باس قالاداعى د.قوناەۆ اتىنداعى ۋنيۆەرسيتەت كوللەدجىنىڭ ۇجىمى ەل پرەزيدەنتى ن.نازارباەۆتىڭ «قازاقستان جولى-2050: ءبىر ماقسات, ءبىر مۇددە, ءبىر بولاشاق» جولداۋىن كەڭىنەن تالقىلادى.
شاراعا ءبىلىم ورداسىنىڭ ۇستازدارى مەن ستۋدەنتتەرى قاتىسىپ, پىكىر ءبىلدىردى. الدىمەن ءسوز العان اتالمىش وقۋ ورنىنىڭ باس ديرەكتورى سەيىلحان تولقىمبەكوۆ مەملەكەت باسشىسىنىڭ ءوزى ايتقانداي, بيىلعى جولداۋدىڭ باستى ەرەكشەلىگى 30 دامىعان ەلدىڭ قاتارىنا ەنۋ جولدارى وسى قۇجاتتا قامتىلىپ, باعىتتارى ايقىندالىپ وتىرعانىن جەتكىزدى.
«جىل سايىنعى قازاقستان حالقىنا ارنالعان جولداۋلارىندا ەلباسى نۇرسۇلتان ءابىشۇلى قوعامداعى وزەكتى ماسەلەلەرگە, اسىرەسە, ءبىلىم جانە عىلىم سالاسىنداعى جاڭعىرتۋلارعا كوبىرەك كوڭىل ءبولىپ كەلەدى. ستراتەگيا – كۇننەن كۇنگە, جىلدان جىلعا ەلىمىزدى, قازاقستاندىقتاردىڭ ءومىرىن جارقىن ەتە تۇسەتىن ناقتى پراكتيكالىق ىستەر باعدارلاماسى. دەگەنمەن, قازىرگىدەي نارىقتىق جاعدايدا اركىم اۋىز اشىپ, اسپاننان ناپاقا كۇتپەي, ءتيىمدى ەڭبەكتەنۋگە ءتيىس. وسىنى, اسىرەسە جاستار جاعى دۇرىس تۇسىنۋلەرى كەرەك» دەي كەلە, س.تولقىمبەكوۆ بۇل رەتتە مەملەكەت ۇلكەن مۇمكىندىكتەر جاساپ وتىرعانىن, تەك ونى ءتيىمدى پايدالانۋ قاجەتتىگىن ەسكەرتتى.
جولداۋدا ايتىلعان ماسەلەلەر بويىنشا كوللەدج مۇعالىمدەرى بايانداما جاسادى. وندا ەلباسى جولداۋىنداعى باسىم باعىتتار, دامىعان 30 ەلدىڭ قاتارىنا قوسىلۋدىڭ جولدارى, «ماڭگىلىك ەل» يدەياسى تۋرالى باسا ايتىلدى.
ستۋدەنتتەر دە قالىس قالمادى. مىنبەرگە شىعىپ سويلەگەن جاستار ءىسى جونىندەگى كوميتەتتىڭ پرەزيدەنتى ءبيبىنۇر كامەشوۆا بيىلعى جولداۋ ءبىزدىڭ بولاشاعىمىزعا ارنالىپ وتىرعانىن, الايدا, وعان بەي-جاي قاراۋعا بولمايتىنىن, بولاشاقتىڭ ىرگەسى بۇگىننەن قالاناتىنىن ەسكەرە وتىرىپ, بۇل باعىتتا بارلىعىمىز بىرگە, جۇمىلا جۇمىس ىستەۋىمىز كەرەكتىگىن العا تارتتى. «ەلدىڭ بولاشاعى جارقىن بولۋى بىزگە بايلانىستى. ءبىز قوعامدا بولىپ جاتقان قۇبىلىستارعا نەمقۇرايلى قاراي المايمىز. ەندەشە, ەلىمىزدەگى بارلىق جاستاردى بەلسەندىلىك تانىتۋعا شاقىرامىن. ويتكەنى, ءبىلىم قاي كەزدە دە جوعارى قۇندىلىقتاردىڭ ءبىرى بولىپ قالا بەرەدى. دەمەك, ءبىلىمدى, ساۋاتتى ادام عانا كەلەشەك تىزگىنىن قولىنا الا الادى» دەدى ول.
باياندامادان سوڭ ۇستازدار جولداۋدا قاراستىرىلعان باسىمدىقتارعا جەكە-جەكە توقتالىپ, ءوز ويلارىن ورتاعا سالدى. ال, ستۋدەنت جاستار بولسا جاڭا ستراتەگيانىڭ جاڭا باستامالارعا جول باستايتىنىنا زور سەنىم ءبىلدىردى.
نايليا تاقانوۆا,
قازاقستان جۋرناليستەر وداعىنىڭ مۇشەسى
