۇرادى. قوسىمشا اقپاراتتاردى 43-27-25 نەمەسە 43-27-39 تەلەفوندارىنا حابارلاسۋ ارقىلى الۋىڭىزعا دا بولادى.
شىنار:
– سالەمەتسىزدەر مە؟ ءبىز جولداسىم ەكەۋىمىز بالالى بولۋدى ارماندايمىز. قايدا بارىپ كورىنۋىمىزگە, ەمدەلۋىمىزگە بولادى؟
– الدىمەن ءوزىڭىز تۇراتىن جەردەگى اۋماقتىق ەمحاناعا قارالىڭىز. سول جەردە دارىگەرلەر سىزدەردى تولىق تەكسەرەدى. سودان كەيىن عانا, وندا دا ولار قاجەت دەپ تاپسا, ەمحاناداعى دارىگەرلەر ءسىزدى ءبىزدىڭ ورتالىققا جولدامامەن جىبەرەدى. سول جەردەگى ماماندارعا قارالىپ, ەمدەلۋىڭىزگە بولادى.
ءلاززات:
– وسكەمەن قالاسىنان حابارلاسىپ تۇرمىن. اپايىمنىڭ اياعى اۋىر. جۇكتىلىك مەرزىمى – 22 اپتا. ەكو ارقىلى ۇرىقتاندىرىلعان. ەكى ايدان بەرى دارىگەرلەر تۇسىك تاستاۋى مۇمكىن دەپ كۇدىكتەنىپ وتىر. جۇكتىلىكتىڭ بەسىنشى ايىندا مەرزىمىنەن بۇرىن بوساندىرۋ مۇمكىن بە؟ استاناعا كەلىپ, №1 پەريناتالدىق ورتالىقتىڭ ماماندارىنان كەڭەس الۋىمىزعا بولا ما؟
– ارينە. ول ءۇشىن ءسىز +7 (7172) 43-27-55 تەلەفونىنا قوڭىراۋ شالۋ ارقىلى ورتالىعىمىزدىڭ قابىلداۋ-دياگنوستيكالىق بولىمشەسىنە حابارلاسىپ, تولىق اقپارات الا الاسىز.
ايتولقىن:
– ءبىرىنشى بالامدى بوسانعانمىن. قازىر ءسابيىم 1,5 ايلىق. جولداسىم جۇمىستا بولعاندىقتان كوبىنە ۇزاقتى كۇنگە ۇيدە ءوزىم جالعىز قالامىن. بالام كەيدە مازاسىزدانىپ جىلايدى. نە ىستەرىمدى بىلمەي قينالامىن. ايتىڭىزشى, قاي كەزدە دارىگەر شاقىرتۋىم كەرەك؟
– ارينە, ءسابي دۇنيەگە كەلگەننەن كەيىن ونى اۋىرتىپ الماي, ءوسىرىپ-جەتكىزۋ – وتە جاۋاپتى ءىس. سوندىقتان, اسا مۇقيات بولىڭىز. ەگەر ءسابيىڭىز ومىراۋىڭىزدى ازەر سورىپ, السىزدىك تانىتسا نەمەسە ودان مۇلدە باس تارتسا, قول-اياعى سالبىراپ, ەشتەڭەگە زاۋقى سوقپاي, سەبەپسىز ۇزاق ۋاقىت توقتاماي جىلايتىن بولسا, دەمالىسى اۋىرلاپ, قۇسىپ, ءىشى وتكەن, ىستىعى 37,5°س-دەن جوعارىلاپ, ءتىپتى, تۇسپەگەن جاعدايدا جەدەل جاردەم شاقىرتقانىڭىز ءجون.
گۇلجان:
– جۇكتىلىگىم بويىنشا قالالىق № 7 ەمحانادا ەسەپتەمىن. دارىگەرىم №1 پەريناتالدىق ورتالىقتا بوساناتىنىمدى ايتتى. اقىلى پالاتالاردىڭ تاۋلىكتىك قۇنىن بىلگىم كەلەدى. سونىمەن بىرگە بوسانۋعا بارعاندا وزىممەن بىرگە قانداي زاتتار الىپ بارۋىم كەرەك, سەرىكتەسىمە نە قاجەت؟
– ءيا, №7 ەمحاناعا تىركەلگەن بولساڭىز, ءبىزدىڭ ورتالىقتا بوساناسىز. ال, اقىلى پالاتالاردىڭ باعاسىنا كەلسەك, بۇل ماسەلە بويىنشا ورتالىعىمىزدىڭ 3-اكۋشەرلىك بولىمشەسىنە, مەنەدجەرگە 43-27-32 تەلەفونى ارقىلى حابارلاسىپ نەمەسە مەديتسينالىق مەكەمەمىزدىڭ www pc-1.kz سايتىنان تولىق اقپاراتتى الا الاسىز. بوسانۋعا قاجەتتى زاتتاردىڭ ءتىزىمى ءسىزدىڭ جۇكتىلىك كارتاڭىزدا كورسەتىلگەن. سەرىكتەسىڭىز وزىمەن بىرگە اۋىستىراتىن كيىم جانە اياق كيىم الىپ كەلۋى كەرەك.
الميرا:
– وتباسىمىز ۇلكەن قۋانىشقا كەنەلىپ جاتىر. جاقىندا كوپتەن كۇتكەن ۇلىمىز دۇنيەگە كەلدى. نارەستەنى قالاي كۇتۋ جونىندە, تاماقتاندىرۋ تۋرالى كەڭىرەك بىلگىم كەلەدى. قانداي كەڭەس بەرەسىز؟
– بۇل تۋرالى سىزگە بالالار دارىگەرى تولىق ماعلۇمات بەرەدى. دەگەنمەن, ارنايى حابارلاسقانىڭىزدى ەسكەرە وتىرىپ, قىسقاشا جاۋاپ بەرەيىن. بالانى ەمىزەر الدىندا اناسى الدىمەن كەۋدەسىن تازالاپ سابىنمەن جۋىپ, تازا ورامالمەن سۇرتەدى, سوسىن بىرنەشە تامشى ءسۇتتى سىعىپ ساۋىپ تاستاۋ كەرەك, سوندا ەمشەك ۇرپىسىنە تۇرىپ قالعان باكتەريالار شايىلىپ كەتەدى. جالپى, ءسابيدى ەمىزەردە اناسىنىڭ دۇرىس جايعاسىپ وتىرعانى ءجون. ءسابي ەمگەن كەزدە ەرنىمەن ەمشەكتىڭ ۇرپىسىمەن قاتار اينالاسىنداعى تەرىسىن دە قامتۋى كەرەك. دەم الۋىنا كەدەرگى بولماۋى ءۇشىن مۇرنىنىڭ اشىق بولۋىن دا قاداعالاپ وتىرىڭىز.
ايەل ءۇشىن بالانى ەمىزۋدىڭ ارتىقشىلىعى كوپ. ماسەلەن, ول قانازدىق, ومىراۋ بەزىنىڭ وبىرى, انابەز وبىرى, ەرەسەك جاستاعى سۇيەك اۋرۋلارى سياقتى قاۋىپ-قاتەرلەردى تومەندەتەدى.
جانار ىزىمبەتوۆا:
– قالالىق №1 پەريناتالدىق ورتالىقتا بىلىكتى دە ءبىلىمدى دارىگەرلەردىڭ جۇمىس ىستەيتىنىنە انىق كوز جەتكىزىپ وتىرمىن. العاشقى قىزىمدى وسى ورتالىقتا بوسانعانمىن. ەكىنشى پەرزەنتىم دە وسىندا دۇنيەگە كەلدى. قازىرگى زامان تالابىنا ساي وزىق تەحنولوگيالارمەن جابدىقتالعان كلينيكانىڭ ماماندارى قاراپايىم, قايىرىمدى, تاجىريبەلەرى مول, گيپپوكرات انتىنا ادال جاندار بولىپ شىقتى. اسىرەسە, باس دارىگەر دينا امانگەلدىقىزىنا, باس دارىگەردىڭ ورىنباسارى شولپان بۇتىنبايقىزىنا, سونداي-اق بارلىق مەديتسينالىق قىزمەتكەرلەرگە ايتار العىسىم شەكسىز. ەڭبەكتەرىڭىزدىڭ جەمىسىن كورىڭىزدەر!
– راحمەت. بوپەڭىزدىڭ باۋى بەرىك بولسىن!
ينديرا:
– قايىرلى كۇن! جۇكتىلىگىمنىڭ مەرزىمى – 20 اپتا. قاي كەزدە جەدەل جاردەم شاقىرتقانىم دۇرىس؟
– ەگەر جىنىس جولدارىندا قان ارالاس اعىندى بىلىنسە, باسىڭىزدىڭ اۋىرۋى توقتاماي, اياق استىنان قولىڭىز بەن بەتىڭىز ىسىنسە, دەنە قىزۋىڭىز 38º س-دەن جوعارىلاسا, كىشى دارەتكە وتىرعان كەزدە اۋىرلىقتى سەزىنسەڭىز, ءىشىڭىز قاتتى اۋىرسا, بايقاۋسىزدا قۇلاپ قالىپ, ءىشىڭىزدى اۋىرتىپ الساڭىز بىردەن جەدەل جاردەم شاقىرتىڭىز.
التىناي ورىنباەۆا:
– ەستۋىمشە, قالالىق № 1 پەريناتالدىق ورتالىقتىڭ جانىندا انا مەكتەبى جۇمىس ىستەيدى. وعان قالاي قاتىسۋىما بولادى؟
– تۇرعىلىقتى مەكەنجايى بويىنشا №4, №7 ەمحاناعا, «شيپاگەر» وتباسىلىق-دارىگەرلىك امبۋلاتورياعا جانە ءبىزدىڭ ورتالىققا تىركەلگەن اياعى اۋىر ايەلدەر انا مەكتەبىنە تەگىن قاتىسا الادى. ال, باسقا تىلەك بىلدىرۋشىلەر ءۇشىن ونىڭ قىزمەتى – اقىلى.
