«سپورت – دەنساۋلىق كەپىلى, سپورت – ەل نامىسى» قاعيداسى بۇكىل الەمگە ورتاق ۇعىم. بۇگىنگى تاڭدا سپورت سالاسى يندۋسترياعا اينالعان دەسە بولادى.
ءتورت جىلدا ءبىر رەت وتەتىن وليمپيادا ويىندارى تەك قانا سپورتتىق باسەكە بولىپ قالماي, ەلدىك جانە ۇلتتىق مارتەبەنى ايقىندايتىن كورسەتكىشكە دە اينالىپ وتىرعانىن جوققا شىعارا المايمىز. سوندىقتان دا وليمپيادا ويىندارى مەن الەم چەمپيوندارى اتانعان سپورتشىلار تۋعان ەلىنىڭ باتىرىنا بالانىپ, ۇلتىنىڭ ماقتانىشى بولىپ وتىر.
وتكەن جەكسەنبىدە ەلىمىزدە سپورت كۇنى اتالىپ ءوتىلدى. ارينە, بيىلعى سپورت مەرەكەسىندە جىلداعىداي جارىستار مەن بۇقارالىق شارالار ۇيىمداستىرىلعان جوق. COVID-19 جاعدايىنا بايلانىستى ەنگىزىلگەن كارانتين شارالارى بارلىق دەڭگەيدەگى جارىستاردى شەكتەۋگە, تىپتەن جاتتىعۋلار وتكىزۋگە دە مۇمكىندىك بەرمەدى. دەگەنمەن, سپورت ۇيىمدارى مەن جەكەلەگەن سپورتشىلار ونلاين شارالار وتكىزىپ, جۇرتشىلىقتىڭ دەنە شىنىقتىرۋىنا, قاشىقتان سايىسقا تۇسۋىنە ىقپال جاسادى.
ال بۇگىندە كارانتين شارالارى بىرتىندەپ جەڭىلدەتىلىپ, ۇلكەن سپورتپەن قاتار بالالار مەن جاسوسپىرىمدەردىڭ جاتتىعۋلارى دا جاندانا باستادى. كارانتينگە بايلانىستى توقتاتىلعان فۋتبول چەمپيوناتى دا قايتا جالعاستى.
جانكۇيەرلەر ءۇشىن دە بيىلعى جىل ءساتسىز بولعانداي. ولاي دەيتىنىمىز, ءتورت جىل كۇتكەن وليمپيادا ويىندارى مەن فۋتبولدان ەۋروپا چەمپيوناتى كەلەسى جىلعا اۋىستىرىلدى. بۇل وزگەرىستەر قانشاما سپورتشىلاردىڭ ءۇمىتىن سۋىتىپ, جۇيكەسىن جۇقارتقانى ءسوزسىز.
ءبىز بۇگىن كەشەگى وتكەن سپورت كۇنىنە وراي قازاقستان سپورتىنىڭ ابىرويىن كوتەرگەن سپورتشىلارىمىز جايىندا ەسكە العاندى ءجون كوردىك. بۇل رەتتە الدىمەن تاياۋدا ومىردەن كەتكەن اتاقتى سپورتشىمىز, وليمپيادا ويىندارى مەن الەم چەمپيونى, قازاقستاننىڭ ەڭبەك ەرى اتانعان جاقسىلىق ۇشكەمپىروۆ ەسىمىن ىستىق ىقىلاسپەن ەسكە تۇسىرەمىز. كەڭەس وداعى كەزىندە-اق قازاقستان سپورتىنىڭ ابىرويىن كوتەرىپ, تاماشا جەڭىستەرىمەن حالقىنىڭ ماقتانىشىنا اينالعان ءامين تۇياقوۆ, ءشامىل سەرىكوۆ, سەرىك قوناقباەۆ, اناتولي بىكوۆ, ريازانتسەۆ, نەللي كيم, ۆيكتور تيحونەنكو, اناتولي حراپاتىي, داۋلەت تۇرلىحانوۆ سىندى ساڭلاقتار تاۋەلسىز قازاقستان نامىسىن قورعايتىن جاستارعا جارقىن جول كورسەتىپ بەردى دەسە بولادى. ال ەلىمىز ەگەمەندىك العاننان بەرگى 
وليمپيادا ويىندارى مەن الەم بىرىنشىلىكتەرىندە دە جەڭىستەن كەندە قالمادىق. 1994 جىلدان باستاپ كوك بايراعىمىزدى الەم اسپانىندا جەلبىرەتكەن سپورتشىلارىمىز جازعى ويىنداردان 19 التىن, 22 كۇمىس, 28 قولا مەدال جەڭىپ السا, قىسقى سپورتتان 1 التىن, 3 كۇمىس, 4 قولا جۇلدەگە يە بولعان ەكەن. تورتكۇل دۇنيەنىڭ ۇزدىكتەرى باق سىناعان بايراقتى باسەكەدە بەكزات ساتتارحانوۆ, ەرماحان ىبىرايىموۆ, ۆلاديمير سميرنوۆ, ۆاسيلي جيروۆ, ولگا شيشيگينا, يۋري مەلنيچەنكو, باقتيار ارتاەۆ, الەكساندر ۆينوكۋروۆ, باقىت سارسەكباەۆ, ولگا رىپاكوۆا, سەرىك ساپيەۆ, دميتري بالاندين, دانيار ەلەۋسىنوۆ جانە باسقا دا سايىپقىراندارىمىز ءوز جەڭىستەرىمەن قازاقستان حالقىن قۋانىشقا بولەگەنى ءسوزسىز.
بۇگىنگى تاڭدا قازاقستان حالىقارالىق سپورت ارەناسىنا اينالىپ وتىرعانى دا ايقىن. سوڭعى جىلدارى ەلىمىزدە كوپتەگەن سپورت ينفراقۇرىلىمدىرى بوي كوتەرىپ, بىرنەشە سپورت تۇرىنەن الەم چەمپيوناتتارى, وليمپيادا ويىندارىنا ىرىكتەۋ تۋرنيرلەرى, سونىمەن قاتار ازيا ويىندارى ءوتتى. 
«استانا» فۋتبول جانە ۆەلو كوماندالارى, «بارىس» حوككەي كلۋبى حالىقارالىق مارتەبەلى جارىستاردا ونەر كورسەتىپ, ەلدىك مەرەيىمىزدى كوتەرىپ ءجۇر.
قازاقتان سپورتىنىڭ وسىنداي جەڭىستى جولى كەلەشەككە قول سوزعان جاس سايىپقىراندارعا ونەگە دە, سەنىم دە بەرەتىنىنە ۇكىلى ۇمىتپەن قارايمىز.
