قىزىلوردا وبلىسىنىڭ اكىمى قىرىمبەك كوشەرباەۆ «ارقاعا كەلىپ, ارقا-جارقا بولىپ جاتقان جاعدايىمىز بار. بيىل ءبىز ءۇشىن قۋانىشتى جاعداي سىر ءوڭىرىنىڭ كۇرىششىلەرى رەكوردتىق كورسەتكىشكە قول جەتكىزىپ, گەكتارىنان 49 تسەنتنەر ونىم الدى. وسىندا كەلىپ, اۋىل شارۋاشىلىعى مينيسترىمەن, «كازاگرو» باسشىلارىمەن جوسپارلارىمىزدى تالقىلادىق. قالاداعى ءزاۋلىم عيماراتتاردى دا كورىپ, كوتەرىلىپ قالىپ جاتىرمىز. ءبىز استاناعا قاراپ بوي تۇزەيمىز» دەپ, وسىنداي مۇمكىندىكتى تۋعىزعان يمانعالي نۇرعاليۇلىنا ريزاشىلىعىن ءبىلدىردى. ەلوردالىقتار وڭىرلەر ۇسىنعان مادەني باعدارلاماعا دا سۋسىنداپ قالدى.
ەلىمىزدەگى ەڭ ءىرى استىقتى ولكەدە وسەتىن ارپا, بيداي, سۇلى سەكىلدى ءداندى داقىلداردان كورمە ۇيىمداستىرىلدى. سونداي-اق, ەكى ءوڭىر كوز تارتار قولونەر بۇيىمدارىن ەل نازارىنا شىعاردى. قوستانايدان ارنايى كەلگەن بەلگىلى كومپوزيتور قاليبەك دەرىپسالديننىڭ جانە سىردان جەتكەن جەرلەستەرىن قولداعان ەلەنا ابدىحالىقوۆانىڭ سالعان اندەرى حالىق كوڭىلىن كوتەرىپ تاستادى. ارينە, ولاردان باسقا دا ونەرپازدار ونەرلەرىن كورسەتتى. جالاعاش اۋدانىنداعى «باي تابىن» جشس مەن «ميراج» شارۋا قوجالىعى قوناقجايلىلىق تانىتىپ, وزدەرى تىككەن كيىز ۇيدەن تالاي ادامعا دام تاتىردى. ارزان باعاعا ساتىلعان ارالدىڭ بالىعىن, سىردىڭ اقتالعان كۇرىشىن الۋشىلار قاراسى مول بولدى. ءبىر «اتتەگەن-ايى» جارمەڭكە ءبىر كۇن عانا ءجۇردى. سوندىقتان دا شىعار, كەيبىر ونىمدەردىڭ از اكەلىنگەنى ءبىلىندى. ماسەلەن, رۋدنىي قالاسىنداعى «جاس قانات – 2006» قۇس فابريكاسى اكەلگەن 18 مىڭ جۇمىرتقا تۇسكە دەيىن-اق ءوتىپ كەتىپ, كوپ تۇتىنۋشىعا جەتپەي قالدى.
كارتوپ تا ءدال وسىلاي تەز ساتىلدى دا كەتتى. بىراق, وكىنەتىندەي نەگىز جوق. الدا الى ەكى جارمەڭكە بار. سول كەزدە جەتپەي قالعان ازىق-تۇلىك ءتۇرىن ساتىپ الۋعا بولادى.
امانعالي قالجانوۆ
