ەلوردادا ارنايى وپەراتسيا بارىسىندا ەسىرتكى ساتۋشىلاردان قۇرالعان قىلمىستىق توپ ۇستالدى. بۇل تۋرالى قالالىق پوليتسيا دەپارتامەنتى حابارلادى.
«قاراسورا-2020» جەدەل الدىن الۋ شارالارى بارىسىندا ەسىرتكىنىڭ زاڭسىز اينالىمىنىڭ تۇراقتى كانالى جويىلىپ, ەلورداعا ەسىرتكى جەتكىزىپ, ساتىپ كەلگەن قىلمىستىق توپتىڭ ءىس-ارەكەتتەرىنە توسقاۋىل قويىلدى.
«الدىمەن ەسىرتكى ساتىپ, بۇرىن سوتتى بولعان 27 جاستاعى كۇدىكتى ەلوردا اۋماعىندا ءدال وسىنداي قىلمىسپەن قايتا ۇستالدى. ونىڭ كولىگىن ءتىنتۋ كەزىندە ۇستالعان ادام ساتۋعا دايىنداعان, جالپى سالماعى 500 گرامنان اساتىن, ورالعان گاشيش سالىنعان سىرىڭكە قوراپتارى تاركىلەندى. سونداي-اق كولىكتىڭ ىشىندە بۇرىن سوتتالعان 24 جاستاعى ازامات بولعان. ودان دا تەكسەرۋ كەزىندە گاشيش تاركىلەندى. پوليتسيا قىزمەتكەرلەرى ەلورداعا ەسىرتكىنى جەتكىزىپ تۇرعان نەگىزگى تاسىمالداۋشىنى ۇستادى. ول – بۇرىن سوتتى بولعان جامبىل وبلىسىنىڭ 34 جاستاعى تۇرعىنى بولىپ شىقتى. ونىڭ پاتەرىن ءتىنتۋ بارىسىندا وقتارى بار تراۆماتيكالىق قارۋ, ەسىرتكى سەبىلگەن ەلەكتروندى سالماق ولشەۋىش جانە ەسىرتكى قابىلداۋعا ارنالعان قۇرال تابىلدى. سونداي-اق 2 ميلليون 150 مىڭ تەڭگەلىك قولما-قول اقشا, گاشيش ورالعان ءۇش پوليەتيلەندى پاكەت, ەسىرتكى تولتىرىلعان 265 سىرىڭكە قورابى تاركىلەندى» دەيدى نۇر-سۇلتان قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى, پوليتسيا پولكوۆنيگى ولجاس جارىلعاپوۆ.
ارنايى وپەراتسيانى جۇرگىزۋ بارىسىندا زاڭسىز اينالىمنان 6 كەلى ەسىرتكى (3 مىڭ رەتتىك گاشيش دوزاسى – قارا نارىقتاعى باعاسى 9 ملن تەڭگە) تاركىلەندى.
قازىر كۇدىكتىلەر قىلمىستىق كودەكستىڭ 296-بابى 4-بولىگى جانە 297-بابى 3-بولىگى بويىنشا قىلمىستىق جاۋاپكەرشىلىككە تارتىلۋدا. ايىپتى دەپ تانىلسا, ولار 7 جىلدان 25 جىلعا دەيىن باس بوستاندىعىنان ايىرىلادى.
