قر تۇڭعىش پرەزيدەنتى – ەلباسى كىتاپحاناسىنىڭ مۋزەيىندە بەلگىلى قىلقالام شەبەرى, قازاقستان سۋرەتشىلەر وداعىنىڭ مۇشەسى قازاقباي اجىبەكۇلىنىڭ «ونەر شىڭىنا ۇمتىلىس» اتتى جەكە كورمەسى اشىلدى.
كورمەگە سۋرەتشىنىڭ 1997-2020 جىلدارى جاساعان وتىزعا جۋىق جۇمىسى قويىلدى. بۇل ەڭبەكتەردە ول وتكەن عاسىردىڭ سوڭى مەن جاڭا عاسىردىڭ العاشقى جيىرما جىلىنداعى ەلىمىزدەگى وڭ وزگەرىستەردى, اسىرەسە ارقا توسىندە بوي كوتەرگەن اسەم استانانىڭ كەلبەتىن بوياۋ تىلىمەن بەدەرلى سويلەتە بىلگەن.
جالپى قىلقالام شەبەرىنىڭ شىعارماشىلىعى – ۇلتتىق قايناردان باستاۋ الادى. سوندىقتان ونىڭ كارتينالارىندا حالقىمىزدىڭ تەرەڭ تاريحى مەن ءداستۇرى ايشىقتى كورىنىس تابادى.
مادەني شارانىڭ اشىلۋىندا ەلباسى كىتاپحاناسىنىڭ ديرەكتورى ءامىرحان راحىمجانوۆ كورمە يەسىن ەلىمىزدەگى بەينەلەۋ ونەرىنىڭ بىرەگەيى دەي كەلىپ: «سارىارقانىڭ توسىنەن ورىن تەپكەن ەلوردامىزدىڭ العاشقى بەينەسىن ەلباسىمەن بايلانىستىرا بىلگەن قازاقبايدىڭ شىعارماشىلىعى ەرەكشە. اۆتور ءوز جۇمىستارىندا ۋاقىت پەن ءومىردىڭ ءوزارا استاسىپ جاتقانىن شىنايى سۋرەتتەيدى» دەپ جوعارى باعا بەردى.
كورمەگە قوناق رەتىندە قاتىسقان تالانتتى كومپوزيتور تولەگەن مۇحامەدجانوۆ تا اۆتور تۋرالى جىلى لەبىزىن بىلدىرسە, كورنەكتى قىلقالام شەبەرى كاميل مۋللاشەۆ اجىبەكۇلىنىڭ استانانىڭ العاشقى قالىپتاسۋ جىلدارىن تاماشا بەينەلەگەن تالانتىنا توقتالىپ: «قازاقباي جۇمىستارىنىڭ ءبىر ەرەكشەلىگى – حالىققا جاقىن, ونىڭ تۋىندىلارىندا ءبىر جىلىلىق بار, بوياۋلارى قانىق. ونىڭ شىعارمالارى سۇلۋلىققا قۇشتار ءار ادامنىڭ جۇرەگىنەن ورىن الادى» دەپ ايتتى.
ءىس-شارا سوڭىندا قازاقباي اجىبەكۇلى دا ءسوز الىپ, كورمەنى ۇيىمداستىرۋشىلار مەن كەلگەن قوناقتارعا ريزاشىلىعىن جەتكىزدى. كورمە 1 قاراشاعا دەيىن جالعاسادى.
