مەملەكەت باسشىسى قاسىم-جومارت توقاەۆ پرەمەر-مينيستر اسقار ءماميندى قابىلدادى.
پرەزيدەنتكە سانيتارلىق-ەپيدەميولوگيالىق جاعدايدى تۇراقتاندىرۋ ءۇشىن قابىلدانىپ جاتقان شارالار جانە ەلىمىزدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تۋرالى باياندالدى. اسقار مامين پرەزيدەنتكە ەلىمىزدەگى سانيتارلىق-ەپيدەميولوگيالىق جاعدايدىڭ باقىلاۋدا ەكەنىن جەتكىزدى. سونداي-اق ىندەتتىڭ جاڭا تولقىنىنا دايىندىق جۇمىستارى اياسىندا جۇزەگە اسىرىلىپ جاتقان شارالار تۋرالى مالىمەت بەرىلدى. مەملەكەت باسشىسىنا رەسپۋبليكالىق جانە ايماقتىق تۇراقتاندىرۋ قورلارىنىڭ قۇرىلعانى جانە دەنساۋلىق ساقتاۋ جۇيەسىنە ارنالعان 91 ءتۇرلى ءدارى-دارمەك پەن جەكە قورعانىش قۇرالدارىنىڭ ەكى ايلىق قورى جاساقتالعانى تۋرالى ايتىلدى. ءدارى-دارمەكتەردىڭ تاپشىلىعىن بولدىرماۋ ءۇشىن ءدارىحانالاردىڭ بولشەك ساۋدا جۇيەسىندە سۇرانىسقا يە 33-تەن استام پرەپارات قورى قوسىمشا جاساقتالۋدا. اسقار مامين قاسىم-جومارت توقاەۆقا پتر تەست سىنامالارىن الۋ كولەمىن ارتتىرۋ جۇمىستارى تۋرالى دا مالىمەت بەردى. ونىڭ ايتۋىنشا, زەرتحانالار سانى 124-كە دەيىن كوبەيىپ, تەستىلەۋ قۋاتى تاۋلىگىنە 66 مىڭعا دەيىن جەتتى. بۇل رەتتە تۇرعىنداردى تەست سىنامالارىمەن قامتۋ 2,5 ەسە ۇلعايتىلىپ, پتر تەست سىنامالارىن الۋ قۇنى تومەندەتىلدى.
سونىمەن قاتار وڭىرلەردەگى بيزنەس سۋبەكتىلەرىنىڭ جۇمىسى بىرتىندەپ قايتا قالپىنا كەلتىرىلۋدە. وسى رەتتە ايماقتا ۆيرۋس جۇقتىرۋ ءوسىمىنىڭ تىركەلمەۋى, تۇراقتى ەپيدەميولوگيالىق احۋالدىڭ «جاسىل» دەڭگەيدە بولۋى ەسكەرىلەدى.
پرەزيدەنت كوروناۆيرۋس پاندەمياسىنىڭ الداعى ايلارداعى تارالۋىنا قاتىستى دۇنيەجۇزىلىك دەنساۋلىق ساقتاۋ ۇيىمىنىڭ پەسسيميستىك بولجامدارىن ەسكەرىپ, ۇكىمەت بەلگىلەگەن جوسپاردىڭ مۇلتىكسىز ورىندالۋىنىڭ ماڭىزدى ەكەنىن اتاپ ءوتتى. كارانتيندى كۇشەيتۋ جونىندەگى قاتاڭ شارالاردى كاسىپكەرلەردىڭ مۇددەلەرىن جانە جالپى ەلىمىزدىڭ ەكونوميكالىق دامۋىن ەسكەرە وتىرىپ قابىلداعان ءجون.
